អាមេរិក​​ថា ចិន​ភ័យព្រួយ​កូរ៉េខាងជើងបង្កហេតុ ក្រោយ​ដំណើរ​ទស្សនកិច្ច​របស់​លោក ពូទីន

យោងតាមអនុរដ្ឋមន្ត្រីការបរទេសអាមេរិក លោក Kurt Campbell បានឲ្យដឹងថា ប្រទេសចិនកំពុងព្រួយបារម្ភថា​ កូរ៉េខាងជើង នឹងត្រូវបានលើកទឹកចិត្តឱ្យធ្វើរឿងបង្កហេតុ ឈានដល់បញ្ឆេះឲ្យមានវិបត្តិនៅក្នុងតំបន់ទៀតផង បន្ទាប់ពីលោក ពូទីនចុះហត្ថលេខាលើកិច្ចព្រមព្រៀងការពារជាតិជាមួយទីក្រុងព្យុងយ៉ាង។ នេះបើយោងតាមការចេញផ្សាយរបស់សារពត៌មាន CNA នៅថ្ងៃទី ២៥ ខែ មិថុនា​។

បើទោះបីជាប្រទេសចិនមានសម្ព័ន្ធភាពល្អជាមួយរុស្ស៊ីក្តី ក៏ចិននៅតែព្រួយបារម្ភថា កូរ៉េខាងជើងអាចនឹងមានភាពរឹងមាំក្នុងការចាប់ផ្តើមឲ្យមានវិបត្តិក្នុងតំបន់ បន្ទាប់ពីដំណើរទស្សនកិច្ចរបស់លោកប្រធានាធិបតី វ្ល៉ាឌីមៀរ ពូទីន ហើយត្បិតទីក្រុងព្យុងយ៉ាង ស្ថិតនៅក្រោមការដាក់ទណ្ឌកម្មមួយចំនួនរបស់អង្គការសហប្រជាជាតិលើកម្មវិធីនុយក្លេអ៊ែរ និងមីស៊ីលក្តី ប៉ុន្តែបើប្រទេសនេះបានរកឃើញដៃគូដ៏ខ្លាំងក្លាដូចជាប្រទេសរុស្ស៊ីនោះ ខ្លួននឹងមានឥទ្ធិពលតែខ្លាំងជាក់ជាមិនខានឡើយ។

ទន្ទឹមនោះលោក Campbell បានឲ្យដឹងថា ដំណើរទស្សនកិច្ចរបស់លោកពូទីនទៅកាន់ទីក្រុងព្យុងយ៉ាង ធ្វើឱ្យកូរ៉េខាងត្បូងមានភាពច្របូកច្របល់ ជាពិសេសការកើនឡើងនៃឧប្បត្តិហេតុយោធាទ្រង់ទ្រាយតូចរបស់កូរ៉េខាងជើងនៅតាមព្រំដែនជាមួយកូរ៉េខាងត្បូង និង ការប្តេជ្ញាចិត្តយ៉ាងច្បាស់លាស់របស់ទីក្រុងព្យុងយ៉ាង ក្នុងការចៀសវាងទំនាក់ទំនងការទូតជាមួយសហរដ្ឋអាមេរិក។ មួយវិញទៀតសហរដ្ឋអាមេរិក ជឿជាក់ថា រុស្ស៊ីក៏កំពុងសម្លឹងមើលការគាំទ្រកាន់តែខ្លាំងពីកូរ៉េខាងជើង រួមទាំងសក្តានុពលលើផ្នែកនុយក្លេអ៊ែរផងដែរ។

គួរបញ្ជាក់ថាក្នុងជំនួបរវាងលោក ពូទីននិងលោក គីម, ប្រធានាធិបតីរុស្ស៊ីបានចុះហត្ថលេខាលើកិច្ចព្រមព្រៀងជាមួយមេដឹកនាំកូរ៉េខាងជើង ដែលរួមមានការសន្យាជួយគ្នាទៅវិញទៅមក ប្រសិនបើប្រទេសណាមួយរងការវាយប្រហារពីបរទេស៕

អត្ថបទ៖ ប៊ុន សុភាព