អ៊ីរ៉ង់ ព្រមានថា អាមេរិក នឹងមិនរួចខ្លួនឡើយ បើអ៊ីស្រាអែល ប្រព្រឹត្តអំពើប្រល័យពូជសាសន៍នៅ ប៉ាឡេស្ទីន

រដ្ឋមន្ត្រីការបរទេសអ៊ីរ៉ង់លោក Hossein Amir-Abdollahian បានប្រាប់មហាសន្និបាតអង្គការសហប្រជាជាតិនៅទីក្រុងញូវយ៉ក កាលពីថ្ងៃព្រហស្បតិ៍ទី២៦ខែតុលាថា សហរដ្ឋអាមេរិកនឹងមិនរួចខ្លួនឡើយ ប្រសិនបើអំពើប្រល័យពូជសាសន៍របស់អ៊ីស្រាអែលប្រឆាំងនឹងប្រជាជនប៉ាឡេស្ទីន នៅតែបន្ត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Amir-Abdollahian បានថ្លែងនៅក្នុងសុន្ទរកថាថា “ខ្ញុំសូមនិយាយដោយត្រង់ទៅកាន់រដ្ឋបុរស និងកងកម្លាំងយោធាអាមេរិក ដែលឥឡូវនេះ កំពុងគ្រប់គ្រងការប្រល័យពូជសាសន៍នៅប៉ាឡេស្ទីនថា យើងមិនស្វាគមន៍ការពង្រីកសង្រ្គាមនៅក្នុងតំបន់ដាច់ខាត” ។

លោកព្រមានថា “​​​ប្រសិន​បើ​អំពើ​ប្រល័យ​ពូជសាសន៍​នៅ​ហ្គាហ្សា​នៅ​តែ​បន្ត​ ពួក​គេ​នឹង​មិន​រួច​ខ្លួនឡើយ។ នេះគឺជាផ្ទះរបស់យើង ហើយអាស៊ីខាងលិច គឺជាតំបន់របស់យើង។ បើមានការប៉ះពាល់ដល់សន្តិសុខផ្ទះរបស់យើង យើងមិនមានការសម្របសម្រួលជាមួយភាគីណាមួយឡើយ”។

ការព្រមាននេះកើតឡើង បន្ទាប់ពីប្រធានាធិបតីអាមេរិកលោក Joe Biden សន្យាថា ទីក្រុងវ៉ាស៊ីនតោន នឹងឈរជារៀងរហូតជាមួយអ៊ីស្រាអែល ហើយបច្ចុប្បន្នកំពុងជំរុញសភា ឲ្យអនុញ្ញាតផ្តល់កញ្ចប់ជំនួយយោធាក្នុងទំហំទឹកប្រាក់១៤ពាន់លានដុល្លារសម្រាប់រដ្ឋជ្វីហ្វ។

ទន្ទឹមនឹងនេះ សហរដ្ឋអាមេរិកបានដាក់ពង្រាយក្រុមនាវាផ្ទុកយន្តហោះចំនួនពីរគ្រឿង និងកម្លាំងកងទ័ពជើងទឹកផ្សេងទៀតក៏ដូចជាកងយន្តហោះចម្បាំង F-16, ប្រព័ន្ធការពារដែនអាកាស និងកងទ័ពចំនួន ៩០០ នាក់ផងដែរទៅកាន់តំបន់មជ្ឈិមបូព៌ា ចាប់តាំងពីក្រុមសកម្មប្រយុទ្ធហាម៉ាស់ បើកការវាយប្រហារដ៏គួរឲ្យភ្ញាក់ផ្អើលលើអ៊ីស្រាអែល កាលពីថ្ងៃទី៧ខែតុលា។

លោក Biden និងមន្ត្រីរបស់គាត់ប្រកាសថា ការដាក់ពង្រាយទាំងនេះ មានគោលបំណងរារាំងអ៊ីរ៉ង់ពីការចូលរួមក្នុងជម្លោះដោយផ្ទាល់ ឬដោយការណែនាំកងកម្លាំង ហេសបូឡា នៅក្នុងប្រទេសលីបង់។

ទោះបីជាយ៉ាងណាក៏ដោយ ទីក្រុងតេហេរ៉ង់អះអាងថា ការគាំទ្រពេញទំហឹងរបស់ទីក្រុងវ៉ាស៊ីនតោន ចំពោះអ៊ីស្រាអែល នឹងធ្វើឲ្យជម្លោះកាន់តែរីកធំ៕

ប្រែសម្រួល៖ Vann Vann

ប្រភព៖ RT

ចុចអាន៖ លោក Blinken៖ អាមេរិក មិន ចង់ ធ្វើ សង្រ្គាម ជាមួយ អ៊ីរ៉ង់ ទេ ប៉ុន្តែ នឹង ការពារ ខ្លួន