ក្រុមហ៊ុន Honda ប្រមូលរថយន្តជាង ៤ លានគ្រឿងមកវិញ ដោយសារប្រព័ន្ធសាំង

ក្រុមហ៊ុន Honda របស់ប្រទេសជប៉ុនបានប្រមូលរថយន្ត​របស់ខ្លួននៅជុំវិញពិភពលោក​ចំនួន ៤.៥ លានគ្រឿងត្រឡប់មកវិញ​ ដោយសារតែមានហានិភ័យនៃការគាំងម៉ាស៊ីនបូមសាំង ​។

ការប្រមូលមកវិញនេះ រួមមានរថយន្តចំនួន ២.៥៤ លានគ្រឿងនៅក្នុងទឹកដីនៃសហរដ្ឋអាមេរិក ខណៈនៅឆ្នាំ ២០២១ ក្រុមហ៊ុនបានប្រមូលជាង ៦០ ម៉ឺនគ្រឿង និងឆ្នាំ ២០២០ មានចំនួនជាង ១៣ ម៉ឺនគ្រឿង​ដែលសុទ្ធសឹងតែមានបញ្ហា​ម៉ាស៊ីនបូមសាំងដូចគ្នា ។

ស្របពេលជាមួយគ្នានេះ ក្រុមហ៊ុន Honda ក៏បានចាប់ផ្តើមការប្រមូលរថយន្តមកវិញផងដែរនៅក្នុងប្រទេសចិន និងជប៉ុនកាលពីដើមខែធ្នូនេះ ជុំវិញបញ្ហាដូចគ្នា ។

ទន្ទឹមនោះ ការប្រមូលមកវិញនេះ រួមមានម៉ូដែលរថយន្តជាច្រើនដូចជា Honda Accord, Civic, CR-V, HR-V, Insight, Ridgeline, Odyssey, Passport និងម៉ូដែល Acura ផ្សេងៗទៀតរួមទាំង ILX, MDX, RDX, RLX, TLX និង NSX ។

គួរបញ្ជាក់ថា ការប្រកាសនេះធ្វើឡើងមួយថ្ងៃប៉ុណ្ណោះ បន្ទាប់ពីក្រុមហ៊ុន Honda បានប្រមូលរថយន្តកូនកាត់ CR-V ប្រហែល ១០៦,០៣០ គ្រឿង ដោយសារហានិភ័យនៃការផ្ទុះឆេះ ដែលបង្កឡើងដោយខ្សែអាគុយឡើងកំដៅ ៕

ប្រែសម្រួល៖ នាង រតនៈ

ប្រភព៖ New York Post