អូស្រ្តាលី ដោះលែងប៉ូលិសម៉ាឡេស៊ីដែលជាប់ឃុំពីបទឃាតកម្ម ក្រោយដាក់គុកជិត ៩ឆ្នាំ

ប្រភពរដ្ឋាភិបាល និយាយនៅថ្ងៃចន្ទ ទី១៣ វិច្ឆិកា ថា ប៉ូលិសម៉ាឡេស៊ីម្នាក់ដែលត្រូវបានកាត់ទោសពីបទឃាតកម្មលើស្ត្រីជនជាតិម៉ុងហ្គោលីម្នាក់បានរួចផុតពីការឃុំឃាំងនៅប្រទេសអូស្ត្រាលី ខណៈជនជាប់ចោទរូបនេះបានឃុំខ្លួនអស់រយៈពេលជិត ៩ឆ្នាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Sirul Azhar Umar និងមន្ត្រីប៉ូលិសម្នាក់ទៀត លោក Azilah Hadri ត្រូវបានកាត់ទោសប្រហារជីវិត បន្ទាប់ពីរកឃើញថាមានពិរុទ្ធភាពនៅក្នុងប្រទេសម៉ាឡេស៊ី ពីបទឃាតកម្មលើអ្នកស្រី Altantuya Shaariibuu អាយុ ២៨ឆ្នាំ ដែលជាអ្នកបកប្រែរបស់អតីតនាយករដ្ឋមន្ត្រី Najib Razak ។

លោក Sirul ត្រូវបានចាប់ខ្លួនតាមសេចក្តីជូនដំណឹងរបស់ Interpol ហើយត្រូវបានឃុំខ្លួននៅក្នុងមជ្ឈមណ្ឌលឃុំឃាំងអន្តោប្រវេសន៍អូស្ត្រាលី ចាប់តាំងពីខែមករា ឆ្នាំ២០១៥ បន្ទាប់ពីបានភៀសខ្លួនចេញពីប្រទេសម៉ាឡេស៊ី។

ការដោះលែងអតីតប៉ូលិសរូបនេះត្រូវធ្វើឡើងតែប៉ុន្មានថ្ងៃប៉ុណ្ណោះ បន្ទាប់ពីតុលាការជាន់ខ្ពស់របស់ប្រទេសអូស្ត្រាលី បានចេញសេចក្ដីថ្លែងការណ៍ហាមឃាត់ការឃុំខ្លួនជនអន្តោប្រវេសន៍ដោយគ្មានកំណត់ ដែលនាំទៅដល់ការដោះលែងអ្នកស្វែងរកសិទ្ធិជ្រកកោនរាប់សិបនាក់។

មន្ត្រីប៉ូលិសកំពូលរបស់ប្រទេសម៉ាឡេស៊ី លោក Razarudin Husain បានបញ្ជាក់ព័ត៌មានអំពីការដោះលែងលោក Sirul ពីការឃុំឃាំងអូស្ត្រាលី ហើយបាននិយាយថា ប៉ូលិសម៉ាឡេស៊ីនឹងពិភាក្សាជាមួយអគ្គមេធាវី និងតុលាការអំពីលទ្ធភាពនៃការស្វែងរកការធ្វើបត្យាប័ន។

កាលពីខែមេសា ឆ្នាំ២០២៣ កន្លងទៅ ប្រទេសម៉ាឡេស៊ី បានអនុម័តកំណែទម្រង់ផ្លូវច្បាប់ដោយលុបចោលការកាត់ទោសប្រហារជីវិត។

សូមបញ្ជាក់ថា ឃាតកម្មទៅលើអ្នកស្រី Shaariibuu បានកើតឡើងជាមួយនឹងរឿងអាស្រូវនយោបាយអស់ជាច្រើនឆ្នាំ។ នាង​ត្រូវ​បាន​គេ​សម្លាប់​នៅ​ក្នុង​ព្រៃ​មួយ​នៅ​ជាយ​រដ្ឋធានី​របស់​ប្រទេស​ម៉ាឡេស៊ី ​ក្នុង​ឆ្នាំ ២០០៦។ ប៉ុន្តែកាលណោះ គេមិនអាចកំណត់អត្តសញ្ញាណជនដៃដល់នោះទេ ខណៈនោះលោក Sirul កំពុងបម្រើការជាសមាជិកសន្តិសុខផ្ទាល់ខ្លួនរបស់អតីតនាយករដ្ឋមន្ត្រី Najib Razak ៕

ប្រែសម្រួល៖ សន្យា

ប្រភព៖ Reuters

ចុចអាន៖ បញ្ហាធំមួយ នឹងត្រូវលើកយកមកពិភាក្សា ក្នុងជំនួបកំពូល បៃដិន-ស៊ី

ចុចអាន៖ ថៃ អនុញ្ញាតឲ្យប៉ូលិសចិន មកល្បាតលើដីរបស់ខ្លួន ដើម្បីបង្កើនទំនុកចិត្តអ្នកទេសចរ