រដ្ឋសភាអាមេរិក បោះឆ្នោត បើកការស៊ើបអង្កេត ដើម្បីប្តឹងលោក បៃដិន ពាក់ព័ន្ធអំពើពុករលួយ

នៅទីបំផុត សភាតំណាងរាស្រ្តសហរដ្ឋអាមេរិកដែលគ្រប់គ្រងដោយគណបក្សសាធារណរដ្ឋ បានបោះឆ្នោតបើកដំណើរការស៊ើបអង្កេត ដើម្បីប្តឹងចោទប្រកាន់លោក ចូ បៃដិន ពាក់ព័ន្ធអំពើពុករលួយនិងការប្រើប្រាស់អំណាចប្រធានាធិបតី។ សេចក្តីសម្រេចកាលពីថ្ងៃពុធទី១៣ខែធ្នូមួយនេះ ត្រូវបានអនុម័តដោយសំឡេង ២២១ ទល់នឹង២១២។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រាល់អ្នកសាធារណរដ្ឋសុទ្ធតែបានបោះឆ្នោតគាំទ្រការស៊ើបអង្កេត ខណៈអ្នកប្រជាធិបតេយ្យទាំងអស់បានបោះឆ្នោតប្រឆាំង ប៉ុន្តែមាន​អ្នក​ប្រជាធិបតេយ្យ​ម្នាក់ ​អវត្តមាន។

មិនបង្អស់យូរ លោក បៃដិន ក៏ចេញសេចក្តីថ្លែងការណ៍មួយទាក់ទងនឹងការស៊ើបអង្កេតនេះ ដោយនិយាយថា សមាជិករដ្ឋសភាមកពីគណបក្សសាធារណរដ្ឋ កំពុងខ្ជះខ្ជាយពេលវេលាលើភាពមិនច្បាស់លាស់ខាងនយោបាយ ទាំងដែលគ្មានការពិត។

អ្នកសាធារណរដ្ឋ បានចាប់ផ្តើមស៊ើបអង្កេតការប្រព្រឹត្តខុសដោយលោក បៃដិន តាំងតែពីគណបក្សបានឡើងគ្រប់គ្រងរដ្ឋសភាសាជាថ្មី បន្ទាប់ពីការបោះឆ្នោតពាក់កណ្តាលអាណត្តិឆ្នាំ២០២០មកម្ល៉េះ ដោយមានគណៈកម្មាធិការត្រួតពិនិត្យសភា និងគណៈកម្មាធិការតុលាការសភា ជាអ្នកដឹកនាំការស៊ើបអង្កេត។

អតីតប្រធានរដ្ឋសភា លោក Kevin McCarthy បានប្រកាសពីការស៊ើបអង្កេតដើម្បីប្តឹងចោទប្រកាន់នៅក្នុងខែកញ្ញា ដោយអះអាងថា គណៈកម្មាធិការបានរកឃើញរឿងរ៉ាវនៃអំពើពុករលួយក្នុងរង្វង់គ្រួសារលោក បៃដិន។

ដោយលើកឡើងពីសក្ខីកម្មសាក្សី និងឯកសារដែលយកបានពីកុំព្យូទ័រយួរដៃរបស់កូនប្រុសលោក បៃដិន ឈ្មោះ ហាន់ធើ, គណបក្សសាធារណរដ្ឋ បានចោទប្រកាន់ថា គ្រួសារលោក បៃដិន បានទទួលប្រាក់ប្រហែល២៤លានដុល្លារក្នុងការទូទាត់តាមរយៈក្រុមហ៊ុនក្លែងក្លាយ ពីឥស្សរជននិងអ្នកនយោបាយនៅក្នុងប្រទេសចិន កាហ្សាក់ស្ថាន រូម៉ានី រុស្ស៊ី និងអ៊ុយក្រែន ពេលដែលលោក បៃដិន កាន់តំណែងជាអនុប្រធានាធិបតី។ ប្រតិបត្តិការផ្ទេរប្រាក់ចំនួន១៥០ក្នុងចំណោមប្រតិបត្តិការទាំងអស់ ត្រូវបានក្រសួងរតនាគារសហរដ្ឋអាមេរិក ចាត់ទុកថា “គួរឲ្យសង្ស័យ”។

លោក ហាន់ធើ បៃដិន បានដើរតួយ៉ាងសំខាន់ក្នុងរឿងនេះ ដោយកូនប្រុសរបស់ប្រធានាធិបតី ត្រូវបានចោទប្រកាន់ពីបទធ្វើកិច្ចព្រមព្រៀងពាណិជ្ជកម្មជាមួយអតិថិជនបរទេសជាច្រើន ជាថ្នូរនឹងការចូលទៅទាក់ទងជាមួយឪពុកគាត់។ អតីតដៃគូអាជីវកម្មរបស់លោក ហាន់ធើ គឺលោក Devon Archer បានប្រាប់គណៈកម្មាធិការត្រួតពិនិត្យកាលពីខែកក្កដាថា មុខតំណែងរបស់លោក ហាន់ធើ នៅក្រុមប្រឹក្សាភិបាលនៃក្រុមហ៊ុន Burisma ដែលជាក្រុមហ៊ុនថាមពលអ៊ុយក្រែន បាននាំឲ្យគាត់ហ៊ានធានាថា ក្រុមហ៊ុននេះនឹងមានឥទ្ធិពលលើគោលនយោបាយរបស់សហរដ្ឋអាមេរិក។

ទោះបីជាយ៉ាងណាក៏ដោយ លោក បៃដិន បានបដិសេធរាល់ការចោទប្រកាន់ទាំងអស់ ហើយអះអាងថា ខ្លួនមិនដឹងរឿងអ្វីទេ៕

ប្រែសម្រួល៖ Vann Vann

ប្រភព៖ RT

ចុចអាន៖ លោក ចូ បៃដិន ប្រកាសផ្តល់ជំនួយ ២០០លាន ដុល្លារ ទៀត ឲ្យអ៊ុយក្រែន