ក្រុមឧទ្ទាម មីយ៉ាន់ម៉ា ដណ្ដើមបានទីក្រុងជិតព្រំដែន បង់ក្លាដែស ពីរដ្ឋាភិបាលយោធា

ក្រុមឧទ្ទាមដ៏មានឥទ្ធិពលនៅក្នុងប្រទេសមីយ៉ាន់ម៉ាបានវាយដណ្ដើមយកទីក្រុងមួយនៅភាគខាងលិចនៃរដ្ឋរ៉ាក់ឃីនដែលបណ្ដាលឲ្យជនជាតិរ៉ូហ៊ីងយ៉ាកំពុងរស់នៅទីនោះភៀសខ្លួនចេញ បន្ទាប់ពីមានការប្រយុទ្ធគ្នាជាច្រើនសប្តាហ៍ ។ នេះបើយោងតាមការចេញផ្សាយរបស់ទីភ្នាក់ងារព័ត៌មាន Reuters កាលពីថ្ងៃទី១៩ ខែឧសភាកន្លងទៅ ។

យោងតាមអ្នកនាំពាក្យរបស់កងកម្លាំងអារ៉ាកាន់ (AA) បានឲ្យដឹងថា ក្រុមនេះបានដណ្តើមយកបាន និងចូលកាន់កាប់ ទីក្រុង Buthidaung នៅជិតព្រំដែនប្រទេសមីយ៉ាន់ម៉ា ជាមួយប្រទេសបង់ក្លាដែស ដែលជាការបរាជ័យក្នុងសមរភូមិប្រយុទ្ធមួយទៀតរបស់រដ្ឋាភិបាលយោធាដែលកំពុងកាន់អំណាច ។

ពាក់ព័ន្ធនឹងបញ្ហានេះដែរ ជនរ៉ូហ៊ីងយ៉ាមួយចំនួនក៏បានចោទប្រកាន់កងកម្លាំង AA ថាបានកំណត់គោលដៅលើសហគមន៍របស់ខ្លួន ក្នុងអំឡុងពេលវាយលុកលើទីក្រុង Buthidaung និងតំបន់ជុំវិញដោយបង្ខំពួកគេជាច្រើននាក់ឲ្យភៀសខ្លួនដើម្បីសុវត្ថិភាព ។

សាក្សីផ្ទាល់ភ្នែកបានអះអាងថា កងទ័ព AA បានចូលមកក្នុងទីប្រជុំជន ដោយបង្ខំឲ្យប្រជាជនចាកចេញពីផ្ទះសម្បែងរបស់ពួកគេ ហើយកងទ័ពបានចាប់ផ្តើមដុតផ្ទះប្រជាពលរដ្ឋក្នុងទីក្រុង Buthidaung ឲ្យឆេះនៅសល់តែផេះផង់ប៉ុណ្ណោះ ។

គួរបញ្ជាក់ថា ជនរ៉ូហ៊ីងយ៉ាបានប្រឈមមុខនឹងការធ្វើទុក្ខបុកម្នេញនៅក្នុងប្រទេសមីយ៉ាន់ម៉ាអស់រយៈពេលជាច្រើនឆ្នាំមកហើយ បន្ទាប់ពីបានរត់គេចពីការបង្រ្កាបដែលដឹកនាំដោយយោធាក្នុងឆ្នាំ ២០១៧ ហើយពួកគេជិត ១ លាននាក់បានរស់ក្នុងជំរុំជនភៀសខ្លួននៅតំបន់ Cox’s Bazar ជាប់ព្រំដែនប្រទេសបង់ក្លាដែស ។ ស្របពេលជាមួយគ្នានេះ ប្រទេសមីយ៉ាន់ម៉ាក៏បានស្ថិតក្នុងភាពចលាចលផងដែរ ចាប់តាំងពីរដ្ឋប្រហារយោធាឆ្នាំ ២០២១ ដែលនាំឲ្យមានការកើនឡើងនៃការប្រយុទ្ធគ្នាជាមួយនឹងក្រុមឧទ្ទាមជនជាតិភាគតិច ។

ជម្លោះកាន់តែខ្លាំងបានកើនឡើង ចាប់តាំងពីខែតុលាឆ្នាំមុន នៅពេលដែលសម្ព័ន្ធមិត្តនៃកងទ័ពជនជាតិភាគតិច រួមទាំងកងកម្លាំង AA បានបើកការវាយលុកដ៏ធំមួយនៅជិតព្រំដែនចិន ដណ្តើមយកទឹកដីជាច្រើនពីរដ្ឋាភិបាលយោធាដែលរហូតមកដល់ពេលនេះ បានបាត់បង់ការគ្រប់គ្រងប្រហែលពាក់កណ្តាលនៃទីតាំងយោធាចំនួន ៥,២៨០ របស់ខ្លួន ហើយនេះជាបញ្ហាប្រឈមដ៏ធំមួយរបស់រដ្ឋាភិបាលដែលកំពុងកាន់អំណាច ៕

អត្ថបទ៖ ប៊ុន សុភាព