Connect with us

ព័ត៌មានអន្ដរជាតិ

កូរ៉េខាងត្បូង ដាក់ទណ្ឌកម្មកប៉ាល់ រុស្ស៊ី ដែលជួយដឹកអាវុធឲ្យ កូរ៉េខាងជើង

បានផុស

នៅ

កូរ៉េខាងត្បូង​បាន​ដាក់​ទណ្ឌកម្ម​ប្រឆាំង​នឹង​រុស្ស៊ី​ចំពោះ​ការចូលរួម​ជួយ​ក្នុងសកម្មភាពអភិវឌ្ឍការផលិតអាវុធរបស់​​កូរ៉េខាងជើង ។ នេះបើយោងតាមការចេញផ្សាយដោយទូរទស្សន៍ជាតិជប៉ុន NHK នៅថ្ងៃទី​០២ ខែមេសានេះ ។​

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងការបរទេសកូរ៉េខាងត្បូងបានប្រកាសថា កប៉ាល់រុស្ស៊ី ២ គ្រឿង ក្រុមហ៊ុនចំនួន ២ និងបុគ្គល ២ រូបដែលតំណាងឲ្យអង្គការទាំងនេះត្រូវទទួលរងទណ្ឌកម្ម ។ ការដាក់ទណ្ឌកម្មនេះ គឺដោយសារតែកប៉ាល់ទាំងនោះមានជាប់ពាក់ព័ន្ធនឹងការផ្គត់ផ្គង់សម្ភារយៈយោធារវាងរុស្ស៊ី និងកូរ៉េខាងជើង ដោយបំពានលើដំណោះស្រាយរបស់ក្រុមប្រឹក្សាសន្តិសុខអង្គការសហប្រជាជាតិ ខណៈកប៉ាល់ទាំង​នោះក៏នឹង​ត្រូវ​បាន​ហាម​មិន​ឲ្យចូល​កំពង់ផែ​កូរ៉េ​ខាង​ត្បូងផងដែរ ប្រសិនបើ​គ្មាន​ការ​អនុញ្ញាត ។

ក្រុមហ៊ុនទាំងពីរ និងអ្នកតំណាងរបស់ពួកគេត្រូវបានសង្ស័យ​ថា ជួយបុគ្គលិក IT របស់កូរ៉េខាងជើងចូលទៅក្នុងប្រទេសរុស្ស៊ីតាមរយៈការផ្តល់ឯកសារ និងជួយ​កម្មករ​ទាំង​នេះ​រក​ប្រាក់​ពីបរទេស​សម្រាប់ជំនួយដល់កម្មវិធី​នុយក្លេអ៊ែរ និង​មីស៊ីល​របស់ទី​ក្រុង​ព្យុងយ៉ាង ។ ក្រោមការដាក់ទណ្ឌកម្មនេះទៀតសោត ក្រុមហ៊ុន និងបុគ្គលទាំងនោះប្រឈមមុខនឹងការដាក់កំហិតលើប្រតិបត្តិការរូបិយវត្ថុក្នុងប្រទេសកូរ៉េខាងត្បូងផងដែរ ។

ទីក្រុងសេអ៊ូលកន្លងមកបានទាមទារឲ្យរុស្ស៊ីបញ្ឈប់ជាបន្ទាន់នូវទំនាក់ទំនងខុសច្បាប់ណាមួយជាមួយកូរ៉េខាងជើង រួមទាំងកិច្ចសហប្រតិបត្តិការយោធាផងដែរ ខណៈកិច្ចសហប្រតិបត្តិការនេះគំរាមកំហែងយ៉ាងធ្ងន់ធ្ងរដល់សន្តិភាព និងស្ថិរភាពនៅឧបទ្វីបកូរ៉េ និងជុំវិញពិភពលោក ។ ទន្ទឹមនោះ ទីក្រុងសេអ៊ូលក៏នឹងពិចារណាការដាក់ទណ្ឌកម្មបន្ថែមផងដែរ ប្រសិនបើនៅតែមានការគំរាមកំហែងចំពោះសន្តិសុខជាតិ ។

គួរបញ្ជាក់ថា ការ​ដាក់​ទណ្ឌកម្ម​នេះ​កើតមាន​ឡើង​ ខណៈ​ដែល​ក្រុង​មូស្គូ​ហាក់​កំពុង​ព្យាយាម​ពង្រឹង​ទំនាក់​ទំនង​ជាមួយ​កូរ៉េ​ខាង​ជើង ស្របពេលដែល ប្រធានទីភ្នាក់ងារចារកម្មបរទេសរបស់រុស្ស៊ីក៏បានទៅបំពេញទស្សនកិច្ចនៅទីក្រុងព្យុងយ៉ាងកាលពីខែមីនា ហើយអាចនឹងមានដំណើររបស់លោកប្រធានាធិបតី វ្ល៉ាឌីមៀរ ពូទីន ទៅកូរ៉េខាងជើងផងដែរ ៕

អត្ថបទ ៖​ ប៊ុន សុភាព

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម