លោក Biden ចាប់ផ្ដើមលេង TikTok ដើម្បីទាញសន្លឹកឆ្នោតគាំទ្រពីយុវជន

ប្រធានាធិបតីសហរដ្ឋអាមេរិកលោក Joe Biden កាលពីចុងសប្ដាហ៍កន្លងទៅបានចាប់ផ្ដើមលេងកម្មវិធី TikTok ដើម្បីទាញសំឡេងគាំទ្រពីសំណាក់យុវជនសម្រាប់ការបោះឆ្នោតប្រធានាធិបតីនាខែវិច្ឆិកាខាងមុខ ។ នេះបើយោងតាមការចេញផ្សាយដោយទីភ្នាក់ងារព័ត៌មាន AP កាលពីថ្ងៃទី១២ ខែកុម្ភៈ ។

ទើបតែបង្កើតបានតែប៉ុន្មានថ្ងៃប៉ុណ្ណោះ ប៉ុន្តែគណនី TikTok របស់លោកប្រធានាធិបតីដែលមានឈ្មោះ @bidenhq មានអ្នកចុចតាមដានប្រមាណ ៧៦,៨០០ នាក់ហើយ ខណៈវីដេអូដំបូងដែលក្រុមការងាររបស់លោកបង្ហោះមានរយៈពេល ២៧ វិនាទីបង្ហាញពីការឆ្លើយសំណួរមួយចំនួន រាប់ចាប់ពីរឿងនយោបាយដល់វិស័យកីឡាអាមេរិក ទទួលបានអ្នកទស្សនាជិត ៧ លាននាក់ ។

ទោះយ៉ាងណា ក៏មានមតិរិះគន់ទៅលើលោកប្រធានាធិបតីវ័យ ៨២ ឆ្នាំរូបនេះផងដែរចំពោះការសម្រេចចិត្តលេងកម្មវិធី TikTok ដែលគ្រប់គ្រងដោយប្រទេសចិនមួយនេះ ដោយសារតែកាលពីឆ្នាំមុន រដ្ឋាភិបាលរបស់លោក Biden បានហាមប្រាមមន្ត្រីទាំងអស់មិនឲ្យប្រើប្រាស់កម្មវិធីកម្សាន្តមួយនេះឡើយ ដោយសារតែការភ័យខ្លាចគំរាមកំហែងដល់សន្តិសុខជាតិ ។

ពាក់ព័ន្ធទៅនឹងបញ្ហានេះដែរ ទីប្រឹក្សាសន្តិសុខជាតិរបស់សេតវិមានលោក John Kirby បានថ្លែងទៅកាន់អ្នកសារព័ត៌មានថា លោកមិនអាចហារស្ដីជំនួសក្រុមអ្នកធ្វើយុទ្ធនាការរបស់លោក Biden នោះទេ ប៉ុន្តែលោកបានបញ្ជាក់ថា វត្តមានរបស់លោកប្រធានាធិបតីនៅលើ TikTok គឺមិនពាក់ព័ន្ធនឹងក្ដីព្រួយបារម្ភផ្នែកសន្តិសុខជាតិនោះឡើយ ។

គួរបញ្ជាក់ថា នៅសហរដ្ឋអាមេរិកមានអ្នកប្រើប្រាស់កម្មវិធីលេងកម្សាន្ត TikTok ប្រមាណជា ១៥០ លាននាក់ហើយភាគច្រើនជាយុវវ័យ ទើបជំរុញឲ្យក្រុមអ្នកយុទ្ធនាការឃោសនាបោះឆ្នោតរបស់លោក Biden បង្កើតគណនីនេះឡើង ដើម្បីទាញសំឡេងគាំទ្រពីអ្នកបោះឆ្នោតវ័យក្មេង ៕

ដោយ ៖ សុខ ជីវ័ន្ត

ចុចអាន ៖ លោក Trump ៖ លោក Biden “មិនដឹងថាខ្លួនឯងនៅរស់ទេ”