Tesla នឹងប្តឹងអ្នកលក់រថយន្តអគ្គិសនី Cybertruck បន្តឲ្យអ្នកផ្សេង ក្រោយទិញបាន ១ ឆ្នាំដំបូង

បើយោងតាមលក្ខខណ្ឌរបស់ក្រុមហ៊ុន Tesla បានឲ្យដឹងថា ក្រុមហ៊ុនមានសិទ្ធិប្តឹងទារសំណងចំនួន ៥០ ០០០ ដុល្លារលើអ្នកលក់រថយន្តអគ្គិសនី Cybertruck បន្តទៅឲ្យជនទី៣ ក្រោយទិញរថយន្តមួយនេះក្នុងរយៈពេល ១ ឆ្នាំដំបូង ។

ប៉ុន្តែទោះជាយ៉ាងណា ក្នុងករណីអតិថិជនមានហេតុផលសមរម្យក្នុងការដាក់លក់បន្តរថយន្តអគ្គិសនី Cybertruck ក្រុមហ៊ុន Tesla អាចនឹងពិចារណាទិញវិញ ឬអនុញ្ញាតឲ្យភាគីទីបីទិញបានដោយគ្មានបញ្ហាប្ដឹងផ្ដល់ ។

ពាក់ព័ន្ធបញ្ហានេះដែរ ក្រុមហ៊ុន Fast Company បានរាយការណ៍ថា ចំពោះមុខងារបើកបរដោយស្វ័យប្រវត្តិ ឬ Full Self-Driving ដែលមានតម្លៃ ១៩៩ ដុល្លារក្នុងមួយខែ មិនអាចផ្ទេរទៅឲ្យម្ចាស់ថ្មីបាននោះទេ ដូច្នេះចំណុចនេះបណ្ដាលឲ្យការលក់ឡានបន្តពិបាកបន្តិច ។

ត្រឡប់ទៅកាន់ឆ្នាំ ២០១៩ វិញ ក្រុមហ៊ុន Tesla ធ្លាប់បាននិយាយថា រថយន្តអគ្គិសនី Cybertruck គឺមានតម្លៃចាប់ពី ៣៩,៩០០ ដុល្លារប៉ុណ្ណោះ ប៉ុន្តែទោះជាយ៉ាងណា តម្លៃនឹងឡើងចុះតាមថ្លៃឧបករណ៍តម្លើង ទើបពេលនេះវាមានតម្លៃដល់ខ្ទង់ ៥០,០០០ ដុល្លារ ។

កាលពីដើមឆ្នាំ ២០២៣ មហាសេដ្ឋី Elon Musk បាននិយាយថា ក្រុមហ៊ុន Tesla អាចផលិតរថយន្តអគ្គិសនីបានរហូតដល់ ២៥ ម៉ឺនគ្រឿងឯណោះត្រឹមឆ្នាំ ២០២៥ ហើយក្រុមហ៊ុននឹងចំណាយពេលពី ១ ឆ្នាំទៅ ១៨ ខែ មុនពេលអាចកើបលុយបានពីរថយន្តអគ្គិសនីមួយនេះ ៕

ប្រែសម្រួល៖ វារី

ប្រភព៖ Insider

ចុចអាន៖ Tesla គ្រោងផលិតឡានអគ្គិសនី Cybertruck ឲ្យបាន ២៥ ម៉ឺនគ្រឿងក្នុងមួយ​ឆ្នាំ