ក្រោយអស់តំណែងជានាយករដ្ឋមន្ត្រី លោក ប្រាយុទ្ធ ប្រាប់អ្នកសារព័ត៌មាន​ថា ៖ “ខ្ញុំមិនទាន់ទៅណាទេ”

លោកឧត្តមសេនីយ៍ ប្រាយុទ្ធ ចាន់អូចា នាយករដ្ឋមន្ត្រី និងជារដ្ឋមន្ត្រីការពារជាតិដែលផុតអាណត្តិរបស់ថៃ បានបង្ហាញខ្លួនក្នុងកិច្ចប្រជុំលើកចុងក្រោយ ក៏ដូចជាធ្វើពិធីលាកូនចៅនៅឯក្រុមប្រឹក្សាការពារជាតិកាលពីថ្ងៃសុក្រ ហើយក៏បានឆ្លើយសំណួរជាមួយនឹងអ្នកសារព័ត៌មានដ៏កម្រផងដែរ ។

នៅពេលអ្នកសារព័ត៌មានចាក់សួរថាតើលោកនឹងធ្វើអ្វី បន្ទាប់ពីលាឈប់ពីតំណែងទាំងអស់នេះ, លោក ប្រាយុទ្ធ ដែលបច្ចុប្បន្នមានវ័យ ៦៩ ឆ្នាំទៅហើយនោះបានឆ្លើយយ៉ាងខ្លីថា “ខ្ញុំសុំពេលសម្រាកបន្តិច ប៉ុន្តែខ្ញុំមិនទាន់ទៅណានោះទេ” ។

ទន្ទឹមនោះ មុនពេលចាកចេញពីក្រសួងការពារជាតិ និងចូលក្នុងរថយន្ត, លោក ប្រាយុទ្ធ បានប្រាប់អ្នកយកព័ត៌មានទៀតថា “ខ្ញុំមិនទាន់ទៅណាទេ ។ មន្ត្រីរាជការផ្សេងទៀតគឺចូលនិវត្តន៍នៅអាយុ ៦០ ឆ្នាំ ប៉ុន្តែសម្រាប់ខ្ញុំវិញ នឹងចូលនិវត្តន៍នៅអាយុ ៧០ ឆ្នាំ ហើយចំពោះព័ត៌មានលម្អិតយ៉ាងនោះ ខ្ញុំសូម​មិន​​បញ្ជាក់ឡើយ” ។

ក្នុងឱកាសលាគ្នានៅក្រសួងការពារជាតិនេះដែរ លោកឧត្តមសេនីយ៍ ប្រាយុទ្ធ ក៏បានថ្លែងអំណរគុណដល់មេបញ្ជាការដែលចូលរួមបម្រើ និងគាំទ្រលោកក្នុងការកាន់អំណាចរយៈពេល ៨ ឆ្នាំមកនេះ ហើយលោកថែមទាំងស្នើឲ្យពួកគេបន្តថែរក្សាប្រទេសជាតិ ប្រជាជន និងសសរស្តម្ភទាំងបីរបស់ប្រទេសថៃគឺ ជាតិ សាសនា និងព្រះមហាក្សត្រ ។

ជាចុងក្រោយលោក ប្រាយុទ្ធ ក៏បានសំណូមពរដល់មេបញ្ជាការជាន់ខ្ពស់យោធា និងប៉ូលិស ឲ្យថែរក្សាអ្នកជំនាន់ក្រោយ ជាពិសេសកងកម្លាំងក្មេងៗ ដោយការពារ និងធានាឲ្យបាននូវសុខុមាលភាព និងអត្ថប្រយោជន៍ផ្សេងៗទៀតជាដើម ៕

ប្រែសម្រួលដោយ ៖ ជីវ័ន្ត

ប្រភព ៖ The Nation Thailand

ចុចអាន ៖ ប្រធានពេទ្យប៉ូលិស ៖ ពេលនេះសុខភាពលោក ថាក់ស៊ីន កំពុងស្ថិតក្នុង​ដំណាក់ការព្រួយបារម្ភ