ខណៈគណៈរដ្ឋមន្ត្រីមិនទាន់លេចរូបរាង តើនរណានឹងតំណាង ថៃ ចូលរួមកិច្ចប្រជុំកំពូលអាស៊ាននៅ ឥណ្ឌូណេស៊ី?

រហូតមកដល់ពេលនេះ គណៈរដ្ឋមន្ត្រីរបស់លោក សេតថា ថាវីស៊ីន នាយករដ្ឋមន្ត្រីថ្មីរបស់ប្រទេសថៃមិនទាន់ស្បថចូលកាន់តំណែងជាផ្លូវការនៅឡើយទេ ស្របពេលដែលកិច្ចប្រជុំកំពូលអាស៊ានលើកទី ៤៣ និងកិច្ចប្រជុំពាក់ព័ន្ធក៏នឹងរៀបចំឡើងនៅទីក្រុងហ្សាការតា ប្រទេសឥណ្ឌូណេស៊ីនាថ្ងៃទី៥ ដល់ថ្ងៃទី៧ ខែកញ្ញានេះហើយ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពាក់ព័ន្ធនឹងបញ្ហានេះដែរ មានសំណួរជាច្រើនបានចាក់សួរថាតើនរណានឹងតំណាងឲ្យប្រទេសថៃចូលរួមកិច្ចប្រជុំកំពូលអាស៊ានលើកទី ៤៣ នៅប្រទសឥណ្ឌូណេស៊ី ជាលោក សេតថា ឬក៏ជាលោក ប្រាយុទ្ធ ចាន់អូចា ដែលបច្ចុប្បន្នលោកនៅជានាយករដ្ឋមន្ត្រីចាំផ្ទះនៅឡើយ ។

ទោះយ៉ាងណា លោក ប្រាយុទ្ធ នឹងមិនមានវត្តមាននៅកិច្ចប្រជុំកំពូលអាស៊ានលើកទី ៤៣ និងកិច្ចប្រជុំពាក់ព័ន្ធនៅទីក្រុងហ្សាការតាប្រទេសឥណ្ឌូណេទៀតនោះទេ ហើយនឹងជំនួសកៅអីនេះដោយនាយករដ្ឋមន្ត្រីជាប់ឆ្នោតថ្មីគឺលោក សេតថា បើទោះបីជាគណៈរដ្ឋមន្ត្រីថ្មីមិនទាន់លេចជារូបរាងក៏ដោយ ប៉ុន្តែព្រះមហាក្សត្រទ្រង់បានសម្រេចព្រះទ័យរួចរាល់អស់ហើយ ។

លោក សេតថា នឹងចូលរួមកិច្ចប្រជុំកំពូលអាស៊ានលើកទី ៤៣ និងកិច្ចប្រជុំពាក់ព័ន្ធនៅទីក្រុងហ្សាការតាថ្ងៃចន្ទនេះ ខណៈក្រោយបញ្ចប់ភារកិច្ចនៅប្រទេសឥណ្ឌូណេស៊ីហើយ មហាសេដ្ឋីអចលនទ្រព្យវ័យ ៦១ ឆ្នាំរូបនេះអាចនឹងដឹកនាំគណៈរដ្ឋមន្ត្រីថ្មីចូលស្បថកាន់តំណែងជាផ្លូវការនៅមុខព្រះភ័ក្រព្រះមហាក្សត្រចន្លោះ​ថ្ងៃ​ទី​៨-​៩ ឬ​ថ្ងៃ​ទី​១១-១២ ខែកញ្ញា ។

គួរបញ្ជាក់ថា លោក សេតថា នឹងក្លាយជាមេដឹកនាំថ្មីមួយរូបនៅក្នុងកិច្ចប្រជុំកំពូលអាស៊ានលើកទី ៤៣ និងកិច្ចប្រជុំពាក់ព័ន្ធនៅប្រទេសឥណ្ឌូណេស៊ី ក្នុងនាមជានាយករដ្ឋមន្ត្រីថៃ ហើយក្រៅពីតំណែងមួយនេះ លោក សេតថា ក៏នឹងធ្វើជារដ្ឋមន្ត្រីហិរញ្ញវត្ថុផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ The Nation Thailand

ចុចអាន ៖ តើមូលហេតុអ្វីខ្លះទើបព្រះមហាក្សត្រ ថៃ សម្រេចព្រះទ័យបន្ថូរបន្ថយទោស លោក ថាក់ស៊ីន?