ព័ត៌មានអន្ដរជាតិ

ជប៉ុន ជាប្រទេសទី ៥ ជោគជ័យចុះចតយានអវកាសលើដីឋានព្រះច័ន្ទ

បានផុស

២ years មុន

នៅ

ថ្ងៃសៅរ៍ ២០ មករា ២០២៤

ដោយ

តាមសារព័ត៌មាន NHK និងមន្ត្រីនៃទីភ្នាក់ងារអវកាសជប៉ុនបានឲ្យដឹងថា ខ្លួនបានចុះចតយានអវកាសចុះអង្កេតការណ៍មួយគ្រឿងដោយជោគជ័យនៅលើដីភពឋានព្រះច័ន្ទ ហើយនេះក៏នាំជប៉ុនឲ្យក្លាយជាប្រទេសទី៥ ដែលសម្រេចបានជោគជ័យក្នុងឋានទីអវកាស ពីក្រោយអតីតសហភាពសូវៀត សហរដ្ឋអាមេរិក ចិន និងឥណ្ឌា ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រភពសារព័ត៌មានដដែល បានឲ្យដឹងទៀតថា ទីភ្នាក់ងារស្រាវជ្រាវលំហអវកាសជប៉ុន បានបង្ហោះយានទៅឋានព្រះច័ន្ទ ចេញពីមូលដ្ឋានមជ្ឈមណ្ឌលលំហអវកាសជប៉ុន Tanegashima នៅក្នុងខេត្ត Kagoshima តាំងពីខែកញ្ញា ឆ្នាំ២០២៣កន្លងទៅ ហើយយានអវកាសឈ្មោះ Smart Lander for Investigating Moon (SLIM) សម្រាប់យកការណ៍ព័តមានពីឋានព្រះច័ន្ទនេះ ជាប្រភេទយានអវកាសដែលពុំមានផ្ទុកអវកាសយានិក និងបានចុះផ្ទាល់ដីព្រះច័ន្ទដោយជោគជ័យនៅក្នុងរាត្រីឆ្លងចូលថ្ងៃសោរ៍នេះ ។

យ៉ាងណាក្តី ទន្ទឹមនឹងភាពជោគជ័យនេះ ទីភ្នាក់អវកាសជប៉ុនដដែលក៏បានបង្ហាញពីបញ្ហាមួយ អំឡុងពេលប្រតិបត្តិការបេសកកម្មយានអវកាសនេះ ដោយមានបញ្ហាបន្ទះថ្មថាមពលព្រះអាទិត្យលើផ្នែកនៃយានខូចដំណើរការ ប៉ុន្តែបិរក្ខារយានផ្នែកផ្សេងនៅតែដំណើរការបានធម្មតា និងចុះចតបានត្រឹមត្រូវតាមគោលដៅទៀតផង។

គួររំឭកថា ប្រទេសមហាអំណាចលើពិភពលោក ក៏មានការប្រកួតប្រជែងក្នុងការបង្ហោះបច្ចេកវិទ្យាអវកាស ពិសេសគន្លងលំហនៃភពព្រះច័ន្ទ ដោយក្នុងនោះក៏មានការចូលរួមច្រើនពីវិស័យឯកជន។ នៅឆ្នាំ២០២៦ ទីភ្នាក់ងារអវកាសសហរដ្ឋអាមេរិក គឺអង្គការ NASA ក៏គ្រោងនឹងបង្ហោះយានអវកាសដោយមានផ្ទុកអវកាសយានិកមួយគ្រឿងផងដែរ ដែលជាបេសកកម្មថ្មីជាលើកទីពីររបស់ខ្លួន ក្រោយទទួលជោគជ័យក្នុងរយៈកាលពីពាក់កណ្តាលសតវត្សមុន៕