ក្រុមហ៊ុននាំចូលសាច់ជ្រូកប្ដឹងរដ្ឋាភិបាល ថៃ ទារសំណងជាង ១៣ ម៉ឺនដុល្លារ ជុំវិញការស៊ើបអង្កេតការរត់ពន្ធ

ក្រុមហ៊ុននាំចូលសាច់ជ្រូកចំនួន ២ របស់ប្រទេសថៃកំពុងប្តឹងនាយកដ្ឋានអភិវឌ្ឍន៍បសុសត្វថៃ (DLD) ទាមទារសំណងចំនួន ៤.៧៣ លានបាត (ជាង ១៣ ម៉ឺនដុល្លារ) សម្រាប់បង់ថ្លៃខូចខាត ដោយសារតែនាយកដ្ឋានមួយនេះនៅតែបន្តស៊ើបអង្កេតលើការរត់ពន្ធសាច់ជ្រូក ។

នាយកដ្ឋានអភិវឌ្ឍន៍បសុសត្វថៃ (DLD) កំពុងធ្វើការជាមួយនាយកដ្ឋានស៊ើបអង្កេតពិសេស (DSI) និងការិយាល័យប្រឆាំងការលាងលុយកខ្វក់ (AMLO) លើសំណុំរឿងព្រហ្មទណ្ឌ និងរដ្ឋប្បវេណីជុំវិញកុងតឺន័រដឹកជញ្ជូនសាច់ជ្រូកចំនួន ៤១ កុងតឺន័រ ដែលចាប់បាននៅកំពង់ផែ Laem Chabang ។

ក្រុមហ៊ុននាំចូលសាច់ជ្រូកទាំងពីរដែលដាក់ពាក្យប្ដឹងនាយកដ្ឋាន DLD ទៅកាន់តុលាការរដ្ឋបាលកណ្ដាល និងកំពុងត្រូវបានស៊ើបអង្កេតដោយនាយកដ្ឋាន DSI រួមមានក្រុមហ៊ុន Sikhantin Trading និង Smile Top K Enterprise ខណៈក្រុមហ៊ុនទាំងពីរសុទ្ធសឹងតែរងការចោទប្រកាន់ពីបទល្មើសច្បាប់គយ និងច្បាប់រោគរាតត្បាតសត្វ ។

ពាក់ព័ន្ធនឹងបញ្ហានេះដែរ នាយកក្រុមហ៊ុន Sikhantin Trading និង Smile Top K Enterprise លោក Boriboon Laorpaksin ក៏បានចេញមក​បដិសេធចំពោះ​ការ​ចោទ​ប្រកាន់​នេះផងដែរ នៅពេល​ត្រូវ​បាន​សាកសួរ​ដោយនាយកដ្ឋាន DSI កាល​ពី​ដើម​ខែ​នេះ ។

បណ្ដឹងរបស់លោក Boriboon បានអះអាងថា ការរឹបអូសយកសាច់ជ្រូកចំនួន ៤១ កុងតឺន័ររបស់នាយកដ្ឋាន DLD ដែលមានតម្លៃ ៧ លានដុល្លារ គឺខុសច្បាប់ ដោយសារក្រុមហ៊ុនរបស់លោកបានគោរពតាមបទប្បញ្ញត្តិរបស់គយរួចរាល់អស់ហើយ ហើយក្រុមហ៊ុនទាមទារសំណងជាង ១៣ ម៉ឺនដុល្លារ រួមទាំងការប្រាក់ ៣ ភាគរយក្នុងមួយឆ្នាំ ។

ជាការឆ្លើយតបមន្ត្រី DSI បានលើកឡើងថា ក្រុមហ៊ុនរត់ពន្ធមួយនេះបានដឹកជញ្ជូនសាច់ជ្រូកខុសច្បាប់ចំនួន ២,៣៨៥ កុងតឺន័រ ដែលមានតម្លៃប្រហែល ៨៥ លានដុល្លារ ចាប់តាំងពីឆ្នាំ ២០២០ មក ហើយការបង្ក្រាបឧស្សាហកម្មសាច់ជ្រូកខុសច្បាប់នេះ គឺដោយសារតែការការពារហានិភ័យនៃជំងឺរាតត្បាតនៅក្នុងប្រទេស ៕

ប្រែសម្រួលដោយ ៖ ជីវ័ន្ត

ប្រភព ៖ The Nation Thailand

ចុចអាន ៖ មេធំក្រុមហ៊ុន ណាហ្គា ទទួលមរណភាពក្នុងវ័យ ៧៥ ឆ្នាំ ខណៈកូនប្រុសនឹង ឡើងកាន់តំណែងជំនួសឪពុក