ព័ត៌មានអន្ដរជាតិ

អេស្ប៉ាញ អៀរឡង់ និងន័រវេស ប្រកាសរួមគ្នាទទួលស្គាល់រដ្ឋប៉ាឡេស្ទីន

បានផុស

២ ខែ មុន

នៅ

ថ្ងៃអង្គារ ២៨ ឧសភា ២០២៤

ដោយ

អេស្ប៉ាញ អៀរឡង់ និងន័រវេស នឹងប្រកាសទទួលស្គាល់រដ្ឋប៉ាឡេស្ទីន នៅថ្ងៃទី២៨ ខែឧសភា នេះ បើទោះជាមានប្រតិកម្មមិនពេញចិត្តខ្លាំងពីសំណាក់ប្រទេសអ៊ីស្រាអ៊ែលក៏ដោយ។ នេះបើយោងតាមការចុះផ្សាយរបស់ទីភ្នាក់ងារព័ត៌មាន Reuters។

លោក Jose Manuel Albares រដ្ឋមន្ត្រីការបរទេសអេស្ប៉ាញ, លោក Espen Barth Eide រដ្ឋមន្ត្រីការបរទេសន័រវេស និងលោក Micheal Martin រដ្ឋមន្ត្រីការបរទេសអៀរឡង់ (រូបភាព៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រទេសអឺរ៉ុបទាំង៣ បានចូលរួមជាមួយបណ្ដាប្រទេសជាង១៤០ទៀតក្នុងចំណោមសមាជិកចំនួន១៩៣ប្រទេសនៅក្នុងអង្គការសហប្រជាជាតិ ដែលទទួលស្គាល់ប៉ាឡេស្ទីនជា “ប្រទេសមួយ” ក្រោមហេតុផលចង់បង្កើនកិច្ចប្រឹងប្រែង ដើម្បីទទួលបានបទឈប់បាញ់នៅក្នុងសង្គ្រាមអ៊ីស្រាអ៊ែលជាមួយក្រុមហាម៉ាស ក្នុងតំបន់ហ្គាហ្សា។

លោក Pedro Sanchez នាយករដ្ឋមន្ត្រីអេស្ប៉ាញ បាននិយាយថា វាគឺជាការសម្រេចចិត្តប្រវត្តិសាស្ត្រ ដែលមានគោលបំណងតែមួយគត់គឺ អ៊ីស្រាអ៊ែល និងប៉ាឡេស្ទីនទទួលសន្ដិភាព។ លោក Sanchez បានបន្តថា អេស្ប៉ាញ នឹងទទួលស្គាល់រដ្ឋបង្រួបបង្រួមប៉ាឡេស្ទីន ដែលរាប់បញ្ចូលតំបន់ហ្គាហ្សាស្ទ្រីប និងតំបន់ West Bank ក្រោមការគ្រប់គ្រងដោយអាជ្ញាធរជាតិប៉ាឡេស្ទីន ដោយមានក្រុងយេរូសាឡឹមបែកខាងកើតជារដ្ឋធានី។ អេស្ប៉ាញ នឹងមិនទទួលស្គាល់ការផ្លាស់ប្ដូរបន្ទាត់ព្រំដែនដែលបានកំណត់មុនឆ្នាំ១៩៦៧ឡើយ លុះត្រាណាតែមានការទទួលស្គាល់ពីភាគីពាក់ព័ន្ធទាំងសងខាង។

រូបទង់ជាតិប៉ាឡេស្ទីន (រូបភាព៖ Getty Images)

បន្ថែមពីនេះ នាយកដ្ឋានកិច្ចការបរទេសរបស់ប្រទេសអៀរឡង់ ធ្លាប់បានលើកឡើងកាលពីសប្ដាហ៍មុនថា ខ្លួននឹងផ្លាស់ប្ដូរពីការិយាល័យតំណាងឲ្យក្លាយជាស្ថានទូតផ្លូវការនៅទីក្រុង Ramallah ក្នុងតំបន់ West Bank ហើយក៏មានការតែងតាំងឯកអគ្គរដ្ឋទូតនៅទីនោះផងដែរ។ ចំណែកឯភ្នាក់ងារបេសកកម្មប៉ាឡេស្ទីននៅអៀរឡង់ នឹងត្រូវកែប្រែឲ្យក្លាយជាស្ថានទូតវិញដូចគ្នា។

បណ្ដាប្រទេសទាំង៣ បានថ្លែងរួមគ្នាថា ពួកគេសង្ឃឹមថា ការសម្រេចចិត្តនេះនឹងជួយជំរុញឲ្យបណ្ដាប្រទេសនៅសហភាពអឺរ៉ុបយកលំនាំតាម៕

ដោយ៖ ឈាង