ជប៉ុន ជួបហេតុការណ៍រន្ធត់មួយទៀត

បើកទំព័រឆ្នាំ២០២៤មិនទាន់បានប៉ុន្មានថ្ងៃស្រួលបួលផង ជប៉ុនបានជួបគ្រោះមហន្តរាយនិងរឿងរន្ធត់ផ្ទួនៗ ដូចជារញ្ជួយដីនិងឆេះយន្តហោះ ហើយកាលពីថ្ងៃពុធទី៣ខែមករា ប្រទេសនេះបានជួបហេតុការណ៍រន្ធត់មួយទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នោះគឺការចាក់ប្រហារមនុស្សក្នុងរថភ្លើងនៅស្ថានីយ៍ Akihabara នៃទីក្រុងតូក្យូ ដោយបើយោងតាមប៉ូលិសបានឲ្យដឹងថា ស្រ្តីម្នាក់បានបើកការចាក់ប្រហារលើបុរស៣នាក់ បណ្តាលឲ្យរងរបួស ហើយត្រូវបញ្ជូនទៅមន្ទីរពេទ្យភ្លាមៗ។

ប៉ូលិសបានទទួលការហៅទូរស័ព្ទបន្ទាន់នៅមុនម៉ោង១១យប់ (ម៉ោងនៅជប៉ុន) ដោយនិយាយថា ស្ត្រីម្នាក់នោះ បានដកកាំបិតចាក់គេឯងនៅលើខ្សែរថភ្លើង Yamanote ដែលជាផ្លូវដឹកជញ្ជូនដ៏មមាញឹកបំផុតនៅក្នុងទីក្រុងតូក្យូ។

តាមការឲ្យដឹងពីអ្នកនាំពាក្យប៉ូលិសក្រុង, ស្ត្រីដៃដល់ត្រូវបានចាប់ខ្លួន ខណៈបុរសទាំង៣ គ្មាននរណាម្នាក់ត្រូវរបួសធ្ងន់ឡើយ។ ស្របពេលជាមួយគ្នានោះ ក្រុមហ៊ុន East Japan Railway Company ប្រកាសថា ខ្សែរថភ្លើង Yamanote ត្រូវបានផ្អាកមួយរយៈសិន ដោយសារតែ មានបញ្ហានៅលើរថភ្លើង។

រឿងហេតុនេះ កើតឡើងបន្ទាប់ពីប្រទេសជប៉ុន កំពុងក្រពុលមុខដោះស្រាយបញ្ហាធំចំនួន២ផ្ទួនៗ គឺគ្រោះរញ្ជួយដី និងការឆេះយន្តហោះ។

តាមតួលេខចុងក្រោយ មនុស្សស្លាប់ដោយរញ្ជួយដីកម្រិត ៧.៥រ៉ិចទ័រ នៅខេត្ត Ishikawa កាលពីថ្ងៃទី១ខែមករា បានកើនដល់៧៣នាក់ហើយ ខណៈក្រុមជួយសង្គ្រោះកំពុងជួបផលលំបាក ដោយសារតែអាកាសធាតុចុះត្រជាក់ខ្លាំង មេឃភ្លៀង និងផ្លូវខូច។

ថ្ងៃបន្ទាប់ ស្រាប់តែជប៉ុន ជួបហេតុការណ៍រន្ធត់មួយទៀត គឺការឆេះយន្តហោះ នៅអាកាសយានដ្ឋាន Haneda ក្នុងទីក្រុងតូក្យូ ដែលក្នុងករណីនេះ បណ្តាលឲ្យមនុស្ស៥នាក់ បាត់បង់ជីវិត។

យន្តហោះប្រភេទ Airbus A350 នៃជើងហោះហើរ JAL516 របស់ក្រុមហ៊ុនអាកាសចរណ៍ Japan Airlines បានបុកជាមួយយន្តហោះឆ្មាំសមុទ្រ ពេលចុះចត បន្ទាប់ពីហោះចេញពីទីក្រុង Sapporo ភាគខាងជើងជាមួយអ្នកដំណើរ ៣៦៧នាក់ និងសមាជិកអាកាសយានិក ១២ នាក់៕

ប្រែសម្រួល៖ Vann Vann

ប្រភព៖ CNA

ចុចអាន៖ គ្រប់គ្នាស្ងើចសរសើរជប៉ុន ដែលចាយពេលត្រឹម៩០វិនាទី ជម្លៀសមនុស្សជិត៤០០នាក់ ចេញពីយន្តហោះឆេះ