ព័ត៌មានអន្ដរជាតិ

ប៉េងប៉ោងផ្ទុកសំរាមកូរ៉េខាងជើង ធ្លាក់នៅជាង ៧៧០ ទីតាំង ក្នុងប្រទេសកូរ៉េខាងត្បូង

បានផុស

២ years មុន

នៅ

ថ្ងៃសុក្រ ១៤ មិថុនា ២០២៤

ដោយ

យោងតាមការចេញផ្សាយរបស់ទូរទស្សន៍ជាតិជប៉ុននៅថ្ងៃទី ១៤ ខែ មិថុនាបានឲ្យដឹងថា មកដល់ពេលនេះ ប៉េងប៉ោងផ្ទុកសំរាម ដែលបង្ហោះដោយទីក្រុងព្យុងយ៉ាង បានហោះចូលនិងធ្លាក់នៅជាង៧៧០ទីតាំងហើយ ទូទាំងប្រទេសកូរ៉េខាងត្បូង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កូរ៉េខាងជើងបានបង្ហោះប៉េងប៉ោងផ្ទុកសម្រាមចូលកូរ៉េខាងត្បូង ចាប់តាំងពីថ្ងៃទី ២៨ ឧសភាមក ដើម្បីសងសឹកចំពោះសកម្មជននៅកូរ៉េខាងត្បូង ដែលបង្ហោះប៉េងប៉ោងរិះគន់របបលោកគីមនិងភ្ជាប់ជាមួយពត៌មានពីខាងក្រៅ រួមទាំងបទចម្រៀងKpop និង Kdrama ផងដែរ ចូលទៅកូរ៉េខាងជើង។

បើយោងតាមទីភ្នាក់ងារប៉ូលិសជាតិកូរ៉េខាងត្បូងបានឲ្យដឹងថា មានប៉េងប៉ោងបែបនេះជាង ១ ៦០០បង្ហោះដោយកូរ៉េខាងជើង ហើយបានធ្លាក់នៅទីតាំងចំនួន ៧៧៨ ក្នុងប្រទេសកូរ៉េខាងត្បូង។ ទីតាំងទាំងនោះគ្របដណ្ដប់លើតំបន់ដ៏ធំ រួមទាំងរដ្ឋធានីសេអ៊ូល ខេត្ត Gangwon ភាគខាងកើត និងទីក្រុង Gyeongju ភាគអាគ្នេយ៍ផងដែរ។

ស្របពេលអ្នកជំនាញសម្តែងការព្រួយបារម្ភថា ប៉េងប៉ោងទាំងនោះអាចត្រូវបានប្រើប្រាស់ក្នុងការវាយប្រហារដោយអាវុធជីវសាស្ត្រ ឬគីមីនោះ អាជ្ញាធរកូរ៉េខាងត្បូងក៏ហាមប្រាមពលរដ្ឋខ្លួន ពីការប៉ះពាល់ប៉េងប៉ោងទាំងនោះដោយផ្ទាល់ផងដែរ។

គួរបញ្ជាក់ថា សង្គ្រាមរវាងកូរ៉េទាំងពីរថ្មីៗនេះ បានងាកមកប្រើយុទ្ធសាស្រ្តផ្សេងៗដូចជាបង្ហោះប៉េងប៉ោង និងប្រើការឃោសនារិះគន់គ្នាទៅវិញទៅមក។ កាលពីសប្ដាហ៍មុនយោធាកូរ៉េខាងត្បូងបានឆ្លើយតបដោយការប្រើឧបករណ៍បំពងសំឡេងឃោសនារិះគន់ក្រុងព្យុងយ៉ាងដែលចាក់ផ្សាយនៅជិតខ្សែព្រំដែនយោធាជាលើកដំបូងក្នុងរយៈពេលប្រាំមួយឆ្នាំ ហើយព្រមានបន្តការផ្សាយបែបនេះទៀត ប្រសិនបើក្រុងព្យុងយ៉ាងមិនព្រមបញ្ឃប់ការបង្ហោះប៉េងប៉ោងទេនោះ៕