កងកម្លាំងអ៊ីស្រាអែល ដកចេញពីមន្ទីរពេទ្យ Al-Shifa ក្រោយឡោមព័ទ្ធ ១៤ថ្ងៃ

ពេលនេះ កងកម្លាំងអ៊ីស្រាអែល បានដកខ្លួនចេញពីមន្ទីរពេទ្យ Al-Shifa ក្នុងតំបន់ហ្គាហ្សា ហើយ បន្ទាប់ពីការឡោមព័ទ្ធអស់រយៈពេល១៤ថ្ងៃ។

អ្នកនាំពាក្យក្រសួងការពារស៊ីវិលហ្គាហ្សាលោក Mahmoud Bassal បានប្រាប់ CNN នៅថ្ងៃចន្ទទី១ខែមេសាថា “ស្ថានភាពគឺអាក្រក់ណាស់។ សាកសពនិង​អ្នក​របួស នៅរដូករណែល ​ពេញ​មន្ទីរពេទ្យ ហើយក៏មានសាកសពកប់នៅទីធ្លាមន្ទីរពេទ្យផងដែរ”។

មានអ្នករបួសជាង៣០នាក់ ត្រូវបានដឹកពី Al-Shifa ទៅកាន់មន្ទីរពេទ្យមួយទៀតឈ្មោះ Al-Ahli Baptist នៅភាគខាងកើតទីក្រុង ហ្គាហ្សា ហើយមន្ទីរពេទ្យត្រូវបានបំផ្លាញស្ទើរតែទាំងស្រុង។

ស្របពេលជាមួយគ្នានោះ ជុំវិញការដកទ័ពនេះ CNN ក៏បានទាក់ទងទៅកងកម្លាំងការពារអ៊ីស្រាអែល (IDF) ដើម្បីសុំការអត្ថាធិប្បាយដែរ ប៉ុន្តែមិនទទួលបានការឆ្លើយតបឡើយ។

សូមបញ្ជាក់ អ៊ីស្រាអែលបានចាប់ផ្តើមប្រតិបត្តិការនៅមន្ទីរពេទ្យ Al-Shifa កាលពីថ្ងៃទី១៨ខែមីនា ក្នុងអ្វីដែលខ្លួនហៅថាជា “សកម្មភាពប្រតិបត្តិការច្បាស់លាស់ប្រឆាំងនឹងក្រុមភេរវករ”។

កាលពីសប្តាហ៍មុន រដ្ឋមន្ត្រីការពារជាតិអ៊ីស្រាអែល លោក Yoav Gallant ប្រកាសថា ប្រតិបត្តិការរបស់អ៊ីស្រាអែល នៅមន្ទីរពេទ្យនេះ បានសម្លាប់ភេរវករ២០០នាក់ និងចាប់បានប្រហែល ៥០០នាក់ រួមទាំងមេបញ្ជាការជាន់ខ្ពស់ផងដែរ។

មន្ទីរពេទ្យ Al-Shifa គឺជាកន្លែងព្យាបាលធំបំផុតនៅក្នុងតំបន់ហ្គាហ្សា ហើយបន្ទាប់ពីសង្រ្គាមអ៊ីស្រាអែល-ហាម៉ាស ផ្ទុះឡើងចាប់តាំងពីថ្ងៃទី៧ខែតុលាឆ្នាំ២០២៣មក, យោធាអ៊ីស្រាអែលបានវាយឆ្មក់ចូលមន្ទីរពេទ្យ Al-Shifa និងប្រកាសនៅដើមខែវិច្ឆិកាថា ទីនោះត្រូវបានប្រើប្រាស់ដោយក្រុមហាម៉ាសធ្វើជាមជ្ឈមណ្ឌលបញ្ជាការនិងគ្រប់គ្រង ហើយអាវុធនិងចំណាប់ខ្មាំង ក៏ត្រូវបានទុកនៅទីនោះដែរ៕

អត្ថបទ៖ សុខ សុវណ្ណ

ចុចអាន៖ តុលាការកំពូលរបស់អង្គការសហប្រជាជាតិបញ្ជាឱ្យអ៊ីស្រាអែលបើកលំហូរជំនួយមនុស្សធម៌ទៅតំបន់ហ្គាហ្សា បន្ទាន់