រ៉ុកកែតជាច្រើនគ្រាប់បាញ់រះចេញពីតំបន់ហ្គាហ្សាហោះទៅកាន់ទីក្រុង អ៊ីស្រាអែល

ប៉ូលិសអ៊ីស្រាអែលបាននិយាយកាលពីថ្ងៃអាទិត្យថា រ៉ុកកែតជាច្រើនគ្រាប់ត្រូវបានបាញ់រះចេញពីតំបន់ហ្គាហ្សាស្ទ្រីបហោះឆ្ពោះទៅកាន់ទីក្រុង Tel Aviv របស់ប្រទេសអ៊ីស្រាអែល និងតំបន់ជុំវិញនោះផងដែរ ។

ទន្ទឹមនោះ កាសែត Yedioth Ahronoth ក៏បានរាយការណ៍ផងដែរថា រ៉ុកកែតមួយគ្រាប់បានហោះធ្លាក់ចំតំបន់ទូលាយមួយកន្លែងក្នុងទីក្រុង Rishon Lezion ដែលមានទីតាំងក្បែរទីក្រុង Tel Aviv ខណៈសំឡេង​ស៊ីរ៉ែន​រោទិ៍​ប្រកាសអាសន្នបាន​បន្លឺ​ឡើង​ក្នុង​ទីក្រុង និង​តំបន់​ជុំវិញនោះដូចគ្នា ។

ពាក់ព័ន្ធនឹងបញ្ហានេះដែរ កងពលតូច Al-Qassam Brigades របស់ប៉ាឡេស្ទីនបាននិយាយថា ខ្លួនបានកំណត់គោលដៅលើទីក្រុង Tel Aviv ជាការឆ្លើយតបទៅនឹងការទម្លាក់គ្រាប់បែកលើមន្ទីរពេទ្យ និងសម្លាប់ជនស៊ីវិលនៅតំបន់ហ្គាហ្សាស្ទ្រីប ។

បើយោងតាមប៉ុស្តិ៍ទូរទស្សន៍លេខ ១២ របស់អ៊ីស្រាអែលបានឲ្យដឹងថា ក្នុងការវាយប្រហារនេះដែរ ផ្ទះមួយខ្នងនៅក្នុងតំបន់តាំងទីលំនៅ Kiryat Shmona ភាគខាងជើងប្រទេសអ៊ីស្រាអែលរងការខូចខាត និងឆេះខ្ទេចគ្មានសល់ បន្ទាប់ពីរ៉ុកកែតប្រមាណ ១០ គ្រាប់បាញ់រះពីភាគខាងត្បូងប្រទេសលីបង់ ។

ស្របពេលជាមួយគ្នានេះ ក្រុមហេសបូឡារបស់ប្រទេសលីបង់ក៏បានបញ្ជាក់ដែរថា គ្រាប់រ៉ុកកែតរបស់ខ្លួនបានវាយប្រហារទៅលើទីក្រុង Kiryat Shmona ដើម្បីជាការសងសឹកចំពោះការសម្លាប់កុមារ ៣ នាក់ និងស្ត្រីម្នាក់នៅភាគខាងត្បូងប្រទេសលីបង់ ។

គួរបញ្ជាក់ថា ការបាញ់រះគ្រាប់រ៉ុកកែតទៅកាន់ទីក្រុង Tel Aviv កើតមានឡើង បន្ទាប់ពីអ៊ីស្រាអែលចាត់ទុកការវាយប្រហារមិនប្រណីដៃរបស់ខ្លួនទៅលើមន្ទីរពេទ្យ និងកន្លែងក្បែរៗនោះនៅក្នុងតំបន់ហ្គាហ្សាស្ទ្រីប គឺជារឿងត្រឹមត្រូវ ដោយសារតែក្រុមហាម៉ាសមានទីតាំង និងជ្រកនៅក្រោមអគារទាំងនោះ ទោះបីមានការបដិសេធពីសំណាក់ក្រុមប្រដាប់អាវុធមួយនេះក៏ដោយ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ អ៊ីស្រាអែល ថា ការវាយប្រហារលើមន្ទីរពេទ្យនៅតំបន់ហ្គាហ្សា គឺជារឿងត្រឹមត្រូវ