អាមេរិក ដាក់ទណ្ឌកម្មក្រុមហ៊ុនជួរមុខ ចិន ដែលមានចិត្តចង់កម្ទេចហេដ្ឋារចនាសម្ព័ន្ធសំខាន់ៗ

សហរដ្ឋអាមេរិកបានដាក់ទណ្ឌកម្មលើក្រុមហ៊ុនជួរមុខរបស់ក្រសួងសន្តិសុខរដ្ឋចិនដោយចោទប្រកាន់ថាបានបម្រើការជាអ្នកគ្របដណ្ដប់លើប្រតិបត្តិការតាមអនឡាញដែលមានគំនិតអាក្រក់ជាច្រើន និងផ្តោតលើហេដ្ឋារចនាសម្ព័ន្ធសំខាន់ៗរបស់សហរដ្ឋអាមេរិក ។ នេះបើយោងតាមការចេញផ្សាយរបស់សារពត៌មាន CNA នៅថ្ងៃទី​២៦ ខែមីនា ។

ក្រសួង​សេដ្ឋកិច្ចអាមេរិកបាន​និយាយ​ក្នុង​សេចក្តីថ្លែងការណ៍​មួយ​​ថា អាមេរិកបានដាក់​ទណ្ឌកម្ម​ទៅលើ​ក្រុមហ៊ុនវិទ្យាសាស្ត្រ និង​បច្ចេកវិទ្យា Wuhan Xiaoruizhi ព្រម​ទាំង​លើ​ជនជាតិ​ចិន​ ២ ​នាក់​ផង​ដែរ ដែលនេះគឺជាផ្នែកមួយនៃកិច្ចខិតខំប្រឹងប្រែងធ្វើឡើងជាមួយក្រសួងយុត្តិធម៌សហរដ្ឋអាមេរិក, FBI, ក្រសួងការបរទេស និងជាមួយចក្រភពអង់គ្លេសផងដែរ ។

ភ្នាក់ងារចារកម្មតាមអនឡាញនេះគឺឧបត្ថម្ភដោយរដ្ឋាភិបាលចិន ហើយវានៅតែជាការគំរាមកំហែងដ៏ធំបំផុតចំពោះសន្តិសុខជាតិរបស់សហរដ្ឋអាមេរិក ។ ភ្នាក់ងារនេះបានដាក់ស្លាកអក្សរកាត់អង្គភាពនោះថា APT31 គឺជាបណ្តុំនៃមន្ត្រីចារកម្មចិនធ្វើការឲ្យក្រសួងសន្តិសុខរដ្ឋចិន (MSS) ដែលមានសាខានៅខេត្ត Hubei និងធ្វើយុទ្ធនាការចារកម្មតាមអនឡាញស្របច្បាប់ ។

មន្រ្តីទាំងនោះបានបង្កើតក្រុមហ៊ុនមួយឈ្មោះថា Wuhan Xiaoruizhi Science and Technology នេះឡើងដើម្បីប្រើប្រាស់ជាជួរមុខក្នុងការអនុវត្តយុទ្ធនាការទាំងនោះ ខណៈកន្លងមក APT31 បានកំណត់គោលដៅទៅលើមន្ត្រីជាន់ខ្ពស់អាមេរិក និងទីប្រឹក្សារបស់ពួកគេ រួមទាំងនៅសេតវិមាន នាយកដ្ឋានយុត្តិធម៌ ពាណិជ្ជកម្ម សេដ្ឋកិច្ច សមាជិកសភា និងអ្នកដទៃទៀតជាដើម ៕

អត្ថបទ ៖ ប៊ុន សុភាព