​យន្តហោះ​​ដឹកកម្មករ​ប្រេង​ធ្លាក់​នៅស៊ូដង់​ខាងត្បូង សម្លាប់​មនុស្ស​២០នាក់​ និង​រស់​ម្នាក់​

មានមនុស្សតែម្នាក់ប៉ុណ្ណោះដែលបានរួចជីវិតពីហេតុការណ៍ធ្លាក់យន្តហោះនៅប្រទេសស៊ូដង់ខាងត្បូង ដែលបានសម្លាប់កម្មករប្រេងចំនួន២០នាក់ដែលនៅលើយន្តហោះ​នោះ​។ នេះបើយោងតាមការចេញផ្សាយរបស់សារព័ត៌មាន​ BBC នៅថ្ងៃទី៣០ខែមករានេះ។

រដ្ឋមន្ត្រី​ថាមពល​ លោក Puot Kang Chol បាននិយាយថា យន្តហោះនេះបាន​ហោះហើរ​ចេញ​ដំណើរទៅកាន់រដ្ឋធានី Juba រួច​​បានធ្លាក់រយៈពេលបីនាទី បន្ទាប់ពីហោះឡើងក្បែរតំបន់ប្រេង​ក្នុង​តំបន់​ Unity State កាលពីព្រឹកថ្ងៃពុធ។

ក្នុង​ចំណោម​ជន​រង​គ្រោះ​មាន​ជនបរទេស​៥​នាក់ គឺ​​ជនជាតិ​ចិន​២​នាក់ ឥណ្ឌា​ម្នាក់ និង​អ្នកបើកយន្តហោះ​អ៊ូ​ហ្គង់​ដា​២​នាក់ ។ ជនរងគ្រោះ១៥នាក់ផ្សេងទៀត សុទ្ធតែជាជនជាតិស៊ូដង់ខាងត្បូង។ មូលហេតុ​នៃ​ការ​ធ្លាក់​យន្តហោះ​នេះ​មិន​ត្រូវ​បាន​រកឃើញនៅឡើយនោះទេ ប៉ុន្តែ​សមត្ថកិច្ច​បាន​និយាយ​ថា ​ពួកគេ​កំពុង​ស៊ើបអង្កេត​។

អ្នកដែលស្លាប់សុទ្ធតែជា​បុរសកម្មករប្រេងដែល​ធ្វើការឱ្យក្រុមហ៊ុន Greater Pioneer Company (GPOC) ហើយយន្តហោះនេះដំណើរការដោយក្រុមហ៊ុនអាកាសចរណ៍ Light Air Services។ GPOC គឺជាក្រុមហ៊ុនបណ្តាក់ទុនរួមគ្នាដែលរួមមានក្រុមហ៊ុនប្រេងរបស់រដ្ឋមកពីប្រទេសឥណ្ឌា ចិន ម៉ាឡេស៊ី និងស៊ូដង់ខាងត្បូង។ ក្រុមហ៊ុននេះក៏​មានបេសកកម្មរុករកជាប្រចាំ។

គួរបញ្ជាក់ថា ហេដ្ឋារចនាសម្ព័ន្ធអាកាសចរណ៍របស់ស៊ូដង់ខាងត្បូងមិនមានការអភិវឌ្ឍល្អ​នោះ​ទេ ហើយប្រទេសនេះមានកំណត់ត្រាសុវត្ថិភាពមិនល្អដែរ។ ឧបទ្ទវហេតុផ្លូវអាកាសគឺជារឿងធម្មតា ហើយជារឿយៗត្រូវបានស្តីបន្ទោសលើការផ្ទុក​លើស​ទម្ងន់នៃយន្តហោះ ឬលក្ខខណ្ឌអាកាសធាតុ។

កាលពីឆ្នាំ ២០២១ មនុស្សចំនួន ៥ នាក់បានស្លាប់ បន្ទាប់ពីយន្តហោះដឹកទំនិញដែលផ្ទុកប្រេងសម្រាប់កម្មវិធីស្បៀងអាហារពិភពលោក (WFP) របស់អង្គការសហប្រជាជាតិបានធ្លាក់នៅជិតរដ្ឋធានី Juba៕

អត្ថបទ៖ ប៊ុន សុភាព