ទើបចូលឆ្នាំ២០២៤ ជប៉ុន ជួបគ្រោះរញ្ជួយដីកម្រិតធ្ងន់ រកឃើញមនុស្សស្លាប់ជាបណ្តើរៗ

តាមការផ្សាយរបស់ NHK, គ្រោះរញ្ជួយដីនៅប្រទេសជប៉ុន គិតត្រឹមពេលនេះ បានឆក់យកជីវិតមនុស្សចំនួន៨នាក់ហើយ ដោយអ្នកស្លាប់ទាំងអស់គឺសុទ្ធសឹងស្ថិតនៅក្នុងខេត្ត Ishikawa ដែលជាចំណុចកណ្តាលនៃការរញ្ជួយកាលពីថ្ងៃចន្ទទី១ខែមករាឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គ្រោះរញ្ជួយដីកម្រិត៧.៦រ៉ិចទ័រ បានបំផ្លាញសំណង់អគារ កាត់ផ្តាច់អគ្គិសនីចំពោះមនុស្សរាប់ម៉ឺននាក់ និងជំរុញឲ្យប្រជាពលរដ្ឋ រត់ចេញពីតំបន់ឆ្នេរទៅរកទីទួលសុវត្ថិភាព។

លើសពីនេះ វាក៏បង្កឲ្យមានរលកសមុទ្រកម្ពស់ប្រហែល ១ម៉ែត្រនៅតាមបណ្តោយឆ្នេរ ភាគខាងលិចដ៏វែងរបស់ជប៉ុន ក៏ដូចជានៅក្នុងប្រទេសជិតខាងកូរ៉េខាងត្បូង ផងដែរ។

កងទ័ពត្រូវបានបញ្ជូនទៅតំបន់ខាងលើ ដើម្បីជួយក្នុងប្រតិបត្តិការសង្គ្រោះ ខណៈអាកាសយានដ្ឋានក្នុងស្រុកមួយ ត្រូវបិទជាបន្ទាន់ បន្ទាប់ពីរញ្ជួយដីបង្កជាស្នាមប្រេះលើផ្លូវយន្តហោះ។

ទោះបីជាយ៉ាងណាក៏ដោយ ដោយសារតែគ្រោះរញ្ជួយដីទើបកើតឡើង ដូចនេះ ទំហំនៃការខូចខាត ក៏ដូចជាតួលេខមនុស្សស្លាប់ពិតប្រាកដ នៅតែមិនទាន់ច្បាស់ ព្រោះថា ផ្លូវសំខាន់ៗតភ្ជាប់ទៅកាន់តំបន់រងផលប៉ះពាល់ខ្លាំងបំផុត ត្រូវរងការខូចខាតយ៉ាងធ្ងន់ធ្ងរ ដែលរារាំងដល់កិច្ចខិតខំប្រឹងប្រែងជួយសង្គ្រោះ។

ទន្ទឹមនោះ ប្រធានាធិបតីអាមេរិកលោក ចូ បៃដិន បានប្រកាសត្រៀមខ្លួនជាស្រេច ក្នុងការផ្តល់ជំនួយចាំបាច់ណាមួយដល់ប្រទេសជប៉ុន បន្ទាប់ពីគ្រោះមហន្តរាយនេះ។

លោកនិយាយថា “ក្នុងនាមជាសម្ព័ន្ធមិត្តជិតស្និទ្ធ សហរដ្ឋអាមេរិកនិងជប៉ុនមានចំណងមិត្តភាពដ៏ជ្រាលជ្រៅដែលបង្រួបបង្រួមប្រជាជនរបស់យើង។ យើងឈរជាមួយប្រជាជនជប៉ុនក្នុងពេលវេលាដ៏លំបាកនេះ”។

សូមបញ្ជាក់ថា ជប៉ុន​ជា​ប្រទេស​មួយ​ក្នុង​ចំណោម​ប្រទេស​ដែល​ប្រឈម​នឹង​គ្រោះ​រញ្ជួយ​ដី​ខ្លាំង​ជាង​គេ។ ការរញ្ជួយដីដ៏ធំ និងរលកយក្សស៊ូណាមិ បានវាយប្រហារភាគឦសានប្រទេសនេះ កាលពីថ្ងៃទី១១ខែមីនាឆ្នាំ២០១១ ដោយសម្លាប់មនុស្សជិត ២០០០០នាក់ និងបំផ្លិចបំផ្លាញទីក្រុងនានា ព្រមទាំងបង្កឲ្យមានគ្រោះមហន្តរាយនុយក្លេអ៊ែរនៅហ្វូគូស៊ីម៉ាទៀតផង៕

ប្រែសម្រួល៖ Vann Vann

ប្រភព៖ CNA, BBC

ចុចអាន៖ គ្រោះរញ្ជួយដីដ៏ខ្លាំងកក្រើកជប៉ុនកំពុងព្រមានពីព្យុះយក្សស៊ូណាមិ