យន្តហោះកងទ័ពចិន ៣៦គ្រឿង ព័ទ្ធជុំវិញកោះ តៃវ៉ាន់

តាមសេចក្តីរាយការណ៍របស់ AFP នៅថ្ងៃសុក្រទី២២ខែមីនា ក្រសួងការពារជាតិតៃវ៉ាន់ និយា​យថា យន្តហោះកង ទ័ពចិនចំនួន៣៦គ្រឿង ត្រូវបានប្រទះឃើញនៅជុំវិញកោះដែលគ្រប់គ្រងដោយខ្លួនឯង ក្នុងរយៈពេល២៤ម៉ោងចុងក្រោយ ហើយនេះត្រូវបានគេដឹងថា ជាចំនួនខ្ពស់បំផុត ដែលយន្តហោះយោធាចិន ត្រូវគេប្រទះឃើញជុំវិញតៃវ៉ាន់ក្នុងឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍ ក្នុងរយៈពេល២៤ម៉ោងចុងក្រោយ គិតត្រឹមម៉ោង៦ព្រឹក ថ្ងៃទី២២ខែមីនា, ក្រសួងការពារជាតិតៃវ៉ាន់  ក៏បានអះអាងប្រទះឃើញនាវាកងទ័ពជើងទឹកចិនចំនួន៦គ្រឿង កំពុងធ្វើប្រតិបត្តិការនៅជុំវិញកោះតៃវ៉ាន់ផងដែរ។

ក្រសួងបន្ថែមថា ក្នុងចំណោមយន្តហោះទាំង៣៦គ្រឿងដែលឃើញនោះ មាន១៣គ្រឿង បានឆ្លងកាត់ខ្សែបន្ទាត់កណ្តាលនៃច្រកសមុទ្រតៃវ៉ាន់ ដែលជាផ្លូវទឹកដ៏រសើបពុះចែកប្រទេសចិនពីកោះតៃវ៉ាន់។

រឿងនេះកើតឡើង បន្ទាប់ពីមន្ត្រីកងទ័ពជើងទឹកអាមេរិកជាន់ខ្ពស់ ឧត្តមនាវីឯក John Aquilino ព្រមានថា  ៣ឆ្នាំទៀត ចិន នឹងវាយលុកដណ្តើមយកកោះតៃវ៉ាន់ មកគ្រប់គ្រង។

លោកនិយាយថា រឿងរ៉ាវដែលលាតត្រដាងក្នុងកិច្ចប្រជុំកងទ័ពរំដោះប្រជាជន តាមបញ្ជារបស់លោកប្រធា​នាធិបតី ស៊ី ជីនពីង គឺជាការត្រៀមខ្លួនដើម្បីវាយលុកកោះតៃវ៉ាន់ នៅត្រឹមឆ្នាំ២០២៧។ ជាងនេះទៅទៀត សកម្មភាពរបស់ PLA បង្ហាញពីសមត្ថភាពរបស់ពួកគេ ក្នុងការបំពេញគោលដៅតា​មពេលវេលាដែលលោក ស៊ី កំណត់ ដើម្បីបង្រួបបង្រួមតៃវ៉ាន់ជាមួយចិនដីគោកដោយបង្ខំ។

សូមបញ្ជាក់ ទីក្រុងប៉េកាំងអះអាងថា តៃវ៉ាន់ គឺជាផ្នែកនៃទឹកដីរបស់ខ្លួន ហើយមិនដែលបោះបង់គំនិតប្រើប្រាស់កម្លាំង  ដើម្បីនាំយកកោះនេះមកគ្រប់គ្រងក្នុងដៃរបស់ខ្លួនឡើយ។

អ្វីដែលគួរកត់សម្គាល់ ប្រទេសចិន បានបង្កើនសម្ពាធយោធាលើកោះតៃវ៉ាន់ខ្លាំងបំផុត ចាប់តាំងពីឆ្នាំ២០១៦មក ក្រោយពេលលោកស្រីប្រធានាធិបតី Tsai Ing-wen ជាប់ឆ្នោត ដោយទីក្រុងប៉េកាំង បានបញ្ជូនយន្តហោះចម្បាំងនិងយន្ត ហោះយោធាផ្សេងទៀត ខណៈនាវាចិន ក៏បង្ហាញវត្តមានញឹកញាប់នៅជុំវិញដែនទឹកតៃវ៉ាន់ផងដែរ៕

អត្ថបទ៖ សុខ សុវណ្ណ

ចុចអាន៖ អាមេរិក៖ ៣ឆ្នាំទៀត ចិន នឹងវាយយកកោះ តៃវ៉ាន់