ព័ត៌មានអន្ដរជាតិ

រុស្ស៊ី ៖ មេទ័ពសមុទ្រខ្មៅដែល អ៊ុយក្រែន អះអាងថា បាញ់មីស៊ីលសម្លាប់ គឺនៅរស់រានមាជីវិត

បានផុស

២ years មុន

នៅ

ថ្ងៃពុធ ២៧ កញ្ញា ២០២៣

ដោយ

រុស្ស៊ីបានបញ្ចេញវីដេអូមួយបង្ហាញពីលោក Viktor Sokolov មេបញ្ជាការកងនាវាចរសមុទ្រខ្មៅតំបន់គ្រីមៀនៅរស់រានមានជីវិតនៅឡើយ និងថែមទាំងចូលរួមកិច្ចប្រជុំតាមអនឡាញជាមួយរដ្ឋមន្ត្រីការពារជាតិរុស្ស៊ីផងដែរ ជាពិសេសវាក៏ទំនងជាការបដិសេធទៅនឹងការអះអាងរបស់អ៊ុយក្រែនដែលថា បានសម្លាប់មេបញ្ជាការរូបនេះក្នុងការវាយប្រហារដោយមីស៊ីលកាលពីសប្ដាហ៍មុន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងវីដេអូ និងរូបថតដែលចេញផ្សាយដោយក្រសួងការពារជាតិរុស្ស៊ី និងបង្ហាញនៅលើកញ្ចក់ទូរទស្សន៍រដ្ឋកាលពីថ្ងៃអង្គារ លោក Sokolov ត្រូវបានគេមើលឃើញថាកំពុងអង្គុយប្រជុំតាមរយៈវីដេអូអនឡាញជាមួយរដ្ឋមន្ត្រីការពារជាតិលោក Sergey Shoigu រួមជាមួយឧត្តមនាវីកំពូលៗ និងមេទ័ពផ្សេងទៀត ។

ទោះយ៉ាងណា លោក Anton Gerashchenko ទីប្រឹក្សារដ្ឋមន្ត្រីក្រសួងកិច្ចការផ្ទៃក្នុង រួមជាមួយនឹងក្រសួងការពារជាតិរបស់អ៊ុយក្រែនបានឆ្លើយតបទៅនឹងវីដេអូដែលបញ្ចេញដោយរុស្ស៊ីនោះថា លោក Sokolov ពិតជាត្រូវបានគេមើលឃើញនៅក្នុងអេក្រង់ទូរទស្សន៍ពិតប្រាកដមែន ប៉ុន្តែលោកមិនបាននិយាយអ្វីនៅក្នុងកិច្ចប្រជុំនោះទេ ដូច្នេះលោកសង្ស័យថា កិច្ចប្រជុំនោះគឺធ្វើឡើងនៅមុនថ្ងៃនៃការវាយប្រហាររបស់អ៊ុយក្រែន ។

កងកម្លាំងពិសេសរបស់អ៊ុយក្រែនបាននិយាយកាលពីថ្ងៃចន្ទថា លោក Sokolov រួមជាមួយមន្ត្រី ៣៣ នាក់ផ្សេងទៀតត្រូវបានសម្លាប់នៅក្នុងការវាយប្រហារដោយមីស៊ីលលើទីស្នាក់ការនៃកងទ័ពជើងទឹករបស់រុស្ស៊ីក្នុងទីក្រុងកំពង់ផែ Sevastopol នៃឧបទ្វីបគ្រីមៀកាលពីថ្ងៃទី២៣ ខែកញ្ញា ខណៈមនុស្ស ១០៥ នាក់ផ្សេងទៀតក៏បានរងរបួសក្នុងការវាយប្រហារនោះផងដែរ ។

ពាក់ព័ន្ធនឹងរឿងរ៉ាវនេះដែរ កងទ័ពអ៊ុយក្រែនបានអះអាងទៀតថា ការវាយប្រហារលើទីស្នាក់ការនៃកងទ័ពជើងទឹករបស់រុស្ស៊ី គឺប្រើមីស៊ីល Storm Shadow ដែលផ្គត់ផ្គង់ដោយចក្រភពអង់គ្លេស និងបារាំង ហើយកើតឡើងក្នុងអំឡុងពេលនៃកិច្ចប្រជុំ ភាពជាអ្នកដឹកនាំរបស់កងទ័ពជើងទឹករុស្ស៊ី ៕