កាសែត Nikkei៖ ​Nissan ផ្អាកការចរចាច្របាច់បញ្ចូលគ្នាជាមួយ​ Honda

កាសែតជប៉ុន Nikkei បានរាយការណ៍ថា ក្រុមហ៊ុនផលិតរថយន្តជប៉ុន ​Nissan ​បាន​ផ្អាក​ការចរចាអំពីការច្របាច់បញ្ចូលគ្នាជាមួយ​ក្រុមហ៊ុនផលិតរថយន្ត​ Honda ។ នេះបើតាម​ការ​ចុះ​ផ្សាយ​របស់​បន្តរបស់​ទីភ្នាក់ងារសារព័ត៌មាន​រ៉យទ័រ​។

កាលពីឆ្នាំ​មុន Honda ដែលជាក្រុមហ៊ុនផលិតរថយន្តធំទី២របស់​ជប៉ុន និង Nissan ដែលជាក្រុមហ៊ុនធំ​បន្ទាប់ ​បាន​និយាយថា​ ពួកគេកំពុងចរចា​ដើម្បីច្របាច់បញ្ចូលគ្នា ដោយ​បង្កើតជាក្រុមហ៊ុនផលិតរថយន្ត​ធំបំផុតទី៣របស់ពិភពលោក (ដោយគិតលើការលក់រថយន្ត) ចំពេល​មាន​ការប្រកួតប្រជែងកាន់​តែ​ខ្លាំងពីក្រុមហ៊ុនផលិតរថយន្ត​ចិន​។ យ៉ាងណាមិញ ​ប្រភព២រូប​ដែល​​ដឹង​ពី​​បញ្ហា​នេះ​ បានសុំអះអាងជាអនាមិកថា ការ​ចរចា​មាន​ភាព​ស្មុគស្មាញ​ដោយសារ​ការ​ខ្វែងគំនិត​គ្នា​រវាង​ភាគី​ទាំង​សងខាង។ ​

ប្រភព​ម្នាក់បាន​និយាយថា​ ក្រុមហ៊ុន Honda ចង់ឱ្យ​ Nissan ​ក្លាយជាក្រុមហ៊ុនបុត្រសម្ព័ន្ធរបស់ខ្លួន ជា​អ្វីដែល​ខុស​ពី​ការចរចាគ្នាពីដំបូង ដែល​ស្នើឱ្យ​មាន​ភាព​ស្មើគ្នាលើ​ការច្របាច់បញ្ចូល។ ​

យ៉ាងណាមិញ​ បើ​តាម​រ៉យទ័រ​ អ្នកនាំពាក្យ Nissan បាន​និយាយថា អ្វីដែល​កាសែត Nikkei រាយការណ៍មិន​ផ្អែកលើ​ព័ត៌មាន​របស់​ក្រុមហ៊ុននោះទេ ខណៈក្រុមហ៊ុនគ្រោងបញ្ចប់ការសម្រេចចិត្តរបស់​ទិសដៅអនាគតរបស់​ខ្លួននៅពាក់កណ្ដាល​កុម្ភៈ។

ចំណែកឯអ្នកនាំពាក្យរបស់​​ Honda វិញ បាននិយាយថា ក្រុមហ៊ុនមិនបានទទួល​ដំណឹងអ្វីពី​​ក្រុមហ៊ុន Nissan ​អំពីការសម្រេចចិត្តដកខ្លួនចេញពី​ការចរចាច្របាច់បញ្ចូលគ្នានោះទេ៕