នាយករដ្ឋមន្ត្រី ប៉េរូ ដើរចេញពីតំណែង ក្រោយបែកធ្លាយសារសំឡេងសន្ទនា​ជាមួយនារីម្នាក់

នាយករដ្ឋមន្ត្រីប៉េរូលោក Alberto Otarola បានលាលែងពីតំណែងជុំវិញការចោទប្រកាន់ថា លោកព្យាយាមប្រើអំណាចដើម្បីជួយស្ត្រីម្នាក់ឲ្យ​ទទួលបានកិច្ចសន្យារកកម្រៃពីរដ្ឋាភិបាល ។ នេះបើតាមការចេញផ្សាយរបស់សារព័ត៌មាន BBC កាលពីថ្ងៃទី៦ ខែមីនា ។

រឿងអាស្រូនេះបានកើតឡើងកាលពីសប្តាហ៍មុន នៅពេលដែលប៉ុស្តិ៍ទូរទស្សន៍ប៉េរូមួយបានចាក់ផ្សាយសំឡេងឃ្លីបនៃកិច្ចសន្ទនារវាងលោក Otarola អាយុ ៥៧ ឆ្នាំ និងស្ត្រីដែលលោកនាយករដ្ឋមន្ត្រីនិយាយជាមួយគឺនាង Yazire Pinedo អាយុ ២៥ ឆ្នាំ ។

នាងត្រូវបានគេរាយការណ៍ថា ទទួលបានកិច្ចសន្យាចំនួន ២ សម្រាប់ការងារនៅក្នុងក្រសួងការពារជាតិ អំឡុងឆ្នាំ ២០២៣ និងរកបានប្រាក់សរុបប្រមាណ ១៤,០០០ ដុល្លារអាមេរិក ។ ទោះយ៉ាងណា លោក Otarola បានបដិសេធថាមិនបានធ្វើខុសអ្វីនោះទេ ខណៈការ​ស៊ើបអង្កេត​ដើម្បីចោទប្រកាន់ជា​ផ្លូវ​ការកំពុងស្ថិតក្នុងដំណើការ​នៅឡើយ ។

ក្នុងឃ្លីបសំឡេងនោះទៀតសោត លោក Otarola ក៏បានសុំស្រឡាញ់ស្ត្រីរូបនោះ ហើយសុំឲ្យនាងផ្ញើ CV មកគាត់ថែមទៀតផង ។ ពាក់ព័ន្ធនឹងបញ្ហានេះដែរ នាង Pinedo បានប្រាប់ទូរទស្សន៍ប៉េរូ Canal N កាលពីថ្ងៃពុធថា ពីមុនមកនាងធ្លាប់មានទំនាក់ទំនងមួយរយៈពេលខ្លីជាមួយលោក Pinedo ខណៈអ្នកទាំងពីរបាននិយាយថា ការថតសំឡេងនោះគឺបានមកពីការសន្ទនាតាំងតែពីនៅឆ្នាំ ២០២១ មកម្ល៉េះ ពោលមុនពេលដែលលោក Otarola ក្លាយជាសមាជិកគណៈរដ្ឋមន្ត្រីទៅទៀត ។

ទោះយ៉ាងណា ការលើកឡើងនេះហាក់ផ្ទុយនឹងសេចក្តីថ្លែងការណ៍ដែលលោក Otarola បានធ្វើពីមុនមកដែលលើកឡើងថា លោកធ្លាប់បានជួបជាមួយនាង Pinedo តែម្តងគត់ អំឡុងកិច្ចប្រជុំមួយ ។

គួរបញ្ជាក់ថា យោងតាមច្បាប់របស់ប្រទេសប៉េរូ សមាជិកទាំង ១៨ នាក់នៃគណៈរដ្ឋមន្ត្រីត្រូវតែធ្វើដូចលោក Otarola ដែរ ពោលបើលោកនាយករដ្ឋមន្ត្រីលាលែងពីតំណែង សមាជិកគណៈរដ្ឋមន្ត្រីទាំងប៉ុន្មានក៏នឹងត្រូវដើរតាមលោក Otarola ដូចគ្នា ប៉ុន្តែមានលក្ខខណ្ឌមួយ គឺប្រធានាធិបតីមានជម្រើសក្នុងការជ្រើសរើសថ្នាក់ដឹកនាំទាំងនេះមកវិញ ប្រសិនបើចាំបាច់ ៕

អត្ថបទ ៖ ប៊ុន សុភាព