របបយោធាមីយ៉ាន់ម៉ា ប្រកាសបន្តដាក់ប្រទេសក្នុងគ្រាអាសន្ន

មេដឹកនាំយោធាមីយ៉ាន់ម៉ា នៅថ្ងៃពុធ ទី៣១ ខែមករា នេះ បានបន្តដាក់ប្រទេសក្នុងភាពអាសន្ន ចាប់តាំងពីរដ្ឋប្រហារឆ្នាំ ២០២១ ។ ហើយ ខណៈពេលនេះរបបយោធាកំពុងប្រយុទ្ធដើម្បីទប់ស្កាត់ការបះបោរបង្ហូរឈាមពីសំណាក់ប្រជាជនដែលគាំទ្រលទ្ធិប្រជាធិបតេយ្យ ។

លោក Min Aung Hlaing ប្រមុខរដ្ឋាភិបាលមីយ៉ាន់ម៉ា នាពេលបច្ចុប្បន្ន បានសម្រេចបន្តដាក់ប្រទេសក្នុងគ្រាអាសន្នសម្រាប់រយៈពេលប្រាំមួយខែបន្ថែមទៀត ដើម្បីបំពេញភារកិច្ចចាំបាច់ ដែលលោកចាត់ទុកថា”ដើម្បីនាំប្រទេសជាតិទៅកាន់ស្ថានភាពធម្មតានៃស្ថិរភាព និងសន្តិភាព” ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របាយការណ៍ពី រ៉យទ័រ បានបង្ហាញថា អំឡុងពេលនេះ របបយោធាមីយ៉ាន់ម៉ា បានដាក់ពង្រាយកាំភ្លើងធំ និងយន្តហោះចម្បាំងធុនធ្ងន់ ដើម្បីព្យាយាមបង្ក្រាបក្រុមជីវពលសម្ព័ន្ធមិត្តជាមួយរដ្ឋាភិបាលស្រមោល និងកងទ័ពជនជាតិភាគតិច ដែលតែងតែលួចឆ្មក់វាយប្រហារ រហូតស្ទើរតែធ្វើឱ្យពួកយោធាស្ទើតែបាក់ស្បាតម្ដងៗ ។

យោងតាមអង្គការសហប្រជាជាតិ ប្រជាជនមីយ៉ាន់ម៉ាប្រហែល ២.៣ លាននាក់ ត្រូវបានផ្លាស់ទីលំនៅ ។ ហើយជាមួយគ្នានោះ បើទោះជាមានកិច្ចខិតខំប្រឹងប្រែងរបស់ប្រទេសជិតខាង ក៏ដូចជាប្រទេសសមាជិកអាស៊ីអាគ្នេយ៍ព្យាយាមផ្តួចផ្តើមការសន្ទនា យ៉ាងណាក៏ដោយ ក៏មិនឃើញបានផលអ្វីបន្តិចសោះ ដោយរបបយោធាបានបដិសេធមិនចរចា ។

សូមបញ្ជាក់ថា ការពន្យារពេលនៃការគ្រប់គ្រងគ្រាអាសន្នក្នុងប្រទេសមីយ៉ាន់ម៉ា បានធ្វើឡើងនៅមុនថ្ងៃខួបលើកទី ៣ នៃរដ្ឋប្រហារដណ្ដើមអំណាចពីសំណាក់របបយោធា គ្រប់គ្រងដោយលោក Min Aung Hlaing ៕

ប្រែសម្រួលដោយ÷ ប៉ោ កុសល

ប្រភព÷ CNA