អាហ្រ្វិកខាងត្បូង ចោទប្រកាន់អ៊ីស្រាអែលបំពានលើអនុសញ្ញាប្រល័យពូជសាសន៍របស់អង្គការសហប្រជាជាតិ

ប្រទេសអាហ្រ្វិកខាងត្បូងកាលពីថ្ងៃព្រហស្បតិ៍ ទី១១ ខែមករា បានចោទប្រកាន់អ៊ីស្រាអែលថាបានបំពានលើអនុសញ្ញាប្រល័យពូជសាសន៍របស់អង្គការសហប្រជាជាតិ ។ មិនតែប៉ុណ្ណោះ ទីក្រុងព្រីតូរីយ៉ា ថែមទាំងបានដាក់ពាក្យបណ្តឹងជាបន្ទាន់មួយទៅកាន់តុលាការយុត្តិធម៌អន្តរជាតិ (ICJ) ដើម្បីបង្ខំឱ្យអ៊ីស្រាអែលផ្អាកជាបន្ទាន់ នូវប្រតិបត្តិការយោធារបស់ខ្លួននៅក្នុងតំបន់ហ្គាហ្សា ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Ronald Lamola រដ្ឋមន្ត្រីក្រសួងយុត្តិធម៌នៃទីក្រុង ព្រីតូរីយ៉ា បាននិយាយថា គ្មានការវាយប្រហារដោយប្រដាប់អាវុធលើទឹកដីដែលមានឈ្មោះជារដ្ឋនោះទេ ទោះបីជាក្នុងករណីធ្ងន់ធ្ងរប៉ុណ្ណាក៏ដោយ ។ លោកបានបន្ថែមថា “ការឆ្លើយតបរបស់អ៊ីស្រាអែលចំពោះការវាយប្រហារថ្ងៃទី ៧ ខែតុលា ឆ្នាំ ២០២៣ គឺច្បាស់ណាស់ អាចនិយាយបានថា ជាការធ្វើឱ្យមានការរំលោភលើអនុសញ្ញា ICJ ។

ជាមួយនឹងការលើកឡើងរបស់ក្រុងព្រីតូរីយ៉ា ខាងលើនេះផងដែរ អ៊ីស្រាអែលបានច្រានចោល និងចាត់ទុកថា ជាការលើកឡើងមិនត្រឹមត្រូវ ហើយអាក្រក់បំផុត ។

សង្រ្គាមនៅតំបន់ហ្គាហ្សាបានផ្ទុះឡើង នៅពេលដែលក្រុមហាម៉ាស់បើកការវាយប្រហារដែលមិនធ្លាប់មានពីមុនមក ដែលបណ្តាលឱ្យមនុស្សប្រហែល ១,១៥០ នាក់ត្រូវបានសម្លាប់នៅក្នុងប្រទេសអ៊ីស្រាអែល ដែលភាគច្រើនជាជនស៊ីវិល នេះបើយោងតាមការបូកសរុបរបស់ AFP ដោយផ្អែកលើតួលេខផ្លូវការ។យ៉ាងណាមិញ ជាឆ្លើយតបទៅកាន់ក្រុមហាម៉ាស់ អ៊ីស្រាអែលក៏បានប្រើយុទ្ធនាការយោធាឥតឈប់ឈរ ដែលបានសម្លាប់មនុស្សយ៉ាងហោចណាស់ ២៣,៣៥៧ នាក់ ដែលភាគច្រើនជាស្ត្រី និងកុមារ។ នេះបើយោងតាមរបាយការណ៍ពីក្រសួងសុខាភិបាលដែលគ្រប់គ្រងដោយក្រុមហាម៉ាស ។

ទាក់ទងនឹងសកម្មភាពឆ្លើយតបរបស់អ៊ីស្រាអែលនេះ អាហ្វ្រិកខាងត្បូងអះអាងថា អ៊ីស្រាអែលកំពុងបំពានលើការប្តេជ្ញាចិត្តរបស់ខ្លួនក្រោម អនុសញ្ញាស្តីពីអំពើប្រល័យពូជសាសន៍របស់អង្គការសហប្រជាជាតិ ដែលជាសន្ធិសញ្ញាចុះហត្ថលេខានៅឆ្នាំ ១៩៤៨ ៕

ប្រែសម្រួលដោយ÷ ប៉ោ កុសល

ប្រភព÷ CNA