ព័ត៌មានអន្ដរជាតិ

ក្រុមប្រឹក្សាសន្តិសុខ UN ជួបគ្នាល្ងាចនេះជុំវិញ ការវាយប្រហាររបស់អ៉ីរ៉ង់លើអ៉ីស្រាអែល

បានផុស

២ years មុន

នៅ

ថ្ងៃអាទិត្យ ១៤ មេសា ២០២៤

ដោយ

ក្រុមប្រឹក្សាសន្តិសុខអង្គការសហប្រជាជាតិគ្រោងនឹងជួបប្រជុំគ្នានៅល្ងាចថ្ងៃអាទិត្យ ទី១៤ ខែមេសា ឆ្នាំ២០២៤ បន្ទាប់ពីប្រទេសអ៉ីស្រាអែលបានស្នើសុំឲ្យក្រុមប្រឹក្សាធ្វើការថ្កោលទោសចំពោះការវាយប្រហាររបស់ប្រទេសអ៉ីរ៉ង់ និងចាត់ទុកក្រុមកម្លាំងឆ្មាំបដិវត្តន៍អ៉ីរ៉ង់ជាអង្គការភេរវករមួយ។

យោងតាមកាលវិភាគដែលបានចេញនៅយប់ថ្ងៃសៅរ៍ ទី១៣ ខែមេសា ឆ្នាំ២០២៤ ថា កិច្ចប្រជុំក្រុមប្រឹក្សាសន្តិសុខអង្គការសហប្រជាជាតិគ្រោងធ្វើនៅវេលាម៉ោង៤ល្ងាច (ET 2000 GMT)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឯកអគ្គរដ្ឋទូតអ៉ីស្រាអែលប្រចាំនៅអង្គការសហប្រជាជាតិ លោក Gilad Erdan បានស្នើសុំទៅក្រុមប្រឹក្សាសន្តិសុខអង្គការសហប្រជាជាតិឲ្យរៀបចំកិច្ចប្រជុំពិសេសបន្ទាន់មួយក្នុងលិខិតដែលបានផ្ញើទៅប្រធានក្រុមប្រឹក្សាកាលពីយប់ថ្ងៃសៅរ៍។

«ការវាយប្រហាររបស់អ៉ីរ៉ង់គឺជាការគំរាមកំហែងយ៉ាងធ្ងន់ធ្ងរដល់សន្តិភាព និងសន្តិសុខសកល ហើយខ្ញុំរំពឹងថា ក្រុមប្រឹក្សាសន្តិសុខអង្គការសហប្រជាជន នឹងប្រើប្រាស់កិច្ចប្រជុំនេះដើម្បីឆ្លើយតបយ៉ាងម៉ត់ចត់ប្រឆាំងនឹងអ៉ីរ៉ង់»។ លោក Erdan បានសរសេរនៅលើ X។

ប្រទេសអ៉ីរ៉ង់បានធ្វើការវាយប្រហារសងសឹកលើកទី១កាលពីថ្ងៃសៅរ៍ ទី១៣ ខែមេសា ឆ្នាំ២០២៤ ដោយបាញ់គ្រាប់មីស៊ីល និងយន្តហោះគ្មានមនុស្សជិះជាង២០០គ្រាប់ទៅលើទឹកដីប្រទេសអ៉ីស្រាអែល។

អ៉ីរ៉ង់បានប្តេជ្ញាចំពោះការសងសឹកពាក់ព័ន្ធនឹងការវាយប្រហាររបស់អ៉ីស្រាអែលទៅលើស្ថានកុងសូលដាម៉ាស់កាលពីថ្ងៃទី១ ខែមេសា ដែលបានសម្លាប់មន្ត្រីឆ្មាំការពារ៧នាក់ ក្នុងនោះមានមេបញ្ជាការ២នាក់។ ពួកគេបាននិយាយថា ការវាយប្រហារនោះគឺជា«ឧក្រិដ្ឋកម្មអ៉ីស្រាអែល»។

ការវាយប្រហារសងសឹកនេះក៏ធ្វើឲ្យមានការព្រួយបារម្ភពីជម្លោះកាន់តែធ្ងន់ធ្ងរ ស្របពេលសហរដ្ឋអាមេរិកបានសន្យាគាំទ្រអ៉ីស្រាអែល។

អគ្គលេខាធិការអង្គការសហប្រជាជាតិ លោក Antonio Guterres បានថ្កោលទោសចំពោះការវាយប្រហាររបស់អ៉ីរ៉ង និងបាននិយាយថា លោកព្រួយបារម្ភយ៉ាងខ្លាំងអំពោះគ្រោះមហន្តរាយកាន់តែធ្ងន់ធ្ងរនៅក្នុងតំបន់៕

ប្រែសម្រួល៖ វីរបុត្រ
ប្រភព៖ reuters