សមាជិក​ណាតូ​មួយប្រទេស​ ប្រើ​រថក្រោះ​យកពី​សារមន្ទីរ ទៅ​បង្វឹកទាហាន ​អ៊ុយក្រែន

សមាជិកណាតូ គឺប្រទេសដាណឺម៉ាក ទទួលស្គាល់ថា ខ្លួនបានប្រើប្រាស់រថក្រោះដែលតាំងពិពណ៌នៅសារមន្ទីរដើម្បីបណ្តុះបណ្តាលនាវិកអ៊ុយក្រែនឲ្យចេះប្រើរថក្រោះ Leopard 1 ផលិតដោយអាល្លឺម៉ង់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីថ្លែងការណ៍មួយដែលចេញផ្សាយកាលពីថ្ងៃសុក្រទី៨ខែកញ្ញាបាននិយាយថា យ៉ាងហោចណាស់រថក្រោះធុនធ្ងន់ចំនួន៦គ្រឿង ត្រូវបានខ្ចីពីសារមន្ទីរជាច្រើន ដើម្បីបំពេញតាមតម្រូវការហ្វឹកហាត់កាលពីដើមឆ្នាំនេះ។

រដ្ឋាភិបាលទីក្រុង កូប៉ិនហាក បានចុះកិច្ចព្រមព្រៀងជាមួយប្រទេសហូឡង់ និងអាល្លឺម៉ង់កាលពីខែកុម្ភៈ ដើម្បីរួមគ្នាទិញរថក្រោះ Leopard 1A5 ចំនួន១០០ គ្រឿងឲ្យទីក្រុងកៀវ។ គម្រោងនេះក៏ពាក់ព័ន្ធនឹងការបណ្តុះបណ្តាលសម្រាប់ទាហានអ៊ុយក្រែនផងដែរ។

ប្រទេសដាណឺម៉ាក បានធ្វើប្រតិបត្តិការរថក្រោះ Leopard 1A5 រហូតដល់ឆ្នាំ២០០៥។ ទីក្រុង កូប៉ិនហាក បានលក់រថក្រោះចំនួន១០០គ្រឿង ទៅឲ្យក្រុមហ៊ុនអាល្លឺម៉ង់ FFG ក្នុងឆ្នាំ២០១០ ខណៈរថក្រោះខ្លះ ត្រូវបញ្ជូនទៅទុកនៅសារមន្ទីរ។ បន្ទាប់មកយោធាដាណឺម៉ាក ក៏បានសម្រេចចិត្តខ្ចីពួកគេមកវិញ ដើម្បីចាប់ផ្តើមការហ្វឹកហ្វឺនភ្លាមៗលើទាហានអ៊ុយក្រែន។

យោធាដាណឺម៉ាកបានបញ្ជាក់កាលពីថ្ងៃសុក្រថា ខ្លួនបានផ្តល់រថក្រោះ Leopard 1 ក្រុមដំបូង ដល់ទីក្រុងកៀវរួចទៅហើយ ខណៈរថក្រោះបន្ថែមទៀត នឹងបញ្ជូនទៅតាមក្រោយ៕

ប្រែសម្រួល៖ Vann Vann

ប្រភព៖ RT

ចុចអាន៖ កងទ័ពអ៊ុយក្រែន ទៅដល់ចក្រភពអង់គ្លេស ដើម្បីហាត់ប្រើ រថក្រោះ