ស៊ូដង់ខាងត្បូង បិទសាលារៀនទាំងអស់ ខណៈរលកកម្ដៅកំពុងវាយលុក​ខ្លាំង

ប្រទេសស៊ូដង់ខាងត្បូងកំពុងបិទសាលារៀនទាំងអស់ ចាប់ពីថ្ងៃចន្ទនេះតទៅ ដើម្បីត្រៀមការពាររលកកម្ដៅខ្លាំងដែលរំពឹងថានឹងមានរយៈពេល ២ សប្តាហ៍ ។ នេះបើយោងតាមការចេញផ្សាយរបស់សារពត៌មាន​ AP នៅថ្ងៃទី​១៨ ខែមីនានេះ ។

ក្រសួង​សុខាភិបាល និងក្រសួង​អប់រំ​បាន​ណែនាំ​ឲ្យ​មាតាបិតា​មើលថែ និងទុកកូនៗរបស់ពួកគេ​ទាំងអស់​នៅ​ក្នុង​ផ្ទះ ខណៈ​សីតុណ្ហភាព​​រំពឹង​ថា ​នឹង​ឡើង​ដល់ ៤៥ អង្សាសេ ។ ចំពោះសាលារៀនណាដែលរកឃើញថានៅតែបើកទ្វារ ក្នុងអំឡុងពេលនៃការព្រមាននឹងត្រូវរងពិន័យ ប៉ុន្តែមិនបានបញ្ជាក់ពីរយៈពេលដែលសាលានឹងនៅតែបិទនោះទេ ខណៈក្រសួង​នឹង​បន្ត​តាម​ដាន​ស្ថានការណ៍ និង​ផ្តល់​ដំណឹង​ដល់​សាធារណជន​ទៅតាមភាពជាក់ស្ដែង ។

គួរបញ្ជាក់ថា ស៊ូដង់ខាងត្បូងជាប្រទេសមួយក្នុងចំណោមប្រទេសដែលងាយរងគ្រោះទៅនឹងការប្រែប្រួលអាកាសធាតុ ដូចជារលកកំដៅលើសពី ៤០ អង្សាសេ ។ ជម្លោះស៊ីវិលបានញាំញី ក៏ដូចជារុញឲ្យជីវភាប្រជាជនរបស់ប្រទេសអាហ្រ្វិកខាងកើតមួយនេះកាន់តែលំបាក ស្របពេលដែលប្រទេសក៏កំពុងជួបគ្រោះរាំងស្ងួតផង និងទឹកជំនន់ស្រាប់ផង ។

ទន្ទឹមនោះកម្មវិធីស្បៀងអាហារពិភពលោកនៅក្នុងប្រទេសនេះបានឲ្យដឹងថា ស៊ូដង់ខាងត្បូង បន្តប្រឈមមុខនឹងវិបត្តិមនុស្សធម៌ដ៏ធ្ងន់ធ្ងរ ដោយសារតែអំពើហិង្សា អស្ថិរភាពសេដ្ឋកិច្ច ការប្រែប្រួលអាកាសធាតុ និងលំហូរនៃប្រជាជនដែលភៀសខ្លួនចេញពីជម្លោះនៅក្នុងប្រទេសស៊ូដង់ ដែលប្រជាជនងាយរងគ្រោះចំនួន ៨១៨,០០០ នាក់ត្រូវបានផ្តល់អាហារ និងប្រាក់ឧបត្ថម្ភ ៕

អត្ថបទ ៖ ​ប៊ុន សុភាព