លេចធ្លាយសារសំឡេងប្រជុំសម្ងាត់របស់ទ័ព អាល្លឺម៉ង និយាយពីរឿងផ្ដល់​មីស៊ីលឲ្យ អ៊ុយក្រែន

អាល្លឺម៉ង់កំពុងបើកការស៊ើបអង្កេតទ្រង់ទ្រាយធំមួយ បន្ទាប់ពីសារសំឡេងក្នុងសន្និសីទស្ដីអំពីការផ្ដល់ជំនួយយោធាទៅឲ្យអ៊ុយក្រែនត្រូវបានបែកធ្លាយធ្លាក់ដល់ដៃរុស្ស៊ី ខណៈលោកអធិការបតី Olaf Scholz ដែលធ្វើទស្សនកិច្ចនៅបុរីវ៉ាទីកង់កាលពីចុងសប្ដាហ៍កន្លងទៅបានចាត់ទុកការបែកខ្ញែកនេះថាជារឿងដ៏គ្រោះថ្នាក់ខ្លាំងណាស់ ។ នេះបើយោងតាមការចេញផ្សាយដោយកាសែតអាមេរិក Washington Post កាលពីថ្ងៃទី៣ ខែមីនា ។

សារសំឡេងដែលមានរយៈពេល ៣៨ នាទីត្រូវបានធ្លាក់ដល់ដៃរុស្ស៊ី និងបង្ហោះដោយប្រព័ន្ធផ្សព្វផ្សាយសង្គមរបស់និពន្ធនាយកនៃទូរទស្សន៍រដ្ឋរុស្ស៊ី RT កាលពីថ្ងៃទី១ ខែកុម្ភៈ ខណៈសន្និសីទនោះគឺផ្ដោតសំខាន់អំពីការផ្គត់ផ្គង់មីស៊ីលរយៈចម្ងាយឆ្ងាយទៅដល់អ៊ុយក្រែនដែលចង់បានជាយូរយារណាស់មកហើយ ។

ទន្ទឹមនោះ អ្នកនាំពាក្យអាល្លឺម៉ង់ក៏បានសារភាពប្រាប់ប្រព័ន្ធផ្សព្វផ្សាយអំពីការលេចធ្លាយសារសំឡេងនេះផងដែរ ខណៈសារព័ត៌មានអាល្លឺម៉ង់ក៏បានរាយការណ៍ដែរថា សន្និសីទនេះរៀបចំឡើងតាមអនឡាញកាលពីខែកុម្ភៈ ប៉ុន្តែមិនបានបញ្ជាក់ថា មានអ្នកមុខអ្នកការរូបណាខ្លះមានវត្តមានចូលរួម ឬអ្នកជាប់ពាក់ព័ន្ធណាខ្លះចូលលួចស្ដាប់ ឬលួចថតកិច្ចសន្ទនានេះនោះទេ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចេញផ្សាយដោយសារព័ត៌មាន RT វិញបានឲ្យដឹងថា សារសំឡេងដែលបង្ហោះដោយនិពន្ធនាយក RT លោកស្រី Margarita Simonyan កាលពីថ្ងៃទី១ ខែកុម្ភៈ គឺបានមកពីកិច្ចសន្ទនារវាងមន្ត្រីទ័ពអាកាសអាល្លឺម៉ង់ចំនួន ៤ រូប រួមទាំងលោកអគ្គមេបញ្ជាការ Ingo Gerhartz ផងដែរ ។

មន្ត្រីទាំងនោះបានពិភាក្សាយ៉ាងលម្អិតអំពីប្រតិបត្តិការ និងទិសដៅការផ្គត់ផ្គង់មីស៊ីល Taurus ទៅឲ្យអ៊ុយក្រែន រួមទាំងយុទ្ធសាស្ត្របាញ់មីស៊ីលទៅលើស្ពានតំបន់គ្រីមៀ ។ មន្ត្រីទាំងនោះក៏បាននិយាយអំពីការរិះរកវិធីនិយាយបដិសេធនៃការចោទប្រកាន់អាល្លឺម៉ង់ថាចូលដៃ ក៏ដូចជាការឃុបឃិតណាមួយជាមួយអ៊ុយក្រែនលើការវាយប្រហារណាមួយ ដើម្បីបញ្ចៀសការបង្កាត់ភ្លើងសង្គ្រាមឲ្យកាន់តែឆេះរោលរាល ។

ពាក់ព័ន្ធនឹងបញ្ហានេះដែរ អតីតប្រធានាធិបតីរុស្ស៊ី លោក Dmitry Medvedev បានព្រមានកាលពីថ្ងៃអាទិត្យថា កិច្ចសន្ទនាដែលលេចធ្លាយនេះបង្ហាញថា អាល្លឺម៉ង់កំពុងបង្កាត់ភ្លើងសង្រ្គាមជាមួយទីក្រុងមូស្គូ ហើយជម្លោះ​បែប​នេះ​អាច​នឹង​កាន់តែសន្ធោរសន្ធៅឡើង ដោយសារតែគោលបំណងញុះញង់ពីសំណាក់ថ្នាក់ដឹកនាំស៊ីវិលរបស់អាល្លឺម៉ង់ ។

គួរបញ្ជាក់ថា អាល្លឺម៉ង់គឺជាម្ចាស់ជំនួយបរទេសដ៏ធំបំផុតរបស់រដ្ឋាភិបាលទីក្រុងកៀវក្នុងភ្លើងសង្គ្រាមរវាងរុស្ស៊ី និងអ៊ុយក្រែនរយៈពេល ២ ឆ្នាំមកនេះ ទោះបីជាលោកអធិការបតី Olaf Scholz មានការស្ទាក់ស្ទើរក្នុងការបញ្ជូនមីស៊ីលរយៈចម្ងាយឆ្ងាយ Taurus ទៅកាន់អ៊ុយក្រែន ដោយសារការព្រួយបារម្ភថា អាវុធបែបនេះអាចបង្កឲ្យមានជម្លោះដោយផ្ទាល់រវាងអាល្លឺម៉ង់ និងរុស្ស៊ីក៏ដោយ ៕

ដោយ ៖ សុខ ជីវ័ន្ត

ចុចអាន ៖ ថៃ ជួយដឹកជនរងគ្រោះក្នុងបទល្មើសឆបោកតាមអនឡាញ ៩០០ នាក់ចេញ ពីមីយ៉ាន់ម៉ាទៅចិន