ប្រតិបត្តិការជើងគោករបស់ អ៊ីស្រាអែល កម្ទេចគោលដៅក្រុមហាម៉ាស់ ៦០០ កន្លែង

កងកម្លាំងការពារជាតិអ៊ីស្រាអែល (IDF) បានវាយកម្ទេចគោលដៅយោធារបស់ក្រុមប្រដាប់អាវុធប៉ាឡេស្ទីនហាម៉ាស់ប្រមាណជាង ៦០០ កន្លែងនៅតំបន់ហ្គាហ្សាស្ទ្រីបក្នុងប្រតិបត្តិការជើងគោកទ្រង់ទ្រាយធំនារយៈពេលប៉ុន្មានថ្ងៃថ្មីៗនេះ ។

ទីភ្នាក់ងារសារព័ត៌មានយោធាអ៊ីស្រាអែលបាននិយាយក្នុងសេចក្ដីថ្លែងការណ៍មួយថា “កងកម្លាំង IDF បានបន្តពង្រីកប្រតិបត្តិការជើងគោកនៅតំបន់ហ្គាហ្សាស្ទ្រីប ហើយក្នុងរយៈពេលប៉ុន្មានថ្ងៃចុងក្រោយនេះ IDF ក៏បានបើកការវាយប្រហារទៅលើគោលដៅក្រុមហាម៉ាស់ជាង ៦០០ ទីតាំង រួមទាំងឃ្លាំងអាវុធ ទីតាំងបាញ់កាំជ្រួចមីស៊ីលប្រឆាំងរថក្រោះរាប់សិបកន្លែង ព្រមទាំងកន្លែងលាក់ខ្លួន និងទីលានប្រតិបត្តិការរបស់ក្រុមមួយនេះផងដែរ” ។

ក្នុងអំឡុងពេលប៉ះទង្គិចគ្នាជាមួយក្រុមហាម៉ាស់នៅតំបន់ហ្គាហ្សាស្ទ្រីប, កងទ័ព IDF ក៏បានសម្លាប់ក្រុមសកម្មប្រយុទ្ធរាប់សិបនាក់ ដែលបានលាក់ខ្លួននៅក្នុងអគារ និងផ្លូវរូងក្រោមដី ខណៈការវាយប្រហារទាំងនោះ កងទ័ពអ៊ីស្រាអែលបានប្រើប្រាស់យន្តហោះចម្បាំង” ។

ទីភ្នាក់ងារមួយនេះបាននិយាយទៀតថា “យន្តហោះរបស់ IDF ដឹកនាំដោយកងទ័ពជើងគោកអ៊ីស្រាអែលបានបើកការវាយប្រហារលើទីតាំងឈរជើងនៅខាងក្នុងអគារមួយកន្លែងដែលគ្រប់គ្រងដោយក្រុមហាម៉ាស់ ហើយក៏មានក្រុមប្រដាប់អាវុធមួយនេះជាង ២០ នាក់ស្ថិតនៅខាងក្នុងនោះផងដែរ” ។

ប្រតិបត្តិការជើងគោកទ្រង់ទ្រាយធំរបស់អ៊ីស្រាអែលបានកើតមានឡើងតែប៉ុន្មានថ្ងៃប៉ុណ្ណោះ បន្ទាប់ពីលោកនាយករដ្ឋមន្ត្រី Benjamin Netanyahu បានចេញបញ្ជាឲ្យកងទ័ពអ៊ីស្រាអែលចល័តចូលទៅក្នុងតំបន់ហ្គាហ្សាស្ទ្រីបដើម្បីកម្ចាត់ក្រុមហាម៉ាស់ និងរំដោះចំណាប់ខ្មាំងដែលត្រូវបានចាប់ឃុំខ្លួន អំឡុងការវាយប្រហារមកលើអ៊ីស្រាអែលកាលពីដើមខែតុលានេះ ។

គួរបញ្ជាក់ថា ភាពតានតឹងថ្មីដែលបានផ្ទុះឡើងនៅមជ្ឈិមបូព៌ាបានអូសបន្លាយពេលជិត ១ ខែទៅហើយ បន្ទាប់ពីក្រុមហាម៉ាស់បានបើកការវាយប្រហារមកលើទឹកដីអ៊ីស្រាអែលចេញពីតំបន់ហ្គាហ្សាស្ទ្រីបកាលពីព្រឹកព្រលឹមថ្ងៃទី៧ ខែតុលា ដោយបានសម្លាប់មនុស្សជាង ១,៥០០ នាក់ ដែលភាគច្រើនជាជនស៊ីវិល ។

ចំណែកនៅតំបន់ហ្គាហ្សាវិញ ក្រសួងសុខាភិបាលដែលគ្រប់គ្រងដោយក្រុមហាម៉ាស់បាននិយាយថា ការឆ្លើយតបរបស់អ៊ីស្រាអែលបានសម្លាប់មនុស្សជាង ៨,៣០០ នាក់ និង ២១,០៤៨ នាក់រងរបួស ខណៈប្រជាជន ២.៣ លាននាក់កំពុងខ្វះជំនួយមនុស្សធម៌ ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ លោក Netanyahu ថា ទាហាន អ៊ីស្រាអែល ចូលទៅតំបន់ហ្គាហ្សាដើម្បីកម្ចាត់​ក្រុមហាម៉ាស់ និងរំដោះចំណាប់ខ្មាំង