អ៊ីស្រាអែល គំរាមប្រើថ្នាំខ្លាំងសងសឹក ប៉ាឡេស្ទីន បើតុលាការ ICC ហ៊ាន​ចេញដីកាចាប់ខ្លួនលោក Netanyahu

ក្នុងកិច្ចពិភាក្សាជាមួយសមភាគីអាមេរិកកាលពីថ្ងៃព្រហស្បតិ៍ ប្រទេសអ៊ីស្រាអែលបានគំរាមប្រើថ្នាំខ្លាំងសងសឹកប្រឆាំងនឹងអាជ្ញាធរប៉ាឡេស្ទីនក្នុងករណីបើតុលាការឧក្រិដ្ឋកម្មអន្តរជាតិ (ICC) ហ៊ានចេញដីកាចាប់ខ្លួនមន្ត្រីជាន់ខ្ពស់អ៊ីស្រាអែល ។ នេះបើយោងតាមការចេញផ្សាយដោយគេហទំព័រព័ត៌មានអាមេរិក Axios កាលពីថ្ងៃទី២ ខែឧសភាកន្លងទៅ ។

ទោះបច្ចុប្បន្នតុលាការ ICC មិនទាន់ចេញដីកាចាប់ខ្លួនជាផ្លូវការលើលោកនាយករដ្ឋមន្ត្រី Benjamin Netanyahu និងរដ្ឋមន្ត្រីការពារជាតិ Yoav Gallant រួមជាមួយកងកម្លាំងការពារជាតិអ៊ីស្រាអែលក៏ដោយ ប៉ុន្តែអ៊ីស្រាអែលក៏កំពុងភ័យខ្លួនផងដែរចំពោះលទ្ធភាពនៃការចេញដីកាចាប់ខ្លួនមួយនេះ ដោយសារតែអ៊ីស្រាអែលមានព័ត៌មានថា មន្ត្រីអាជ្ញាធរប៉ាឡេស្ទីនកំពុងដាក់សម្ពាធដល់រដ្ឋអាជ្ញា ICC ឲ្យរូតរះចេញដីការឲ្យបានលឿនតាមដែលធ្វើទៅបាន ។

ពាក់ព័ន្ធនឹងថ្នាំខ្លាំងដែលអ៊ីស្រាអែលនឹងឲ្យអាជ្ញាធរប៉ាឡេស្ទីនភ្លក់ ប្រសិនបើតុលាការ ICC ចេញដីការចាប់ខ្លួនអ្នកមុខអ្នកការអ៊ីស្រាអែលមែននោះ គឺទីក្រុងហ្ស៊េរុយសាឡិមអាចនឹងយកជម្រើសដកប្រាក់ចំណូលពន្ធរបស់អាជ្ញាធរប៉ាឡេស្ទីនដែលប្រមូលបានទាំងប៉ុន្មានចែកចាយទៅឲ្យរដ្ឋាភិបាល ។

ទន្ទឹមនោះ ការដាក់ចេញយុទ្ធសាស្ត្របែបនេះ គឺជាការសងសឹកខាងសេដ្ឋកិច្ច ពោលវាអាចឲ្យអាជ្ញាធរប៉ាឡេស្ទីនឈានទៅដល់ការដួលរលំ ជាពិសេសការក្ដោបក្ដាប់មួយចំនួននៅតំបន់ West Bank ដែលនៅក្រោមកិច្ចព្រមព្រៀង Oslo ឆ្នាំ ១៩៩៣ ។

ទោះបីជាយ៉ាងណាក៏ដោយ ICC មិនបញ្ជាក់ ឬបដិសេធចំពោះរបាយការណ៍នេះនេះទេ ដោយគ្រាន់តែប្រាប់សារព័ត៌មាន NBC ថា ក្រុមការងាររបស់តុលាការកំពុងបើកការស៊ើបអង្កេតដោយឯករាជ្យទាក់ទងនឹងស្ថានភាពក្នុងរដ្ឋប៉ាឡេស្ទីន ។

ការស៊ើបអង្កេតរបស់ ICC ចាប់ផ្តើមឡើងក្នុងឆ្នាំ ២០២១ ហើយជាប់ពាក់ព័ន្ធឧក្រិដ្ឋកម្មសង្រ្គាមដែលប្រព្រឹត្តដោយយោធាអ៊ីស្រាអែល និងក្រុមសកម្មប្រយុទ្ធប៉ាឡេស្ទីននៅតំបន់ West Bank និង Gaza ចាប់តាំងពីឆ្នាំ ២០១៤ មក ពេលដែលអ៊ីស្រាអែល ធ្វើសង្គ្រាមរយៈពេល ១ ខែប្រឆាំងនឹងក្រុមហាម៉ាស ។

គួរបញ្ជាក់ថា ប្រសិនបើ ICC ចេញដីកាចាប់ខ្លួនលោក Netanyahu មែននោះ នាយករដ្ឋមន្ត្រីអ៊ីស្រាអែលរូបនេះ ទំនងជាមិនត្រូវបាននាំទៅទីក្រុងឡាអេ ដើម្បីប្រឈមមុខនឹងការកាត់ក្តីទេ ព្រោះអ៊ីស្រាអែលក៏ដូចជាសហរដ្ឋអាមេរិក រុស្ស៊ី និងចិនដែរ គឺមិនមែនជាភាគីនៃលក្ខន្តិកៈទីក្រុងរ៉ូមឡើយ ហើយក៏មិនទទួលស្គាល់យុត្តាធិការរបស់តុលាការនេះដែរ ។ យ៉ាងណាក្តី ដីកាអាចដាក់លោក Netanyahu ឲ្យប្រឈមនឹងការចាប់ខ្លួន ប្រសិនបើគាត់ហោះទៅកាន់ប្រទេសណាមួយក្នុងចំណោមរដ្ឋជាសមាជិកទាំង ១២៤ ដែលទទួលស្គាល់តុលាការនេះ ៕

ដោយ ៖ សុខ ជីវ័ន្ត

ចុចអាន ៖ ប្រភពមួយទម្លាយថា សប្តាហ៍នេះ ICC នឹងចេញដីកាចាប់ខ្លួនលោក Netanyahu