អ៊ីស្រាអែលបើកការវាយប្រហារកាន់តែធំទាំងផ្លូវអាកាស រូងក្រោមដី និងសមុទ្រ

នៅសប្ដាហ៍នេះ កងកម្លាំងអ៊ីស្រាអែលបានវាយប្រហារខ្មាន់កាំភ្លើងក្រុមហាម៉ាស់នៅខាងក្នុងបណ្តាញផ្លូវរូងក្រោមដីរបស់ពួកសកម្មប្រយុទ្ធនៅតំបន់ហ្គាហ្សា និងបន្តទម្លាក់គ្រាប់បែកតាមផ្លូវអាកាស ព្រមទាំងបើកការវាយប្រហារតាមសមុទ្រស្របពេលជាមួយគ្នាផងដែរ។

ផ្លូវរូងក្រោមដីគឺជាគោលដៅចម្បងសម្រាប់អ៊ីស្រាអែល ហើយការពង្រីកប្រតិបត្តិការជើងគោកនៅក្នុងតំបន់ហ្គាហ្សាគោលដៅគឺដើម្បីលុបបំបាត់ក្រុមហាម៉ាស់ ដែលគ្រប់គ្រងតំបន់ហ្គាហ្សា។

យោធាអ៊ីស្រាអែលបានឱ្យដឹងថា នៅថ្ងៃអង្គារនេះ IDF (កងកម្លាំងការពារអ៊ីស្រាអែល) បានវាយប្រហារគោលដៅប្រហែល ៣០០កន្លែង រួមទាំងកាំជ្រួចប្រឆាំងរថក្រោះ និងទីតាំងបាញ់រ៉ុក្កែតនៅខាងក្រោមបង្គោល ព្រមទាំងបរិវេណយោធានៅក្នុងរូងក្រោមដីដែលជាកម្មសិទ្ធិរបស់អង្គការភេរវករហាម៉ាស់ផងដែរ។

ចំពោះការវាយប្រហារនេះ ក្រុមសកម្មប្រយុទ្ធបានឆ្លើយតបជាមួយនឹងបាញ់មីស៊ីលប្រឆាំងរថក្រោះ និងការបាញ់កាំភ្លើងយន្តរបស់អ៊ីស្រាអែល។​យ៉ាងណាមិញ យោធាអ៊ីស្រាអែលបានសម្លាប់ភេរវករហាម៉ាស់រាប់សិបនាក់ និងកម្ទេចហេដ្ឋារចនាសម្ព័ន្ធភេរវកម្មជាច្រើនកន្លែងថែមទៀត។

កងកម្លាំងអ៊ីស្រាអែលក៏បានទម្លាក់គ្រាប់បែកលើតំបន់ហ្គាហ្សាពេញមួយយប់ កាលពីថ្ងៃចន្ទ នៅក្នុងការវាយប្រហារតាមផ្លូវអាកាស សមុទ្រ និងជើងគោក ដោយវាយលុកតំបន់ភាគពាយ័ព្យនៃតំបន់ឆ្នេរដែលបច្ចុប្បន្នកងទ័ពអ៊ីស្រាអែលកំពុងប្រតិបត្តិការនៅលើដី៕

ប្រែសម្រួល៖ សន្យា

ប្រភព៖ Reuters

ចុចអាន៖ ប្រតិបត្តិការជើងគោករបស់ អ៊ីស្រាអែល កម្ទេចគោលដៅក្រុមហាម៉ាស់ ៦០០ កន្លែង