រឿងអាស្រូវពុករលួយនៅ ជប៉ុន ឈានដល់ការដកតំណែងរដ្ឋមន្ត្រីកំពូលៗ និងអ្នកនាំពាក្យរដ្ឋាភិបាល

សភាជាន់ទាបរបស់ប្រទេសជប៉ុនបានបោះឆ្នោតលែងផ្ដល់ទំនុកចិត្តលើលោក Matsuno Hirokazu ធ្វើជាអ្នកនាំពាក្យរដ្ឋាភិបាលទៀតហើយ ដោយសារតែរឿងអាស្រូវពុករលួយលើលុយជាង ១០០ លានយ៉េន (៦៩ ម៉ឺនដុល្លារ) ដែលបានប្រើប្រាស់ក្នុងយុទ្ធនាការ និងច្បាប់បោះឆ្នោត ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Matsuno ស្ថិតក្នុងចំណោមសមាជិកសភាជាច្រើនរូបដែលជាប់ពាក់ព័ន្ធក្នុងរឿងអាស្រូវមិនបានរាយការណ៍អំពីប្រាក់រាប់ម៉ឺនដុល្លារ ដែលទទួលបានក្នុងកិច្ចខិតខំប្រឹងប្រែងរៃអង្គាសថវិកានៅក្នុងបក្ខពួកគណបក្សសម្ព័ន្ធប្រជាធិបតេត្យសេរី (LDP) ។

ទន្ទឹមនោះ រឿងនេះក៏កំពុងធ្វើឲ្យលោកនាយករដ្ឋមន្ត្រី Fumio Kishida ឈឺក្បាលខ្លាំងផងដែរ ហើយកំពុងពិចារណារុះរើគណៈរដ្ឋមន្ត្រីទាំងស្រុង រួមទាំងការដកតំណែងថ្នាក់ដឹកនាំក្នុងជួររដ្ឋាភិបាល និងគណបក្ស រាប់ចាប់ពីតំណែងតូចតាច ទៅដល់សមាជិកទាំងអស់នៃបក្សពួកដែលធ្លាប់ដឹកនាំដោយអតីតនាយករដ្ឋមន្ត្រី Shinzo Abe ។

នៅពេលនេះ សមាជិកនៃបក្សពួកចំនួន ១៥ រូបដែលស្ថិតនៅក្នុងជួររដ្ឋាភិបាល ក្នុងនោះមានរដ្ឋមន្ត្រីចំនួន ៤ នាក់ អនុរដ្ឋមន្ត្រីចំនួន ៥ នាក់ និងមន្ត្រីនយោបាយចំនួន ៦ នាក់ ខណៈដែល ៣ នាក់ទៀតជានាយកប្រតិបត្តិរបស់បក្ស LDP សុទ្ធសឹងតែក្នុងចំណោមអ្នកដែលនឹងត្រូវដកតំណែង ។

គួរបញ្ជាក់ថា រឿងអាស្រូវពុករលួយផ្នែកហិរញ្ញវត្ថុនេះកើតមានឡើង ស្របពេលដែលជប៉ុនត្រៀមនឹងរៀបចំកិច្ចប្រជុំកំពូលពិសេសជាមួយសមាជិកអាស៊ារយៈពេល ៣ ថ្ងៃ ចាប់ពីថ្ងៃទី១៦ ដល់ថ្ងៃទី១៨ ខែធ្នូក្នុងទីក្រុងតូក្យូ ខណៈគណបក្ស LDP ដែលកាន់អំណាចស្ទើរតែគ្រប់យុគសម័យក្រោយសង្គ្រាមរបស់ប្រទេសជប៉ុន ក៏នឹងត្រូវរៀបចំការបោះឆ្នោតជ្រើសរើសមេដឹកនាំថ្មីនៅខែកញ្ញា និងការបោះឆ្នោតសកលនៅខែតុលា ឆ្នាំ២០២៥ ៕

ប្រែសម្រួលដោយ ៖ ជីវ័ន្ត

ប្រភព ៖ NHK / Japan Times

ចុចអាន ៖ អតីតទាហាន ជប៉ុន ៣ នាក់ជាប់ទោសពីបទរំលោភផ្លូវភេទមិត្តរួមការងារ