លោក Biden គំរាមដាក់ទណ្ឌកម្មប្រទេសមីយ៉ាន់ម៉ាបន្ទាប់ពីរដ្ឋប្រហារ

នៅថ្ងៃអង្គារនេះ លោកប្រធានាធិបតី Joe Biden បានគំរាមដាក់ទណ្ឌកម្មថ្មីលើប្រទេសមីយ៉ាន់ម៉ា បន្ទាប់ពីយោធាធ្វើរដ្ឋប្រហារនិងចាប់ខ្លួនមេដឹកនាំស៊ីវិលរបស់រដ្ឋាភិបាលរួមទាំងលោកស្រី អ៊ុងសានស៊ូជី ផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Biden បានថ្កោលទោសកងទ័ពរបស់ប្រទេសនេះសម្រាប់ការធ្វើរដ្ឋប្រហារ ដោយហៅថាជាការវាយលុកដោយផ្ទាល់ទៅលើដំណើរការរបស់ប្រទេសនេះឆ្ពោះទៅកាន់លទ្ធិប្រជាធិបតេយ្យនិងនីតិរដ្ឋ។

នៅក្នុងសេចក្តីថ្លែងការណ៍មួយ លោក Biden បាននិយាយថា “សហរដ្ឋអាមេរិកបានដកទណ្ឌកម្មលើប្រទេសមីយ៉ាន់ម៉ាក្នុងរយៈពេលមួយទសវត្សរ៍កន្លងមកនេះ ដោយផ្អែកលើការរីកចម្រើនឆ្ពោះទៅរកលទ្ធិប្រជាធិបតេយ្យ។ ការថយក្រោយនៃការរីកចម្រើននោះ នឹងត្រូវពិនិត្យឡើងវិញជាបន្ទាន់នូវច្បាប់និងអំណាចរបស់យើង ហើយបន្ទាប់មកនឹងមានសកម្មភាពសមស្រប។ សហរដ្ឋអាមេរិកនឹងគាំទ្រលទ្ធិប្រជាធិបតេយ្យនៅកន្លែងណាដែលរងការវាយប្រហារ”។

ប្រទេសមីយ៉ាន់ម៉ាគឺជាគម្រោងលើកកម្ពស់លទ្ធិប្រជាធិបតេយ្យរបស់លោកខាងលិចអស់រយៈពេលជាច្រើនទសវត្សរ៍មកហើយ ហើយជានិមិត្តរូបនៃភាពជោគជ័យមួយចំនួន។ ប៉ុន្តែក្នុងរយៈពេលប៉ុន្មានឆ្នាំកន្លងមកនេះ មានការព្រួយបារម្ភកាន់តែខ្លាំងឡើងៗអំពីការវិលត្រឡប់របស់ខ្លួនទៅជារបបផ្តាច់ការវិញ។

ប្រទេសមីយ៉ាន់ម៉ាបានងើបចេញពីការគ្រប់គ្រងដោយយោធាយ៉ាងតឹងរ៉ឹងរយៈពេលរាប់ទសវត្សរ៍និងភាពឯកោអន្តរជាតិដែលបានចាប់ផ្តើមនៅក្នុងឆ្នាំ១៩៦២ ហើយព្រឹត្តិការណ៍កាលពីថ្ងៃចន្ទគឺជាការធ្លាក់ចុះដ៏គួរឲ្យភ្ញាក់ផ្អើលមួយ៕

ប្រែសម្រួលដោយ៖ Vann Vann

ប្រភព៖ AP

ចុចអាន៖ ពលករចំណាកស្រុកមីយ៉ាន់ម៉ានៅថៃ ធ្វើបាតុកម្មប្រឆាំងរដ្ឋប្រហារក្នុងប្រទេសកំណើត