រដ្ឋមន្ត្រីការបរទេសអាមេរិកថា នឹងដាក់សម្ពាធលើប្រទេសអ៊ីស្រាអែលដាច់ខាត ដើម្បីការពារជនស៊ីវិលនៅហ្គាហ្សា

រដ្ឋមន្ត្រីការបរទេសអាមេរិក លោក Antony Blinken នៅថ្ងៃអង្គារ ទី៩ ខែមករា នេះ បានធ្វើដំណើរទៅដល់ប្រទេសអ៊ីស្រាអែល ដែលជាដំណើរបេសកកម្មរបស់លោកក្នុងការគ្រប់គ្រងសង្គ្រាមនៅតំបន់ហ្គាហ្សា ។ ហើយនៅក្នុងដំណើរបេសកកម្មលើកទី៤នេះ លោក Blinken បាននិយាយថា នឹងចែករំលែកនូវអ្វីដែលគាត់បានឮនៅក្នុងកិច្ចពិភាក្សារយ:ពេល ២ថ្ងៃជាមួយប្រទេសហ្ស៊កដានី កាតា អេមីរ៉ាតអារ៉ាប់រួម និងអារ៉ាប៊ីសាអូឌីត។

នៅក្នុងការវាយលុករបស់អ៊ីស្រាអែល ចាប់តាំងពីថ្ងៃទី៧ ខែតុលា ឆ្នាំ២០២៣ បានសម្លាប់ជនជាតិប៉ាឡេស្ទីនជាង ២៣.០០០ នាក់ បំផ្លាញតំបន់ហ្គាហ្សាជាច្រើន ដែលជាសកម្មភាពនាំឱ្យមានវិបត្តិមនុស្សធម៌យ៉ាងខ្លាំង និងកាន់តែអាក្រក់ទៅៗ។ លោក Blinken បាននិយាយថា លោកនឹងដាក់សម្ពាធលើប្រទេសអ៊ីស្រាអែលដាច់ខាត ដើម្បីការពារជនស៊ីវិលនៅហ្គាហ្សា និងអនុញ្ញាតឱ្យមានជំនួយមនុស្សធម៌ទៅដល់ពួកគេ។

ជាមួយគ្នានេះលោក Blinken បានពាំនាំពាក្យសម្ដីរបស់លោកប្រធានាធិបតី Joe Biden ដែលបាននិយាយពេញមួយយប់ថា ទីក្រុងវ៉ាស៊ីនតោនកំពុងជំរុញ តាមរបៀបស្ងប់ស្ងាត់ទៅកាន់អ៊ីស្រាអែលឱ្យចាប់ផ្តើមដកកងកម្លាំងមួយចំនួនចេញពីតំបន់វាយប្រហារ។

យោងតាមទីភ្នាក់ងារសារព័ត៌មាន Reuter បានឱ្យដឹងថា កិច្ចប្រជុំរបស់លោក Blinken បានផ្តោតទៅលើ ការស្វែងរកវិធីសាស្រ្តយូរអង្វែង ចំពោះជម្លោះអ៊ីស្រាអែល និងប៉ាឡេស្ទីនដែលមានអាយុកាលរាប់ទសវត្សរ៍ ដើម្បីឆ្ពោះទៅរកការបញ្ចប់សង្រ្គាម ហ្កាហ្សា ។

សូមបញ្ជាក់ថា រដ្ឋមន្ត្រីការបរទេសអាមេរិក លោក Antony Blinken កំពុងធ្វើដំណើរទស្សនកិច្ចរយៈពេលមួយសប្តាហ៍នៅមជ្ឈិមបូព៌ា ក្នុងគោលបំណងបន្ធូរបន្ថយភាពតានតឹងនៅទូទាំងមជ្ឈិមបូព៌ា ដែលនេះជាដំណើរបេសកកម្មលើកទី៤ របស់លោក ចាប់តាំងពីផ្ទុះសង្ក្រាមរវាងអ៊ីស្រាអែល និងប៉ាឡេស្ទីន ៕

ប្រែសម្រួលដោយ÷ កុសល

ប្រភព÷ CNA