ព័ត៌មានអន្ដរជាតិ

អាល្លឺម៉ង់ ចេញមុខក្នុងក្របខណ្ឌអឺរ៉ុប ចូលរួមសង្គ្រាមប្រឆាំងក្រុមហ៊ូធី

បានផុស

២ years មុន

នៅ

ថ្ងៃអាទិត្យ ១៤ មករា ២០២៤

ដោយ

នាវាចម្បាំង ប្រភេទ Frigate F-124 មួយគ្រឿងរបស់អាល្លឺម៉ង់ បំពាក់ដោយមីស៊ីលបាញ់យន្តហោះ និងឧទ្ធម្កាចក្រចម្បាំង នឹងត្រៀមចេញដំណើរទៅកាន់សមុទ្រក្រហមនាថ្ងៃទី០១ ខែកុម្ភៈ ខាងមុខនេះក្នុងទិសដៅប្រឆាំងនឹងក្រុមឧទ្ទាមហ៊ូធីនៅប្រទេសយេម៉ែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមប្រភពសារព័ត៌មានក្នុងស្រុករបស់អាល្លឺម៉ង់ Die Welt បានរាយការណ៍បញ្ជាក់ថា រដ្ឋាភិបាលក្រុងបែរឡាំង នឹងត្រៀមបញ្ជូន F-124 ខាងលើចេញពីឆ្នេរអាល្លឺម៉ង់ឆ្ពោះទៅឈូងសមុទ្រ Aden ដែលជាឈូងសមុទ្រទឹកជ្រៅចន្លោះប្រទេសយេម៉ែន ឈូងសមុទ្រឥណ្ឌា និងអារ៉ាប់ នៅថ្ងៃទី០១ ខែក្រោយ ។

នៅក្នុងនាវាចម្បាំងលំដាប់នេះ គឺបំពាក់ដោយប្រព័ន្ធរ៉ាដាដែលមានសមត្ថភាពចាប់បាន ១,០០០ គោលដៅ ក៏ដូចជាមីស៊ីលការពារ ឧទ្ធម្កាចក្រចម្បាំង ព្រមទាំងមាននូវមីស៊ីលប្រឆាំងនឹងកប៉ាល់ចម្បាំងផ្សេងទៀតផងដែរ។ ប្រភពដដែលបានបញ្ជាក់ថា ការបញ្ជូននេះ គឺនៅក្នុងក្របខណ្ឌបេសកកម្មមួយផ្នែករបស់សហភាពអឺរ៉ុបនៅក្នុងតំបន់។

ស្ថានការណ៍នៅសមុទ្រក្រហម និងឈូងសមុទ្រ Aden កំពុងស្ថិតក្នុងភាពតានតឹង ក្រោយពេលការសម្រេចប្រើកម្លាំងទ័ពដោយអង់គ្លេស និងសហរដ្ឋអាមេរិកនៅទីនោះ ឆ្លើយតបទៅនឹងសកម្មភាពរបស់ក្រុមឧទ្ទាមហ៊ូធីនៅមូលដ្ឋានប្រទេសយែម៉ែន។

គួរបញ្ជាក់ផងដែរថា ក្រុមឧទ្ទាមហ៊ូធីបានប្រកាសជំហររឹងមាំជាមួយប្រជាជាតិបាឡេស្ទីន លើស្ថានភាពជម្លោះឥតឈប់ឈររវាងអ៊ីស្រាអែល និងក្រុមហាម៉ាស នៅតំបន់ហ្គាហ្សា ហើយក្រុមឧទ្ទាមអ៊ីស្លាមមួយនេះ ក៏ប្រកាសប្រឆាំង និងវាយប្រហាររាល់នាវាសត្រូវណាដែលជិះឆ្លងកាត់ចូលតំបន់ឈូងសមុទ្រ Aden នោះ រហូតដល់អ៊ីស្រាអែល បញ្ឈប់សង្រ្គាមរបស់ខ្លួនទៅលើក្រុមហាម៉ាស់៕

អត្ថបទដោយ៖ មាន រតនា