ក្នុងពេលតែមួយ អាមេរិក ផ្ដល់ជំនួយសន្តិសុខដល់ប្រទេសកំពុងផ្ទុះសង្គ្រាម​ចំនួន ២

អ្នកនាំពាក្យក្រុមប្រឹក្សាសន្តិសុខជាតិរបស់សេតវិមាន លោក John Kirby បាននិយាយថា រដ្ឋបាលរបស់លោកប្រធានាធិបតី Joe Biden អាចនឹងស្នើសុំឲ្យសភាអនុម័តការផ្តល់មូលនិធិបន្ថែមទៀតដើម្បីជួយទាំងអ៊ីស្រាអែល និងអ៊ុយក្រែនក្នុងពេលតែមួយ ។

លោក Kirby បានលើកឡើង ក្នុងអំឡុងសន្និសីទសារព័ត៌មានមួយថា “វាពិតជាមានសារៈសំខាន់ខ្លាំងណាស់ក្នុងការបន្តជួយដល់អ៊ុយក្រែន ហើយវាក៏ចាំបាច់ផងដែរសម្រាប់ការគាំទ្រផ្នែកជំនួយសន្តិសុខបន្ថែមទៅដល់រដ្ឋាភិបាលអ៊ីស្រាអែល ដែលក៏កំពុងមានសង្គ្រាមជាមួយក្រុមហាម៉ាស់” ។

ពាក់ព័ន្ធនឹងបញ្ហានេះដែរ ​រដ្ឋលេខាធិការ​កងទ័ព​ជើងគោកអាមេរិក​លោកស្រី​ Christine Wormuth ក៏បានបញ្ជាក់ផងដែរថា ក្នុងពេលតែមួយនេះ យោធាអាមេរិកនឹងត្រូវការការគាំទ្របន្ថែមពីសភា ដើម្បីអាចផ្តល់ជំនួយសន្តិសុខដល់អ៊ុយក្រែន និងអ៊ីស្រាអែល ។

ស្របពេលជាមួយគ្នានេះ កញ្ចប់ជំនួយសន្តិសុខបន្ថែមទៀតដែលសហរដ្ឋអាមេរិកកំពុងស្នើដល់រដ្ឋសភាឲ្យអនុម័តសម្រាប់ផ្ដល់ទៅអ៊ីស្រាអែល ក៏រួមមានទាំងប្រព័ន្ធខែលការពារដែនអាកាស Iron Dome ផងដែរ ប៉ុន្តែទោះជាយ៉ាងណា ចំណាត់ការនេះអាចនឹងជាប់គាំង ដោយសារតែបច្ចុប្បន្នសហរដ្ឋអាមេរិកមិនទាន់មានប្រធានរដ្ឋសភាថ្មីនៅឡើយទេ ។

គួរបញ្ជាក់ថា រហូតមកដល់ពេលនេះការវាយប្រហារគ្នាទៅវិញទៅមករវាងក្រុមហាម៉ាស់ប៉ាឡេស្ទីន និងអ៊ីស្រាអែលដែលផ្ទុះឡើងនៅព្រឹកព្រលឹមថ្ងៃសៅរ៍ ទី៧ ខែតុលា បានសម្លាប់មនុស្សដល់ ៣,០០០ នាក់ ហើយក្នុងចំណោមអ្នកស្លាប់ទាំងនោះ ក៏មានពលរដ្ឋអាមេរិកចំនួន ១៤ នាក់ផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ អាមេរិក ថា ក្រុមនាវាផ្ទុកយន្តហោះជួយ អ៊ីស្រាអែល ជិតទៅដល់សមុទ្រ មេឌីទែរ៉ាណេភាគខាងកើតហើយ