ណាតូ ព្រមានថា មហាអំណាចយោធាលោកខាងលិច ជិតអស់គ្រាប់ឲ្យអ៊ុយក្រែនហើយ ព្រោះប្រទេសខ្លះ​ ជួយឡើងអស់ពីខ្លួន

ចក្រភពអង់គ្លេស និងអង្គការណាតូបានព្រមានថា មហាអំណាចយោធាលោកខាងលិច កំពុងអស់គ្រាប់ជួយអ៊ុយក្រែន ដើម្បីការពារខ្លួនប្រឆាំងនឹងសង្គ្រាមលុកលុយរបស់រុស្ស៊ីហើយ ខណៈទីក្រុងកៀវ បាញ់ផ្លោងរាប់ពាន់គ្រាប់ជារៀងរាល់ថ្ងៃ ហើយគ្រាប់ភាគច្រើន គឺបានមកពីណាតូ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Rob Bauer មន្ត្រីយោធាជាន់ខ្ពស់បំផុតរបស់អង្គការណាតូ បានប្រាប់វេទិកាសន្តិសុខទីក្រុងវ៉ាសូវី កាលពីថ្ងៃអង្គារទី៣ខែតុលាថា “ឥឡូវធុងគ្រាប់របស់យើង មើលឃើញដល់បាតហើយ ដូច្នេះរដ្ឋាភិបាល និងឧស្សាហកម្មផលិតអាវុធ​ ​ត្រូវតែបង្កើន​ផលិតកម្ម​ក្នុង​កម្រិត​ខ្ពស់​ជាង​នេះ”។

ឧត្តមនាវីឯកខាងលើ ដែលជាប្រធានគណៈកម្មាធិការយោធារបស់ណាតូ បន្តថា ការវិនិយោគតិចតួចអស់រយៈពេលជាច្រើនទសវត្សរ៍ មានន័យថា បណ្តារដ្ឋជាសមាជិកណាតូ បានចាប់ផ្តើមផ្គត់ផ្គង់អាវុធដល់អ៊ុយក្រែន ជាមួយនឹងគ្រាប់ដែលយកចេញសឹងអស់ពីឃ្លាំង ហើយមានប្រទេសខ្លាំងអស់ពីឃ្លាំងតែម្តង។

ទន្ទឹមនោះ រដ្ឋមន្ត្រីការពារជាតិស៊ុយអែត លោក Pol Jonson និយាយថា វាជារឿងសំខាន់សម្រាប់អឺរ៉ុប ក្នុងការទទួលបានមូលដ្ឋានឧស្សាហកម្មការពារជាតិរបស់ខ្លួន ដើម្បីគាំទ្រអ៊ុយក្រែនសម្រាប់រយៈពេលវែង។

រីឯ រដ្ឋមន្ត្រីការពារជាតិចក្រភពអង់គ្លេសលោក James Heappey បានប្រាប់វេទិការដដែលនេះថា ឃ្លាំងស្តុកយោធាលោកខាងលិច មើលទៅកាន់តែស្ដើង ហើយលោកបានជំរុញឲ្យសម្ព័ន្ធមិត្តណាតូ ត្រូវចំណាយ ២% នៃទ្រព្យសម្បត្តិជាតិរបស់ពួកគេលើវិស័យការពារ ដូចដែលពួកគេបានប្តេជ្ញា។ 

ក្រសួងការពារជាតិអង់គ្លេសនិយាយថា ចាប់តាំងពីរុស្ស៊ី បើកការលុកលុយអ៊ុយក្រែនក្នុងខែកុម្ភៈឆ្នាំ២០២២មក ចក្រភពអង់គ្លេស បានផ្តល់គ្រាប់កាំភ្លើងធំជាង ៣០ម៉ឺនគ្រាប់ ហើយប្តេជ្ញាផ្តល់ឲ្យរាប់ម៉ឺនគ្រាប់បន្ថែមទៀត នៅចុងឆ្នាំនេះ។

ចំណែកក្រសួង​ការបរទេស​អាមេរិក​និយាយ​ថា ក្នុង​រយៈ​ពេល​ដូច​គ្នា​នេះ ទីក្រុងវ៉ាស៊ីនតោន ​បាន​ផ្តល់​ឲ្យ​អ៊ុយក្រែននូវគ្រាប់​កាំភ្លើង​ធំស្តង់ដារ​ណាតូ ១៥៥មិល្លីម៉ែត្រ​ជាង ២​លាន​គ្រាប់៕

ប្រែសម្រួល៖ Vann Vann

ប្រភព៖ BBC

ចុចអាន៖ បែកធ្លាយឯកសាររសើប បង្ហាញថា អាមេរិក បារម្ភកាន់តែខ្លាំង ចំពោះ អំពើពុករលួយនៅ អ៊ុយក្រែន