ក្រៅពីហាម៉ាស់ ពេលនេះ មានក្រុមមួយទៀត បាញ់មីស៊ីលស្រោចលើ អ៊ីស្រាអែល ជាការសងសឹក 

ប្រព័ន្ធផ្សព្វផ្សាយក្នុងស្រុកបានរាយការណ៍ថា ក្រុមសកម្មប្រយុទ្ធនិកាយស៊ីអ៊ីតដែលមានមូលដ្ឋាននៅលីបង់គឺ Hezbollah ក៏បានឆ្លើយតបដោយការបាញ់មីស៊ីលស្រោចលើអ៊ីស្រាអែលផងដែរ បន្ទាប់ពីមានការវាយប្រហារលើទីតាំងរបស់ខ្លួន ហើយក្រុមសកម្មប្រយុទ្ធនេះ ក៏បានបញ្ជាក់ពីការស្លាប់យុទ្ធជនរបស់ពួកគេ ៣ នាក់ផងដែរ ក្នុងការវាយប្រហាររបស់អ៊ីស្រាអែល ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមនេះបានប្រាប់ទូរទស្សន៍ al-Jadeed របស់ប្រទេសលីបង់ថា ខ្លួនបានឆ្លើយតបទៅនឹងការបាញ់ផ្លោងនៅតំបន់ Ayt al-Shaab ភាគខាងត្បូងប្រទេស ស្របតាមវិធានការរបស់ខ្លួន។

សេចក្តីថ្លែងការណ៍របស់ក្រុម Hezbollah កើតឡើងចំពេលនៃការផ្ទុះជម្លោះដ៏ធំបំផុតរវាងអ៊ីស្រាអែល និងក្រុមសកម្មប្រយុទ្ធហាម៉ាស់ប៉ាឡេស្ទីន ដែលគ្រប់គ្រងតំបន់ហ្គាហ្សាស្ទ្រីប។ 

កាល​ពី​ចុង​សប្តាហ៍ ក្រុម​ហាម៉ាស់​បាន​បើក​ការ​វាយ​ប្រហារ​ដ៏​ធំ​មួយ​លើ​អ៊ីស្រាអែល ដោយ​បាន​ធ្លាយចូល​ព្រំដែន ហើយ​វាយ​លុក​លើ​ការ​តាំង​ទីលំនៅ​របស់​អ៊ីស្រាអែល​នៅក្បែរៗ​នោះ។ ក្រុមហាម៉ាស់ ​ក៏​​បាញ់​រ៉ុកកែត​រាប់​ពាន់​គ្រាប់ ​ទៅ​លើ​អ៊ីស្រាអែល​ នា​ប៉ុន្មាន​ថ្ងៃ​កន្លង​មក​នេះផងដែរ។

យោងតាមមន្ត្រីអ៊ីស្រាអែល ចំនួនអ្នកស្លាប់ដែលជាប់ពាក់ព័ន្ធនឹងការវាយប្រហាររបស់ក្រុមហាម៉ាស់ បានកើនឡើងដល់យ៉ាងតិច៩០០នាក់ហើយ បន្ទាប់ពីអ៊ីស្រាអែល បានឆ្លើយតបដោយការវាយប្រហារតាមអាកាសដ៏ធំនៅតំបន់ហ្គាហ្សាស្ទ្រីប និងបានប្រកាសការឡោមព័ទ្ធទីនោះទាំងស្រុងផងដែរ ។

ពាក់ព័ន្ធនឹងបញ្ហានេះ រដ្ឋាភិបាលទីក្រុងវ៉ាស៊ីនតោន ក៏បានចេញការព្រមានដល់ក្រុម Hezbollah ផងដែរ ដោយជំរុញឲ្យក្រុមនេះ ចៀសវាង កុំជ្រៀតជ្រែកចូលក្នុងជម្លោះរវាងអ៊ីស្រាអែល និងក្រុមហាម៉ាស់ឲ្យសោះ៕

ប្រែសម្រួល៖ Vann Vann

ប្រភព៖ RT, Aljazeera

ចុចអាន៖ អ៊ីស្រាអែល ប្រកាសឡោមព័ទ្ធហ្គាហ្សា ទាំងស្រុង ដោយកាត់ផ្តាច់អគ្គិសនី អាហារ និងទឹក