ក្រុមហ៊ុន ជប៉ុន វិនិយោគជាង ៤ ពាន់លានដុល្លារទៀតដើម្បីផលិតរថយន្តអគ្គិសនីនៅ ថៃ

ក្រុមហ៊ុនផលិតរថយន្តជប៉ុនចំនួន ៤ បានបន្ថែមការវិនិយោគចំនួនជាង ៤.៣៣ ពាន់លានដុល្លារទៀតក្នុងរយៈពេល ៥ ឆ្នាំដើម្បីគាំទ្រប្រទេសថៃឲ្យផ្លាស់ប្តូរទៅកាន់ពិភពរថយន្តអគ្គិសនី ។

ក្រុមហ៊ុនជប៉ុនទាំង ៤ នោះរួមមាន ក្រុមហ៊ុន Toyota និង Honda បានវិនិយោគក្នុងម្នាក់ជាង ១.៤៤ ពាន់លានដុល្លារ ខណៈក្រុមហ៊ុន Isuzu វិនិយោគជាង ៨៦៦ លានដុល្លារ និងក្រុមហ៊ុន Mitsubishi វិនិយោគចំនួន ៥៧៧ លានដុល្លារ ។

តាមរយៈការបញ្ជាក់ពីសំណាក់អ្នកនាំពាក្យថៃបានឲ្យដឹងថា ការវិនិយោគនេះនឹងគាំទ្រដល់ការផ្លាស់ប្តូររបស់ថៃ ទៅកាន់ពិភពរថយន្តអគ្គិសនី ដែលរួមបញ្ចូលទាំងការផលិតបន្ថែមនូវប្រភេទរថយន្ត​ Pickup អគ្គិសនីផងដែរ ។

​​ថៃមានគោលបំណងផលិតរថយន្តប្រភេទនេះឲ្យបាន ១ ​ភាគ ៣​ នៃរថយន្ត​ប្រចាំឆ្នាំរបស់ខ្លួនចំនួន ២.៥ លានគ្រឿង ដើម្បី​ប្រែក្លាយប្រទេសនេះទៅជាប្រទេសផលិតរថយន្តអគ្គិសនីត្រឹមក្នុងឆ្នាំ ២០៣០ ក៏ដូចជាដើម្បីជំរុញមានការបង្កើតរោងចក្រ​ផលិត​ផងដែរ ។

ចំពោះការកាត់បន្ថយពន្ធ និងការឧបត្ថម្ភធនដែលចេញដោយរដ្ឋាភិបាល បានទាក់ទាញក្រុមហ៊ុនផលិតរថយន្តចិនរួចហើយ រួមទាំងក្រុមហ៊ុន BYD និងក្រុមហ៊ុន Great Wall Motor ដែលបានប្តេជ្ញាចិត្តក្នុងការវិនិយោគចំនួន ១.៤៤ ពាន់លានដុល្លារក្នុងរោងចក្រផលិតនៅប្រទេសថៃ ៕

ប្រែសម្រួល៖ នាង រតនៈ

ប្រភព៖ Bangkok Post