ប៉ូឡូញ ឲ្យរថក្រោះខ្លារខិន Leopard មួយទឹកៗទៅ អ៊ុយក្រែន

យោងតាមការចុះផ្សាយរបស់សារព័ត៌មាន Onet បានឲ្យដឹងថា ក្រុមហ៊ុនឧស្សាហកម្មអាវុធរបស់ប្រទេសប៉ូឡូញ PGZ បានប្រគល់រថក្រោះខ្លារខិន Leopard 2A4 មួយទឹកៗ និងជួសជុលរួចហើយនៅឯមូលដ្ឋាន Bumar-Labedy ក្នុងទីក្រុង Gliwice ចំនួន ៤ គ្រឿងទៅកាន់ប្រទេសអ៊ុយក្រែន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មាន Onet បានរាយការណ៍ទៀតថា “ចំណែករថក្រោះខ្លារខិនធុន Leopard 2A4 យ៉ាងហោចណាស់ចំនួន ៤ គ្រឿងផ្សេងទៀត ដែលរងការខូចខាតបន្តិចបន្តួច និងមធ្យមលើសមរភូមិប្រយុទ្ធនៅអ៊ុយក្រែន ក៏ត្រូវបានបញ្ជូនចូលក្នុងមូលដ្ឋាននៅទីក្រុង Gliwice ដើម្បីធ្វើការជួសជុលបន្ថែមផងដែរ មុនពេលបញ្ជូនត្រលប់ទៅឲ្យទីក្រុងកៀវវិញ” ។

ពាក់ព័ន្ធនឹងបញ្ហានេះ ក្រុមហ៊ុនឧស្សាហកម្មអាវុធ PGZ ក៏ទើបតែប្រកាសពីពេលថ្មីៗនេះដែរថា រថក្រោះដែលមូលដ្ឋាននៅទីក្រុង Gliwice ជួសជុលហើយជាច្រើនគ្រឿងត្រូវបានប្រគល់ទៅឲ្យអ៊ុយក្រែន ប៉ុន្តែមិនបានបញ្ជាក់ពីចំនួនប៉ុន្មានឲ្យពិតប្រាកនោះទេ ។

ទោះយ៉ាងណា រថក្រោះខ្លារខិន Leopard 2A4 ចំនួន ៣ គ្រឿងទៀតមិនអាចជួសជុល ឬក៏កែកុនយកទៅប្រើបានឡើយ ដោយសារតែវាឆេះខ្ទេចខ្ទីអស់ទៅហើយ បន្ទាប់ពីបើកកិនគ្រាប់មីន ឬត្រូវបានវាយប្រហារដោយគ្រាប់កាំភ្លើងធំ មីស៊ីលប្រឆាំងរថក្រោះ និងយន្តហោះគ្មានមនុស្សបើករបស់រុស្ស៊ី ។

គួរបញ្ជាក់ថា រហូតមកដល់ពេលនេះ រដ្ឋាភិបាលទីក្រុងកៀវមានរថក្រោះខ្លារខិន Leopard 2A4 នៅក្នុងដៃសរុបចំនួន ៤០ គ្រឿង ហើយភាគច្រើននៃរថក្រោះទាំងនោះត្រូវបានបញ្ជូនទៅឲ្យកងពលតូចមេកានិចទី ៣៣ នៃកងកម្លាំងប្រដាប់អាវុធអ៊ុយក្រែន ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ ណាតូ ព្រមានថា មហាអំណាចយោធាលោកខាងលិច ជិតអស់គ្រាប់ឲ្យអ៊ុយក្រែនហើយ ព្រោះប្រទេសខ្លះ ជួយឡើងអស់ពីខ្លួន