ព័ត៌មានអន្ដរជាតិ

កូរ៉េខាងជើង បង្កើតនាយកដ្ឋានថ្មី ជំរុញការប្រើប្រាស់បច្ចេកវិទ្យា AI

បានផុស

២ ខែ មុន

នៅ

ថ្ងៃអង្គារ ៧ ឧសភា ២០២៤

ដោយ

យោធាកូរ៉េខាងជើង កាលពីពេលថ្មីៗកន្លងទៅ បានបង្កើតនូវនាយកដ្ឋានថ្មីមួយទៀត ដែលពាក់ព័ន្ធនឹងការប្រើបច្ចេកវិទ្យាបញ្ញាសិប្បនិម្មិត (AI) សម្រាប់ការការពារជាតិ។ នេះបើយោងតាមការចុះផ្សាយរបស់សារព័ត៌មានកូរ៉េខាងត្បូង Daily NK នៅថ្ងៃទី៧ ខែឧសភា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រភពពីយោធាកូរ៉េខាងជើង បានប្រាប់ថា នាយកដ្ឋានថ្មីនេះ មានឈ្មោះថា “សង្គ្រាមអេឡិចត្រូនិច និងបទបញ្ជាប្រតិបត្តិការ AI (Electronic Warfare and AI Operation Command) ដែលត្រូវបានបង្កើតឡើងកាលពីចុងខែមីនាកន្លងទៅ ហើយបានប្រើប្រាស់ក្រុមអ្នកបច្ចេកទេសដែលមានសមត្ថភាពក្នុងវិស័យការពារជាតិ និងវិស័យយោធា។

បច្ចុប្បន្ន នាយកដ្ឋាននេះកំពុងសម្ងំអភិវឌ្ឍ និងបង្កើតគម្រោងប្រព័ន្ធគាំទ្រសង្គ្រាមដោយផ្អែកលើបច្ចេកវិទ្យា AI ក្រោមកិច្ចសហការជាមួយក្រសួងការពារជាតិកូរ៉េខាងជើង លើការវិភាគទិន្នន័យ និងការធ្វើផែនការប្រតិបត្តិការដោយស្វយប្រវត្តិ ឲ្យបានត្រឹមចុងខែតុលាខាងមុខ សម្រាប់ត្រៀមប្រើនៅក្នុងសមយុទ្ធនៅចុងឆ្នាំ២០២៤នេះ។ គោលបំណងនៃគម្រោងនេះ គឺដើម្បីបង្កើនសមត្ថភាពបទបញ្ជាប្រតិបត្តិការរបស់យោធាឲ្យបានរហ័ស និងត្រឹមត្រូវ អំឡុងពេលមានសង្គ្រាមផ្ទុះឡើង។

គួររំឭកថា សារព័ត៌មានរដ្ឋកូរ៉េខាងជើង KCNA ធ្លាប់ចុះផ្សាយកាលពីខែមករាកន្លងទៅថា រដ្ឋាភិបាលក្រុងព្យុងយ៉ាងគ្រោងនឹងប្រើប្រាស់ថវិកាជាតិចំនួន ១៥,៩% នៃការចំណាយថវិកាជាតិសរុប សម្រាប់វិស័យការពារជាតិឆ្នាំ២០២៤នេះ។ យ៉ាងណាមិញ តួលេខជាចំនួនទឹកប្រាក់ជាក់លាក់មិនត្រូវបានទម្លាយឲ្យដឹងនោះឡើយ៕

ដោយ៖ ឈាង

Related Topics:ប្រទេសកូរ៉េខាងជើង