ព័ត៌មានអន្ដរជាតិ

ប្រទេសអឺរ៉ុប១ទៀតហើយ ប្រកាសទទួលស្គាល់រដ្ឋប៉ាឡេស្ទីន

បានផុស

២ years មុន

នៅ

ថ្ងៃពុធ ៥ មិថុនា ២០២៤

ដោយ

Chheang

សភាស្លូវេនី កាលពីថ្ងៃអង្គារទី៤ ខែមិថុនា បានសម្រេចអនុម័តក្រឹត្យទទួលស្គាល់រដ្ឋប៉ាឡេស្ទីន បន្ទាប់ពីការទទួលស្គាល់ដោយប្រទេសអឺរ៉ុបចំនួន៣ផ្សេងទៀតមានដូចជា អេស្ប៉ាញ អៀរឡង់ និងន័រវេស កាលពីសប្ដាហ៍មុន។

លោក Robert Golob នាយករដ្ឋមន្ត្រីស្លូវេនី (រូបភាព៖ AFP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការអនុម័តនេះ ធ្វើឡើងក្រោយពីមានការបោះឆ្នោតដោយសមាជិកសភាចំនួន ៩០រូប ហើយក្នុងនោះក្រឹត្យទទួលស្គាល់រដ្ឋប៉ាឡេស្ទីន ទទួលបានសម្លេងគាំទ្រចំនួន ៥២សម្លេង។ គណបក្សប្រឆាំងនៅស្លូវេនី បានធ្វើពហិការមិនចូលរួមបោះឆ្នោត នៅក្នុងសម័យប្រជុំអស់រយៈពេល៦ម៉ោងយ៉ាងច្របូកច្របល់នេះទេ។

លោក Robert Golob នាយករដ្ឋមន្ត្រីស្លូវេនី បានសរសេរនៅលើគណនីផ្លូវការរបស់រដ្ឋាភិបាលតាមរយៈបណ្ដាញសង្គម X ថា “ការទទួលស្គាល់ប៉ាឡេស្ទីនជារដ្ឋអធិបតេយ្យ និងឯករាជ្យ បានផ្ដល់ក្ដីសង្ឃឹមចំពោះប្រជាជនប៉ាឡេស្ទីនដែលនៅតំបន់ West Bank និងនៅតំបន់ហ្គាហ្សា”។

ស្លូវេនី បានក្លាយជាប្រទេសចុងក្រោយគេ បន្ទាប់ពីការទទួលស្គាល់រដ្ឋប៉ាឡេស្ទីនរួចមកហើយដោយបណ្ដាប្រទេសសមាជិកចំំនួន ១៤៥ នៅក្នុងអង្គការសហប្រជាជាតិ។ ការចែងនៅក្នុងក្រឹត្យថ្មី បានបញ្ជាក់ថា រដ្ឋាភិបាលស្លូវេនី នឹងទទួលស្គាល់អធិបតេយ្យរបស់ប៉ាឡេស្ទីន ស្របតាមសេចក្ដីសម្រេចអង្គការសហប្រជាជាតិឆ្នាំ១៩៦៧ ឬក៏ធ្វើតាមកិច្ចព្រមព្រៀងសន្តិភាពណាមួយ ដែលនឹងធ្វើឡើងដោយភាគីជម្លោះទាំងសងខាង នាថ្ងៃខាងមុខ។

សូមបញ្ជាក់ថា ការវាយប្រហារនៅថ្ងៃទី៧ ខែតុលា ឆ្នាំ២០២៣ ដោយក្រុមហាម៉ាស នៅភាគខាងត្បូងប្រទេសអ៊ីស្រាអ៊ែល បានបណ្ដាលឲ្យមានមនុស្សស្លាប់ជាង ១ ១៧០នាក់ ក្នុងនោះភាគច្រើនគឺជាជនស៊ីវិល ហើយក៏មានការចាប់ចំណាប់ខ្មាំងចំនួន ២៥២នាក់ផងដែរ។ នេះបើយោងតាមរបាយការណ៍ចុះផ្សាយដោយសារព័ត៌មាន AFP។

ជាការសងសឹក ក្រុមយោធាអ៊ីស្រាអ៊ែល បានវាយបក និងសម្លាប់មនុស្សយ៉ាងហោចណាស់ ៣៥ ៩៨៤នាក់នៅតំបន់ហ្គាហ្សា ហើយភាគច្រើនគឺជាជនស៊ីវិល៕

ដោយ៖ ឈាង

អានបន្ថែម៖ អេស្ប៉ាញ អៀរឡង់ និងន័រវេស ប្រកាសរួមគ្នាទទួលស្គាល់រដ្ឋប៉ាឡេស្ទីន