អ៊ីស្រាអែល បើកការវាយលុកនៅ Rafah ហើយ ទោះក្រុមហាម៉ាស យល់ព្រមឈប់បាញ់ 

នៅទីបំផុត បើតាមការចុះផ្សាយរបស់ CNN កាលពីថ្ងៃចន្ទទី៦ខែឧសភា, ក្រុមហាម៉ាស បានយល់ព្រមទទួលយកបទឈប់បាញ់ដែលដាក់ចេញដោយអ្នកសម្រុះសម្រួលអេហ្ស៊ីបនិងកាតា ហើយ ខណៈអ៊ីស្រាអែល បើកការវាយប្រហារយ៉ាងសន្ធាប់លើទីក្រុង Rafah ក្នុងតំបន់ហ្គាហ្សា ក្រោយចេញបញ្ជាឲ្យប្រជាជនជម្លៀសបានមួយថ្ងៃ។

មេដឹកនាំក្រុមហាម៉ាសលោក Ismail Haniyeh បានសន្ទនាតាមទូរស័ព្ទជាមួយនាយករដ្ឋមន្ត្រីកាតា Sheikh Mohammed bin Abdul Rahman Al Thani និងរដ្ឋមន្ត្រីចារកម្មអេហ្ស៊ីប Abbas Kamel ដោយជូនដំណឹងដល់ថ្នាក់ដឹកនាំទាំងពីរ អំពីការឯកភាពរបស់ចលនាហាម៉ាស ចំពោះសំណើទាក់ទងនឹងកិច្ចព្រមព្រៀងឈប់បាញ់នេះ។

យ៉ាងណាក៏ដោយ ព័ត៌មានលម្អិតនៃសំណើខាងលើ មិនទាន់ត្រូវបានផ្សព្វផ្សាយជាសាធារណៈនៅឡើយទេ ប៉ុន្តែគេដឹងថា កន្លងមក ក្រុមហាម៉ាស បានទាមទារឲ្យមានបទឈប់បាញ់លក្ខណៈអចិន្ត្រៃយ៍ ហើយលក្ខខណ្ឌក៏រួមបញ្ចូលទាំងការតម្រូវឲ្យដកកងទ័ពអ៊ីស្រាអែលទាំងអស់ចេញពីតំបន់ប៉ាឡេស្ទីនផងដែរ។

ទោះបែបនេះក្តី នាយករដ្ឋមន្ត្រីអ៊ីស្រាអែល លោក Benjamin Netanyahu បានបដិសេធធានាចំពោះលក្ខខណ្ឌទាំងនេះ ដោយព្រមានកាលពីសប្តាហ៍មុនថា អ៊ីស្រាអែលនឹងមិនអនុញ្ញាតឲ្យក្រុមហាម៉ាស បន្តកាន់អំណាចនៅហ្គាហ្សាឡើយ។

ព័ត៌មានអំពីការទទួលយកបទឈប់បាញ់របស់ក្រុមហាម៉ាស កើតឡើងចំពេលកម្លាំងការពារអ៊ីស្រាអែល (IDF) ប្រកាសថា ខ្លួនបានបើកប្រតិបត្តិការវាយលុកគោលដៅក្រុមហាម៉ាស នៅទីក្រុង Rafah ហើយ។

មុនការវាយប្រហារ យោធាអ៊ីស្រាអែល ក៏បានចេញបញ្ជាឲ្យជនស៊ីវិលប៉ាឡេស្ទីន ១០០ ០០០នាក់ចាកចេញពីភាគខាងកើតទីក្រុង Rafah ជាបន្ទាន់ ផងដែរ។

តាមការអះអាងពីលោក Netanyahu, ប្រតិបត្តិការយោធានៅទីនោះ ពិតជាចាំបាច់ណាស់ ដើម្បីកម្ចាត់សកម្មប្រយុទ្ធក្រុមហាម៉ាសដែលនៅសេសសល់ ហើយទោះអន្តរជាតិបង្ហាញក្តីបារម្ភម្តងហើយម្តងទៀតក៏ដោយ ក៏លោកមិនខ្វល់ដែរ។

សូមបញ្ជក់ជាថ្មី ក្រុមហាម៉ាស បានសម្រុកចូលវាយប្រហារភាគខាងត្បូងប្រទេសអ៊ីស្រាអែលកាលពី​ថ្ងៃ​ទី​៧ ខែ​តុលាឆ្នាំ២០២៣ ​ដោយសម្លាប់មនុស្សយ៉ាងតិច ១ ២០០ នាក់ និង ២៥០ នាក់​ត្រូវ​បាន​ចាប់​ជា​ចំណាប់​ខ្មាំង។

ជាការសងសឹក អ៊ីស្រាអែលក៏ផ្តើមវាយប្រហារតាមអាកាស និងជើងគោក ដោយសម្លាប់ពលរដ្ឋប៉ាឡេស្ទីន ៣៤ ៥៦៨ នាក់ ខណៈ ៧៧ ៧៦៥ នាក់ផ្សេងទៀតរងរបួស៕

អត្ថបទ៖ សុខ សុវណ្ណ

ចុចអាន៖ អ៊ីស្រាអែល បញ្ជាឲ្យជម្លៀសមនុស្សចេញពីទីក្រុង Rafah ជាប្រញាប់