ព័ត៌មានអន្ដរជាតិ

រដ្ឋមន្ត្រីដឹកជញ្ជូន សិង្ហបុរី រងបទចោទប្រកាន់ពុករលួយ ជាករណីដ៏កម្រក្នុងប្រទេសខ្លាសេដ្ឋកិច្ចអាស៊ីអាគ្នេយ៍

បានផុស

២ years មុន

នៅ

ថ្ងៃសុក្រ ១៩ មករា ២០២៤

ដោយ

រដ្ឋមន្ត្រីដឹកជញ្ជូនសិង្ហបុរី លោក Subramaniam Iswaran ត្រូវបានតុលាការចោទប្រកាន់កាលពីថ្ងៃទី១៨ ខែមករា កន្លងទៅនេះពីបទពុករលួយ ហើយនេះជាករណីកម្របំផុតក្នុងប្រព័ន្ធអភិបាលកិច្ចនៃប្រទេសខ្លាសេដ្ឋកិច្ចអាស៊ីអាគ្នេយ៍មួយនេះ ។

ប្រភពសារព័ត៌មានអង់គ្លេស BBC និង CNA របស់សិង្ហបុរីបានឲ្យដឹងដូចគ្នាថា លោករដ្ឋមន្រ្តី Iswaran បានច្រានជំទាស់នឹងបទចោទប្រកាន់ខ្លួនសរុបរួមរហូតដល់ទៅ ២៧ ករណីពីបទទទួលសំណូក ។ ពិសេសនោះគឺការចោទប្រកាន់ពាក់ព័ន្ធនឹងទទួលយកផលប្រយោជន៍ ជាថ្នូរនឹងផ្តល់សិទ្ធិពិសេសផ្សេងៗក្នុងអាជីវកម្ម ដល់មហាសេដ្ឋីជនជាតិម៉ាឡេស៊ី Ong Beng Seng ដែលរកស៊ី និងកាន់កាប់សិទ្ធិក្រុមហ៊ុន Singapore Grand Pix និង Singapore GP ក្នុងប្រទេសសិង្ហបុរី ។

ក្នុងចំណោមករណីចោទប្រកាន់ទាំងនោះ សារព័ត៌មានសិង្ហបុរីជាច្រើនបានលើកបង្ហាញករណីដែលលោកបានទទួលសំណូកពីមហាសេដ្ឋីរួមមានសំបុត្រជើងហោះហើរពីក្រុងដូហា មកសិង្ហបុរី, សំបុត្រចូលរួមកម្មវិធីព្រឹត្តិការណ៍នានា ក៏ដូចជាការស្នាក់នៅសណ្ឋាគារប្រណីត ក្នុងទំហំជាទឹកប្រាក់ ១៦៦,០០០ ដុល្លារសិង្ហបុរី (ប្រហែលជាង ១០ ម៉ឺនដុល្លារអាមេរិក) ។ យ៉ាងណាមិញ លោក Iswaran បានលាលែងពីតំណែងរបស់ខ្លួន ក្រោយពីមានរឿងអាស្រូវទាំងនេះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គួររំឭកផងដែរថា សិង្ហបុរីជាប្រទេសដែលចូលក្នុងចំណាត់ថ្នាក់ប្រទេសមានអំពើពុករលួយតិចបំផុតទី៥ លើពិភពលោក គិតត្រឹមឆ្នាំ២០២២ ។ នេះបើយោងតាមទិន្នន័យសន្ទស្សន៍អំពើពុករលួយ ពីអង្គការតម្លាភាពអន្តរជាតិ (TI) នៃចំណាត់ថ្នាក់អំពើពុករលួយពី ១៨០ ប្រទេស ។ ហើយការផ្ទុះរឿងអាស្រូវពុករលួយនេះ គឺជាករណីកម្របំផុតមួយក្នុងប្រព័ន្ធអភិបាលកិច្ចសាធារណរបស់ប្រទេសនេះ ៕