ព័ត៌មានអន្ដរជាតិ

ស្លាប់ម្នាក់ និងរបួស៦នាក់ ក្នុងហេតុការណ៍បាក់ស្រុតដំបូលព្រលានយន្តហោះឥណ្ឌា

បានផុស

២ years មុន

នៅ

ថ្ងៃសុក្រ ២៨ មិថុនា ២០២៤

ដោយ

Chheang

ហេតុការណ៍បាក់ស្រុតដំបូលព្រលានយន្តហោះអន្តរជាតិ Indira Gandhi នៅរដ្ឋធានីញូវដេលី ប្រទេសឥណ្ឌា បានបណ្ដាលឲ្យមនុស្សម្នាក់បានស្លាប់ និង៦នាក់ផ្សេងទៀតរងរបួស នៅព្រឹកថ្ងៃសុក្រទី២៨ ខែមិថុនា ឆ្នាំ២០២៤ នេះ។ បើតាមមន្ត្រីប្រចាំតំបន់កើតហេតុ បានឲ្យដឹងថា ការបាក់ស្រុតដំបូលនេះ ដោយសារតែមានភ្លៀងធ្លាក់ខ្លាំង លាយឡំជាមួយខ្យល់កន្ត្រាក់ ក្នុងរយៈពេល២ថ្ងៃជាប់ៗគ្នា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក K Rammohan Naidu រដ្ឋមន្ត្រីអាកាសចរណ៍ស៊ីវិលឥណ្ឌា បានប្រកាសថា ជនរងគ្រោះទាំង៦នាក់ ត្រូវបានបញ្ជូនទៅមន្ទីរពេទ្យព្យាបាលរួចរាល់ហើយ ខណៈដែលក្រុមអ្នកជួយសង្គ្រោះកំពុងបោសសម្អាតបំណែកដែលបានបាក់ស្រុត ដើម្បីស្វែងរកមើលថាតើមានជនរងគ្រោះផ្សេងទៀតដែរឬក៏អត់។

មន្ត្រីព្រលានយន្តហោះ បានប្រកាសថា ហេតុការណ៍នេះ បានកើតឡើងនៅម៉ោង៥ព្រឹក ក្នុងស្ថានីយទី១ នៃព្រលានយន្តហោះ Indira Gandhi ហើយការហោះហើរជាង៦០០ ត្រូវបានផ្អាកជាបណ្ដោះអាសន្នភ្លាមៗ និងមានខ្លះត្រូវបានលុបចោលតែម្ដង។ មន្ត្រីព្រលានយន្តហោះ បានបញ្ជាក់ថា ស្ថានីយទី១ នេះ គឺជាច្រកសម្រាប់ការហោះហើរនៅក្នុងស្រុក។

ក្រៅតែពីបាក់ស្រុតដំបូល ក៏មានការរលំធ្នឹមនៅច្រកចេញចូលព្រលានយន្តហោះផងដែរ ដែលបណ្ដាលឲ្យកិនសង្កត់ខូចខាតរថយន្តមួយចំនួន។

សូមបញ្ជាក់ថា ស្ថានីយដែលបានបាក់ស្រុតដំបូលនេះ គឺជាស្ថានីយដែលទើបត្រូវបានជួសជុលថ្មីឡើងវិញ កាលពីខែមីនាកន្លងទៅ។ លោក Shri Narendra Modi នាយករដ្ឋមន្ត្រីឥណ្ឌា បានប្រកាសថា ការជួសជុលកែលម្អនេះ ធ្វើឡើងដើម្បីពង្រីកសមត្ថភាពទទួលអ្នកដំណើរឲ្យបានដល់ ៤០លាននាក់ជាប្រចាំឆ្នាំ៕

ដោយ៖ ឈាង

Related Topics:ប្រទេសឥណ្ឌា