មនុស្សរាប់លាននាក់នៅ អាហ្វ្រិកខាងត្បូង ជួបគ្រោះរាំងស្ងួតខ្លាំង និងកំពុងអត់ឃ្លាន

គ្រោះរាំងស្ងួតខ្លាំងនៅអាហ្វ្រិកខាងត្បូងធ្វើឲ្យមនុស្សរាប់លាននាក់កំពុងប្រឈមនឹងបញ្ហាអត់ឃ្លានកាន់តែធ្ងន់ធ្ងរ ។ នេះបើយោងតាមការចេញផ្សាយរបស់សារព័ត៌មាន AP នៅថ្ងៃទី០១​ ខែមីនានេះ ។

ប្រទេសនៅអាហ្វ្រិកខាងត្បូងដែលកំពុងជួបវិបត្តិគ្រោះរាំងស្ងួតនេះរួមមានហ្ស៊ីមបាវ៉េ សំប៊ី និងម៉ាឡាវី ខណៈគ្រោះរាំងស្ងួតក៏បានទៅដល់ប្រទេសបុតស្វាណា អង់ហ្គោឡា ម៉ូសំប៊ិក និងម៉ាដាហ្គាស្ការផងដែរ ។

យោងតាមអង្គការមូលនិធិកុមាររបស់អង្គការសហប្រជាជាតិបានឲ្យដឹងថា វិបត្តិត្រួតស៊ីគ្នានៃឥទ្ធិពលអាកាសធាតុអាក្រក់ខ្លាំងនៅភាគខាងកើត និងភាគខាងត្បូងនៃទ្វីបអាហ្រ្វិក ដោយសារតែតំបន់ទាំងពីរនេះស្ថិតនៅចន្លោះព្យុះ ទឹកជំនន់ និងកម្ដៅ ក៏ដូចជាគ្រោះរាំងស្ងួតជាដើម ។

ចំណែក UNICEF ក៏បាននិយាយដែរថា ប្រជាជនម៉ាឡាវីប្រមាណ ៩ លាននាក់ដែលពាក់កណ្តាលនៃពួកគេជាកុមារកំពុងត្រូវការជំនួយ ។ ក្នុងនោះជាង ៦ លាននាក់នៅក្នុងប្រទេសសំប៊ី ដែល ៣ លាននាក់ក្នុងចំណោមពួកគេគឺជាកុមារត្រូវបានរងផលប៉ះពាល់ដោយគ្រោះរាំងស្ងួត​ ខណៈជិតពាក់កណ្តាលនៃចំនួនប្រជាជនម៉ាឡាវី និង ៣០ ភាគរយនៃប្រជាជនសំប៊ីក៏កំពុងរងផលប៉ះពាល់ពីគ្រោះរាំងស្ងួតនេះផងដែរ ។

ទន្ទឹមនោះ ប្រជាជនរាប់លាននាក់នៅហ្ស៊ីមបាវ៉េ ម៉ាឡាវី ម៉ូសំប៊ិក និងម៉ាដាហ្គាស្ការក៏មិនអាចផ្គត់ផ្គង់ផលដំណាំបានគ្រប់គ្រាន់ផងដែរនៅឆ្នាំ ២០២៥ ។ ចំណែកទីភ្នាក់ងារ USAID បានប៉ាន់ប្រមាណថាមនុស្ស ២០ លាននាក់នឹងត្រូវការជំនួយស្បៀងអាហារនៅអាហ្វ្រិកខាងត្បូងក្នុង ប៉ុន្មានខែដំបូងនៃឆ្នាំ ២០២៤ នេះ ។

គួរបញ្ជាក់ថា មនុស្សជាច្រើននឹងមិនទទួលបានជំនួយនោះទេ ដោយសារភ្នាក់ងារផ្តល់ជំនួយក៏មិនមានធនធានគ្រប់គ្រាន់ផងដែរ ចំពេលមានវិបត្តិភាពអត់ឃ្លានជាសកល និងការកាត់បន្ថយការផ្តល់មូលនិធិមនុស្សធម៌ដោយរដ្ឋាភិបាល ៕

អត្ថបទ ៖ ប៊ុន សុភាព