បុរស​ម្នាក់​​ដុតសម្លាប់​ខ្លួនឯង​នៅ​ខាងក្រៅ​កន្លែងកាត់ក្តីលោក Trump

បុរស​ម្នាក់​បាន​ដុត​សម្លាប់ខ្លួន​ឯង​នៅ​ខាង​ក្រៅ​តុលាការ​ក្នុង​ក្រុង Manhattan ជា​កន្លែងដែល​សវនាការ​កំពុងកាត់​ទោស​អតីត​ប្រធានាធិបតីសហរដ្ឋអាមេរិក Donald Trump ។ នេះបើយោងតាមការចេញផ្សាយរបស់សារព័ត៌មាន BB​C នៅថ្ងៃទី​២០​ ខែមេសានេះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប៉ូលិសបាននិយាយថា បុរសម្នាក់បានដុតខ្លួនឯងនឹងរបស់រាវមួយនៅក្រៅតុលាការកាត់ក្ដីលោក Trump ខណៈអតីតប្រធានាធិបតីអាមេរិករូបនេះស្ថិតនៅក្នុងអគារមួយដើម្បីចូលរួមការជ្រើសរើសគណៈវិនិច្ឆ័យ ប៉ុន្តែក្នុងអំឡុងពេលឧប្បត្តិហេតុនោះ លោក Trump បានចាកចេញទៅហើយ ។

ប៉ូលិសបានកំណត់អត្តសញ្ញាណបុរសនោះថាមានឈ្មោះ Maxwell Azzarello អាយុ ៣៧ ឆ្នាំបានធ្វើដំណើរពីរដ្ឋផ្លរីដាមកកាន់ទីក្រុងញូវយ៉កកាលពីសប្តាហ៍មុន ខណៈបុរសនេះមិនមានប្រវត្តិឧក្រិដ្ឋកម្មនៅទីក្រុងញូវយ៉កទេ ហើយគ្រួសាររបស់គាត់នៅរដ្ឋផ្លរីដាមិនបានដឹងថាគាត់បានធ្វើដំណើរមកកាន់ទីក្រុងមួយនេះនោះទេ ។

យោងតាមសាក្សីបានឲ្យដឹងថា លោក Azzarello បានកំពុងដើរជុំវិញអគារនោះ មុនពេលឈានដល់ការដុតខ្លួនឯងជាមួយវត្ថុរាវ និងក្រដាសដែលងាយឆេះ ។ ក្រុមជួយសង្គ្រោះបានព្យាយាមជួយភ្លាមៗ និងបានបញ្ជូនទៅមន្ទីពេទ្យដោយមានរបួសធ្ងន់ធ្ងរ ហើយក៏មានមន្ត្រីតុលាការម្នាក់ បានរងរបួសស្រាលផងដែរ បន្ទាប់ពីជួយពន្លត់ភ្លើង ខណៈមូលហេតុដែលបណ្ដាលឲ្យបុរសនេះដុតខ្លួនឯងមិនទាន់ដឹងនៅឡើយទេ ចំណែកឯប៉ូលិសកំពុងបើកការស៊ើបអង្កេត ៕

អត្ថបទ ៖​ ប៊ុន សុភាព